ଦ୍ରୁତ ଗତିରେ ବୁଢ଼ା ହେଉଛି ଭାରତ; ୨୦୩୬ ସୁଦ୍ଧା ୧୫ ପ୍ରତିଶତ ବଢିଯିବ ବୃଦ୍ଧଙ୍କ ସଂଖ୍ୟା, ଜାତିସଂଘ ରିପୋର୍ଟରେ ଖୁଲାସା

ନୂଆଦିଲ୍ଲୀ, ୧୦।୧୨ : ଦ୍ରୁତ ଗତିରେ ବୁଢ଼ା ହେଉଛି ଭାରତ । ଭାରତରେ ବୃଦ୍ଧଙ୍କ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଉଛି। ସେହି ସମୟରେ୧୫ ବର୍ଷରୁ କମ୍ ବୟସର ଲୋକଙ୍କ ସଂଖ୍ୟା ହ୍ରାସ ପାଉଛି। ଜାତିସଂଘର ଏକ ନୂତନ ରିପୋର୍ଟ ଅନୁଯାୟୀ, ୨୦୪୬ ସୁଦ୍ଧା ଭାରତରେ ବୃଦ୍ଧଙ୍କ ସଂଖ୍ୟା ୦-୧୪ ବୟସ ବର୍ଗର ପିଲାଙ୍କ ସଂଖ୍ୟାକୁ ଅତିକ୍ରମ କରିବ। ଭାରତରେ ବୟସ୍କ ହେବାର ଗତିକୁ ସୂଚାଇ ଏହି ରିପୋର୍ଟରେ ୨୦୧୧ ପରଠାରୁ ବୃଦ୍ଧଙ୍କ ସଂଖ୍ୟାରେ ତୀବ୍ର ବୃଦ୍ଧି ଘଟିଥିବା ଉଲ୍ଲେଖ କରାଯାଇଛି। ଦେଶରେ ୧୫ ବର୍ଷରୁ କମ୍ ବୟସ୍କ ଲୋକଙ୍କ ସଂଖ୍ୟା ମଧ୍ୟ ହ୍ରାସ ପାଇଛି। ଦେଶରେ ବର୍ତ୍ତମାନ ସର୍ବାଧିକ ଯୁବ ଗୋଷ୍ଠୀ ଅଛନ୍ତି।

୨୦୧୧ରେ ଦେଶରେ ୬୦ ବର୍ଷରୁ ତଦୁର୍ଦ୍ଧ୍ଵ ବୟସ୍କ ଲୋକଙ୍କ ସଂଖ୍ୟା ୧୦.୧୬ କୋଟି ଥିଲା । ୨୦୩୬ ସୁଦ୍ଧା ଏହି ସଂଖ୍ୟା ବୃଦ୍ଧି ପାଇ ୨୨.୭୪ କୋଟି ହେବ । ଅର୍ଥାତ୍ ବରିଷ୍ଠ ନାଗରିକଙ୍କ ସଂଖ୍ୟା ମୋଟ ଜନସଂଖ୍ୟାରେ ୮.୪%ରୁ ବଢ଼ି ୧୪.୯% ରେ ପହଞ୍ଚିଯିବ । ଫଳରେ ଦେଶରେ ପ୍ରତି ୭ ଜଣରେ ଜଣେ ବରିଷ୍ଠ ନାଗରିକ ହେବେ । କେନ୍ଦ୍ର ସ୍ୱରାଷ୍ଟ୍ର ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାୟ ମଙ୍ଗଳବାର ଲୋକସଭାରେ ଏହି ସୂଚନା ଦେଇଛନ୍ତି । ସ୍ୱରାଷ୍ଟ୍ର ରାଷ୍ଟ୍ରମନ୍ତ୍ରୀ କହିଛନ୍ତି, ଭାରତରେ ଯେଉଁଭଳି ଗତିରେ ବରିଷ୍ଠ ନାଗରିକଙ୍କ ସଂଖ୍ୟା ବଢ଼ୁଛି, ଏହାଦ୍ୱାରା ସ୍ୱାସ୍ଥ୍ୟ ସେବା, ସାମାଜିକ ସୁରକ୍ଷା, ଆର୍ଥିକ ନିର୍ଭରଶୀଳତା ଏବଂ ଡିଜିଟାଲ ସୁବିଧାର ଉପଯୋଗ ଭଳି ଆହ୍ୱାନ ମଧ୍ୟ ବୃଦ୍ଧି ପାଇବାରେ ଲାଗିଛି । ତାଙ୍କ ମୁତାବକ, ବରିଷ୍ଠଙ୍କ ସଂଖ୍ୟା ବଢ଼ିବା ଯୋଗୁ ପରିବାରର ଢାଞ୍ଚା ଏବଂ ସମ୍ପର୍କର ତରିକା ମଧ୍ୟ ବଦଳୁଛି । ପୂର୍ବରୁ ଅଧିକାଂଶ ଲୋକ ଯୌଥ ପରିବାରରେ ରହୁଥିଲେ । ଫଳରେ ବରିଷ୍ଠ ନାଗରିକଙ୍କ ସ୍ୱାସ୍ଥ୍ୟର ଯତ୍ନ ନେବାରେ ଅସୁବିଧା ହେଉ ନ ଥିଲା । ଏବେ ଛୋଟ ପରିବାର ବଢ଼ିବାରେ ଲାଗିଛି । ଫଳରେ ବରିଷ୍ଠ ଲୋକଙ୍କ ସ୍ୱାସ୍ଥ୍ୟ ସୁରକ୍ଷା ତରିକା ବଦଳି ଯାଇଛି ।

