ଭୁବନେଶ୍ୱର ୩୦/୦୬: ଉପରମୁଣ୍ଡରେ ପ୍ରବଳ ବର୍ଷା ଯୋଗୁ ମୟୂରଭଞ୍ଜ ଓ ବାଲେଶ୍ୱରକୁ ବନ୍ୟା ଭୟ ବଢ଼ିଯାଇଛି । ସୁବର୍ଣ୍ଣରେଖା, ବୁଢ଼ାବଳଙ୍ଗ ଓ ଜଳକା ନଦୀ ଫୁଲୁଛି । ରବିବାର ରାତି ୧୧ଟାରେ ରାଜଘାଟଠାରେ ସୁବର୍ଣ୍ଣରେଖା ନଦୀ ଜଳସ୍ତର ବିପଦ ସଙ୍କେତ ସ୍ତର ଛୁଇଁଛି । ବୁଢ଼ାବଳଙ୍ଗ ନଦୀ ଜଳସ୍ତର ବଢୁଛି ଓ ସୋମବାର ସୁଦ୍ଧା ବିପଦ ସଙ୍କେତ ସ୍ତର ଛୁଇଁପାରେ ।
ଲଘୁଚାପ ଜନିତ ଲଗାଣ ବର୍ଷା ଯୋଗୁଁ ମୟୂରଭଞ୍ଜ ଜିଲ୍ଲାର ସମସ୍ତ ସ୍କୁଲ ଦିନ ବନ୍ଦ ରହିବ । ଲଗାଣ ବର୍ଷାକୁ ଦୃଷ୍ଟିରେ ରଖି ୩୦ ତାରିଖ ସୋମବାରଠୁ ୩ ଦିନ ଯାଏ ଜିଲ୍ଲାର ସମସ୍ତ ସ୍କୁଲ ଏବଂ ଅଙ୍ଗନୱାଡି କେନ୍ଦ୍ର ବନ୍ଦ ରହିବ ବୋଲି ଜିଲ୍ଲାପାଳ ହେମକାନ୍ତ ସୟ ଘୋଷଣା କରିଛନ୍ତି । ଏଚ୍ଏସ୍ସି ସପ୍ଲିମେଣ୍ଟାରୀ ପରୀକ୍ଷା ଯଥାରୀତି ଚାଲୁ ରହିବ ବୋଲି ସୂଚନା ରହିଛି।
ରବିବାର ଅପରାହ୍ନ ୩ଟା ସୁଦ୍ଧା ସୁବର୍ଣ୍ଣରେଖା ନଦୀର ରାଜଘାଟଠାରେ ଜଳସ୍ତର ୮.୪୧ ମିଟର ଥିଲା । ଏଠାରେ ନଦୀର ବିପଦ ସଙ୍କେତ ସ୍ତର ହେଉଛି ୧୦.୩୬ ମିଟର । କିନ୍ତୁ ରାତି ୧୧ଟା ସୁଦ୍ଧା ନଦୀର ଜଳସ୍ତର ୧୦.୩୬ ମିଟର ପହଞ୍ଚିବା ସହିତ ବିପଦ ସଙ୍କେତ ଛୁଇଁ ଯାଇଛି । ବୁଢ଼ାବଳଙ୍ଗ ନଦୀର ଗୋବିନ୍ଦପୁର ଠାରେ ଜଳସ୍ତର ୬.୯୪ ମିଟର ରହିଛି ।
ଏଠାରେ ବିପଦ ସଙ୍କେତ ସ୍ତର ରହିଛି ୮.୧୩ ମିଟର । ରାତି ୯ଟା ବେଳକୁ ଜଳସ୍ତର ୭.୨୨ ଓ ରାତି ୧୧ ଟା ବେଳକୁ ୭.୨୪ ମିଟର ଥିଲା । ଜଳସ୍ତର ଏବେ ସତର୍କ ସଙ୍କେତ ଉପରେ ଚାଲିଛି । ନଦୀ ବଢୁଥିବାରୁ ସୋମବାର ସକାଳ ସୁଦ୍ଧା ବିପଦ ସଙ୍କେତ ଛୁଇଁ ଯାଇପାରେ । ଜଳକା ନଦୀରେ ମାଥାନିରେ ଜଳସ୍ତର ୬.୬୫ ମିଟର ରହିଛି । ବିପଦ ସଙ୍କେତ ସ୍ତର ହେଉଛି ୬.୫୦ ମିଟର ଥିବାବେଳେ ରାତି ୧୧ଟା ବେଳକୁ ଜଳସ୍ତର ୭.୧୩ ମିଟର ଥିଲା ।
