ଜେଲ୍‌ରୁ ବାହାରିଲେ ରାଜପାଲ ଯାଦବ, ୧୨ ଦିନ ପରେ ମିଳିଲା ମୁକ୍ତି

ନୂଆଦିଲ୍ଲୀ: ବଲିଉଡର ହାସ୍ୟ ଅଭିନେତା ରାଜପାଲ ଯାଦବ ଶେଷରେ ତିହାର ଜେଲରୁ ବାହାରିଛନ୍ତି। ଜେଲରେ ୧୨ ଦିନ ରହିବା ପରେ ମଙ୍ଗଳବାର ସେ ମୁକ୍ତ ହୋଇଛନ୍ତି। ସୋମବାର ତାଙ୍କୁ ଦିଲ୍ଲୀର ହାଇକୋର୍ଟ ଅନ୍ତରୀଣ ଜାମିନ ପ୍ରଦାନ କରିଥିଲେ। ୯ କୋଟି ଟଙ୍କାର ଲୋନ କେସରେ ଦୀର୍ଘ ସମୟ ଧରି ଚାଲିଥିବା ଆଇନଗତ ବିବାଦ ପରେ ରାଜପାଲଙ୍କୁ ଆଶ୍ଵସ୍ତି ମିଳିଛି।

ଜେଲରୁ ବାହରିବା ପରେ ରାଜପାଲ୍ ଯାଦବ ଗଣମାଧ୍ୟମ ପ୍ରତିନିଧିଙ୍କୁ ନିଜର ପ୍ରତିକ୍ରିୟା ଦେଇଛନ୍ତି। ସେ କହିଛନ୍ତି କୌଣସି ଆଇନଗତ ସୂଚନା ଜାଣିବାକୁ ହେଲେ ଆମର ଓକିଲ ଭାସ୍କରଙ୍କ ପ୍ରତିକ୍ରିୟା ନେଇ ପାରିବେ। ମୋତେ ବଲିଉଡରେ ୩୦ ବର୍ଷ ହେବାକୁ ଯାଉଛି। ପୂରା ଦେଶର ପ୍ରତ୍ୟେକ ଲୋକ ମୋ ସହିତ ଥିଲେ। ତେବେ ଯାଇ ମୁଁ ୨୫୦ ଫିଲ୍ମରେ କାମ କରି ପାରିଛି। ପୂରା ବଲିଉଡ ମୋ ସହିତ ଛିଡ଼ା ହୋଇ ରହିଲା। ଭାରତୀୟ ସିନେମାର ପିଲାଠୁ ନେଇ ବୃଦ୍ଧ ସମସ୍ତେ ମୋର ନିଜର। ସମସ୍ତେ ମୋ ସହିତ ଥିଲେ ଏବଂ ଆଗକୁ ରହିବେ ମଧ୍ୟ।

ରାଜପାଲ ଏହା ମଧ୍ୟ କହିଛନ୍ତି, ଗତ ୧୦ ବର୍ଷରେ ମାନନୀୟ ହାଇକୋର୍ଟ ଯାହା ବି ଆଦେଶ ଦେଇଛନ୍ତି, ମୁଁ ସବୁ ମାନିଛି। ଆଗକୁ ଯେଉଁଠି କି ଡାକିବେ ମୁଁ ସେଠାରେ ହାଜର ହେବାକୁ ପ୍ରସ୍ତୁତ। ସଭିଙ୍କ ସହ ମୋର ମନୋରଞ୍ଜନର ସଂପର୍କ ରହିଛି। ଯେଉଁଭଳି ଭାବେ ବଲିଉଡ ମୋ ସହ ଛିଡ଼ା ହେଲା ମୁଁ ସଭିଙ୍କ ନିକଟରେ କୃତଜ୍ଞ। ଧନ୍ୟବାଦ ହାଇକୋର୍ଟ, ଆପଣ ମୋତେ ଶୁଣିଲେ, ମୋତେ ସୁଯୋଗ ଦେଲେ। ମୁଁ ପ୍ରତିଟି ଛକ, ମୋଡ଼ରେ କୋର୍ଟଙ୍କ ସହ ରହିଛି।

