କ୍ୟାପଟେନ୍ ଶୁଭମନଙ୍କ ଗୌହାଟୀ ଯିବା କନଫର୍ମ, ଖେଳିବା ନେଇ ଏବେ ବି ଅନିଶ୍ଚିତତା

ନୂଆଦିଲ୍ଲୀ ୧୯/୧୧: ଟିମ୍ ଇଣ୍ଡିଆର ଅଧିନାୟକ ଶୁଭମନ ଗିଲଙ୍କ ଗୌହାଟି ଯାତ୍ରା ନିଶ୍ଚିତ ହୋଇଛି । ବିସିସିଆଇର ସଦ୍ୟତମ ଅପଡେଟରେ ଏହି ସୂଚନା ପ୍ରକାଶ ପାଇଛି । ତଥାପି, ସେ ନଭେମ୍ବର ୨୨ରୁ ଗୌହାଟିରେ ଆରମ୍ଭ ହେବାକୁ ଥିବା ଟେଷ୍ଟ ମ୍ୟାଚ୍ ଖେଳିବେ କି ନାହିଁ ତାହା ସ୍ପଷ୍ଟ ହୋଇନାହିଁ।ଶୁଭମନ ଗିଲଙ୍କ ବେକ ଆଘାତ ସମ୍ପର୍କରେ ଏକ ବଡ଼ ସୂଚନା ସାମ୍ନାକୁ ଆସିଛି । ବିସିସିଆଇ ଗଣମାଧ୍ୟମକୁ ସୂଚନା ଦେଇଛି ଯେ ଭାରତୀୟ ଟେଷ୍ଟ ଅଧିନାୟକ ଶୀଘ୍ର ସୁସ୍ଥ ହେଉଛନ୍ତି । ସେ ଟିମ୍ ସହିତ ଗୌହାଟି ଯାତ୍ରା କରିବେ ।

ଭାରତ ନଭେମ୍ବର ୨୨ରୁ ଗୌହାଟିରେ ଦ୍ୱିତୀୟ ଟେଷ୍ଟ ଖେଳିବ । ଗିଲ୍ ମଧ୍ୟ ଦଳ ସହିତ ଯାତ୍ରା କରିବେ । ତଥାପି, ଗିଲ୍ ଖେଳିବେ କି ନାହିଁ ସେ ବିଷୟରେ କୌଣସି ନିଷ୍ପତ୍ତି ନିଆଯାଇ ନାହିଁ । ବିସିସିଆଇ ସଚିବ ଦେବଜିତ ସାଇକିଆ କହିଛନ୍ତି ଯେ ଗିଲଙ୍କ ଅଂଶଗ୍ରହଣ ବିଷୟରେ ନିଷ୍ପତ୍ତି ମ୍ୟାଚ୍ ପୂର୍ବରୁ ନଭେମ୍ବର ୨୧ ତାରିଖରେ ନିଆଯିବ।କୋଲକାତା ଟେଷ୍ଟ ସମୟରେ ବ୍ୟାଟିଂ କରୁଥିବା ସମୟରେ ଶୁଭମନ ଗିଲ ଆହତ ହୋଇଥିଲେ।

ଫଳରେ ତାଙ୍କୁ ରିଟାୟାର ହର୍ଟ ହେବାକୁ ପଡିଥିଲା । ଚିକିତ୍ସା ପାଇଁ ହସ୍ପିଟାଲକୁ ନିଆଯାଇଥିଲା। ଗିଲଙ୍କୁ ଗୋଟିଏ ଦିନ ପାଇଁ ଆଇସିୟୁରେ ରଖାଯାଇଥିଲା । କିନ୍ତୁ ପରଦିନ ତାଙ୍କୁ ଡିସଚାର୍ଜ କରାଯାଇଥିଲା । ବିସିସିଆଇ ଡାକ୍ତରୀ ଦଳ ତାଙ୍କୁ କଡ଼ା ନଜର ରଖିଛି । ଶେଷ ମୁହୂର୍ତ୍ତରେ ତାଙ୍କ ଅଂଶଗ୍ରହଣ ସମ୍ପର୍କରେ ନିଷ୍ପତ୍ତି ନିଆଯିବ।ଏଠାରେ ପ୍ରଶ୍ନ ଉଠୁଛି, ଯଦି ଶୁଭମନ ଗିଲ ଖେଳନ୍ତି ନାହିଁ, ତେବେ ତାଙ୍କ ସ୍ଥାନ କିଏ ନେବ ? କୋଲକାତାର ଇଡେନ ଗାର୍ଡେନ୍ସରେ ପରାଜୟ ପରେ ଟିମ୍ ଇଣ୍ଡିଆ ଅଭ୍ୟାସ କରିଥିଲା ।

ସାଇ ସୁଦର୍ଶନ ମଙ୍ଗଳବାର ଅଭ୍ୟାସରେ ଖୁବ୍ ଝାଳ ବୁହାଇଥିଲେ । ଏଥିରୁ ସ୍ପଷ୍ଟ ମନେହେଉଛି ଯେ ଏହି ଖେଳାଳି ଗିଲଙ୍କ ସ୍ଥାନ ନେଇପାରନ୍ତି । ତଥାପି, ନୀତିଶ କୁମାର ରେଡ୍ଡୀଙ୍କୁ ମଧ୍ୟ ଦଳରେ ସାମିଲ କରାଯାଇଛି । ଯଦି ସୁଦର୍ଶନଙ୍କୁ ସୁଯୋଗ ଦିଆଯାଏ, ତେବେ ଦଳ ବାମହାତୀ ବ୍ୟାଟସମ୍ୟାନରେ ପରିପୂର୍ଣ୍ଣ ହେବ । ଯାହାର ସୁଯୋଗ ଦକ୍ଷିଣ ଆଫ୍ରିକା ଦଳ ନେଇପାରିବ। ନୀତିଶ ରେଡ୍ଡୀ ଭଲ ଫର୍ମରେ ନାହାନ୍ତି ।

ଏବେ ଦେଖିବାକୁ ବାକି ଅଛି ଯେ ଗୌତମ ଗମ୍ଭୀର କ’ଣ ନିଷ୍ପତ୍ତି ନିଅନ୍ତି । ଭାରତୀୟ ଦଳ ଏହି ସିରିଜର ପ୍ରଥମ ଟେଷ୍ଟ ହାରିଛି । କୋଲକାତାରେ ଭାରତ ୩୦ ରନରେ ପରାଜୟ ବରଣ କରିଛି । ଦକ୍ଷିଣ ଆଫ୍ରିକା ସ୍ପିନରମାନଙ୍କ ବିରୋଧରେ ଭାରତୀୟ ବ୍ୟାଟସମ୍ୟାନମାନେ ବିଫଳ ହୋଇଛନ୍ତି । ଟିମ୍ ଇଣ୍ଡିଆ ସିରିଜରେ ୦-୧ ରେ ପଛୁଆ ଅଛି। ଗୌହାଟୀରେ ଏକ ଭୁଲ କେବଳ ସିରିଜ ପାଇଁ ମହଙ୍ଗା ସାବ୍ୟସ୍ତ ହେବନି, ବରଂ ଦଳ ପରିଚାଳନାକୁ ନେଇ କଠୋର ସମାଲୋଚନାର ଶିକାର ହେବାକୁ ପଡିବ ।