ନୂଆ ରିପୋର୍ଟରେ ଏହାକୁ ‘ବିରୋଧାଭାସ’ କୁହାଯାଇଛି । ଅର୍ଥାତ୍ ବରିଷ୍ଠ ନାଗରିକଙ୍କ ସଂଖ୍ୟା ବଢ଼ୁଛି ସତ । କିନ୍ତୁ ସମାଜର ଭାବନା, ଦାୟିତ୍ୱ ଏବଂ ବୃଦ୍ଧବୃଦ୍ଧାଙ୍କ ଯତ୍ନକୁ ନେଇ ଆଶା ଆଉ ଆଗ ଭଳି ରହିନାହିଁ । ଏହାର ସିଧାସଳଖ ପ୍ରଭାବ ବରିଷ୍ଠ ନାଗରିକଙ୍କ ସ୍ୱାସ୍ଥ୍ୟ ଓ ସମ୍ମାନ ଉପରେ ପଡୁଛି । ମନ୍ତ୍ରୀ ନିତ୍ୟାନନ୍ଦ କହିଛନ୍ତି, ଦେଶରେ ବର୍ଦ୍ଧିତ ବରିଷ୍ଠଙ୍କ ସଂଖ୍ୟା ଯୋଗୁ ସରକାର ଓ ସମାଜ ସାମ୍ନାରେ ନୂଆ ଦାୟିତ୍ୱ ବଢ଼ିଯାଇଛି । ତେବେ ଆମ ସରକାର ଏଥିପ୍ରତି ସଜାଗ ରହିଛନ୍ତି । ତାଙ୍କ ମୁତାବକ, ବରିଷ୍ଠ ନାଗରିକଙ୍କ ଆବଶ୍ୟକତାକୁ ଦୃଷ୍ଟିରେ ରଖି ସରକାର ୨୦୨୧ ଏପ୍ରିଲ ୧ରୁ ଅଟଳ ବୟୋ ଅଭ୍ୟୁଦୟ ଯୋଜନା ଲାଗୁ କରିଛନ୍ତି । ଏହି ଯୋଜନାରେ ସମଗ୍ର ଦେଶରେ ବରିଷ୍ଠ ନାଗରିକଙ୍କ ପାଇଁ ସହାୟତା ଓ ସେବା ଉପଲବ୍ଧ କରାଯାଉଛି ।