ଦେଢ କୋଟି ଦେଲେ ରାଜପାଲ୍

ରାଜପାଲ୍ ଯାଦବଙ୍କ ବିରୋଧରେ ଏକ ଫିଲ୍ମ ପ୍ରୋଜେକ୍ଟ ସଂପର୍କିତ ଆର୍ଥିକ ନେଣଦେଣକୁ ନେଇ ମାମଲା ରୁଜୁ ହୋଇଥିଲା। ସେ ନିଜର ପଦାର୍ପଣ ନିର୍ଦ୍ଦେଶିତ ଫିଲ୍ମ 'ଅତା ପତା ଲାପତା'ର ନିର୍ମାଣ ପାଇଁ ୫ କୋଟି ଟଙ୍କା ଲୋନ ନେଇଥିଲେ। ଫିଲ୍ମ ବକ୍ସ ଅଫିସରେ ଫ୍ଲପ୍ ହୋଇଥିଲା। ଫଳରେ ନେଇଥିବା ଋଣକୁ ଠିକ୍ ସମୟରେ ପରିଶୋଧ କରି ପାରି ନ ଥିଲେ ରାଜପାଲ। ସୁଧ ସହିତ ଅର୍ଥ ରାଶି ୫ କୋଟିରୁ ବଢି ୯ କୋଟିରେ ପହଞ୍ଚି ଯାଇଥିଲା। ଶେଷରେ ବାଧ୍ୟ ହୋଇ ଲୋନ ଦେଇଥିବା ଦିଲ୍ଲୀର ଉଦ୍ୟୋଗପତି ରାଜପାଲଙ୍କ ବିରୋଧରେ ଅଦାଲତଙ୍କ ଦ୍ଵାରସ୍ଥ ହୋଇଥିଲେ। ଶୁଣାଣି ସମୟରେ ଆର୍ଥିକ ନେଣଦେଣକୁ ନେଇ କୋର୍ଟ କଡ଼ା ଆଭିମୁଖ୍ୟ ଆପଣେଇଥିଲେ।

ଲମ୍ବା ସମୟ ଧରି ଚାଲିଥିବା କେସରେ ଶେଷରେ ରାଜପାଲ୍ ଯାଦବ କୋର୍ଟରେ ସ୍ଵୀକାର କରି ଯେ, ତାଙ୍କ ନିକଟରେ ଋଣ ପରିଶୋଧ ପାଇଁ ଟଙ୍କା ନାହିଁ। କୋର୍ଟଙ୍କ ଆଦେଶ ପରେ ସେ ଦିଲ୍ଲୀର ତିହାର ଜେଲରେ ଆତ୍ମସମର୍ପଣ କରିଥିଲେ। ଏହା ପରେ ରାଜପାଲଙ୍କୁ ଫିଲ୍ମ ଇଣ୍ଡଷ୍ଟ୍ରୀରୁ ସହାୟତାର ସୂଅ ଛୁଟିବାରେ ଲାଗିଲା। ଏହା ପରେ କେସକୁ ପୁଣି ଥରେ ଖୋଲା ଯାଇ ରାଜପାଲଙ୍କ ଓକିଲ ତାଙ୍କ ମୁକ୍ତି ପାଇଁ କୋର୍ଟରେ ନିବେଦନ କରିଥିଲେ।

ଏହି ସମୟରେ ତାଙ୍କ ଓକିଲ କହିଥିଲେ ଯେ, ଅଭିନେତାଙ୍କ ପକ୍ଷରୁ ଋଣ ପରିଶୋଧ ପାଇଁ ଉଦ୍ୟମ ଜାରି ରହିଥିଲା। ତାଙ୍କ ମହକିଲ ସଂପୂର୍ଣ୍ଣ ଆଇନ ପ୍ରକ୍ରିୟାର ସମ୍ମାନ କରନ୍ତି। କୋର୍ଟଙ୍କ ଆଦେଶ କ୍ରମେ ରାଜପାଲଙ୍କ ପକ୍ଷରୁ କୋର୍ଟରେ ଦେଢ କୋଟି ଟଙ୍କାର ଡିମାଣ୍ଡ ଡ୍ରାଫ୍ଟ ଜମା କରାଯାଇଛି। ରାଜପାଲଙ୍କୁ ବଲିଉଡରୁ ସଲମାନ ଖାନ, ଅଜୟ ଦେବଗନ, ସୋନୁ ସୁଦ ଓ ଗୁରମୀତ ଚୌଧୁରୀଙ୍କଠୁ ନେଇ ଅନେକ ଅଭିନେତା ଓ ଅଭିନେତ୍ରୀ ଆର୍ଥିକ ସହାୟତା ଦେଇଛନ୍ତି। ବକ୍ସର ବିଜେନ୍ଦ୍ର ସିଂ ତାଙ୍କୁ ଫିଲ୍ମ ଅଫର ଦେଇଛନ୍ତି। ରାଜପାଲ୍ ଶୀଘ୍ର ଅକ୍ଷୟ କୁମାରଙ୍କ ଅଭିନୀତ ଓ୍ଵେଲକମ ଟୁ ଜଙ୍ଗଲରେ ନଜର ଆସିବେ।