ଭୋକର ଜ୍ୱାଳା ଓ ଦାରିଦ୍ର୍ୟର ବାସ୍ତବ ଚିତ୍ର, ଆଶା ଥିଲେ ବି ଏଠି ନିଇତି ନିରାଶାର ଚିତ୍ର

ଭୁବନେଶ୍ୱର ୩୦/୧୧: ଭୋକର ଜ୍ୱାଳା ଓ ଦାରିଦ୍ର୍ୟର ବାସ୍ତବ ଚିତ୍ର । ପିଠିରେ ଗରିବୀ ବୋଝ । ପେଟରେ ଦାନାର ବହ୍ନି । ଅଭିଶପ୍ତ ପରିବାର । ଦରିଦ୍ରର କରୁଣ ଆଘାତରେ ଜଡଜଡ ପରିବାର । ଆଶା ଥିଲେ ବି ଏଠି ନିଇତି ନିରାଶାର ଚିତ୍ର । କେତେବେଳେ ଯନ୍ତ୍ରଣା ତ କେତେବେଳେ ଦଇବର ଦାଉ । ବେଳେ ବେଳେ ମନକୁ ଆସେ ଏ ଜୀବନ ଚାଲିଯାଉନି କାହିଁ । କାରଣ ପରିବାରକୁ ଗ୍ରାସ କରିଛି ଦୁର୍ଭାଗ୍ୟ । ଜଣେ କି ଦୁଇ ଜଣ ନୁହେଁ ବାପା-ମାଆଙ୍କୁ ମିଶାଇ ସାତ ପ୍ରାଣୀ । ଓଳିଏ ଖାଇଲେ ଆର ଓଳି ଓପାସ। ଏଭଳି ଅବସ୍ଥାରେ ଦୀର୍ଘ ବର୍ଷ ହେବ ବହୁ କଷ୍ଟରେ କଟୁଛି ଜୀବନ । କହିବେ କାହାକୁ ଶୁଣିବେ କିଏ । ନା ଶୁଣୁଛନ୍ତି ସରକାର ନା ଭଗବାନ । ମୟୁରଭଞ୍ଜ କପ୍ତିପଦା ଚିତ୍ର ଦେଖିଲେ ଆପଣଙ୍କ ଆଖିରେ ବି ଆସିଯିବ ଲୁହ ।

ମୁଠାଏ ଭାତକୁ କଂସାଏ ତୋରାଣି । ଆଉ ଭୋକ ଥିଲେ ବି ଦାନା ନାହିଁ । କାରଣ ଅଧ କିଲୋ ଚାଉଳର ଭାତକୁ ସାତ ପ୍ରାଣୀ । କେମିତି ବା ପୁରିବ ପେଟ । ବାଣ୍ଟି କୁଣ୍ଟି ଦୁଇ ଦୁଇଟା ଖାଇଦେଲେ ଚଳିଯିବ । ଇଚ୍ଛା ଥାଇ ବାପା-ମା ପିଲାକୁ ଦେଇପାରିବେନି ଅଧିକ ଗଣ୍ଡାଏ । ଦୁଃଖ ଦୁର୍ଦ୍ଦଶା ଭିତରେ କିଏ ବଲ ବଲ କରି ଚାହୁଁଛି, ତ ଆଉ କିଏ ଦାନ୍ତ ଦେଖେଇ ହସିଦେଉଛି । ଜନ୍ମଦାତା, ଜନ୍ମଦାତ୍ରୀ ବି ମନର କୋହକୁ ଚାପି ଦିଅନ୍ତି ହସି । ବିଶ୍ୱାସ ଥାଏ ସବୁଦିନ ରହିବନି ଏଇ ହତଭାଗା ଜୀବନ ।

​​​​​​​

କାଳେ ସୁଧୁରିଯିବ ସ୍ଥିତି, ବଦଳିଯିବ ସବୁ କିଛି । ଖୁଣ୍ଟା ବ୍ଲକ ଡେଙ୍ଗାମ ପଞ୍ଚାୟତ ବିପ୍ରଚରଣପୁର ଗ୍ରାମର ଲିଟା ମୁର୍ମୁଙ୍କ ପରିବାରର ନିତିଦିନିଆ କଥା। ୨ ଝିଅ ୩ ପୁଅ ଆଉ ସ୍ତ୍ରୀ କାରମୀଙ୍କୁ ନେଇ ଲିଟାଙ୍କ ସଂସାର। ଲିଟାଙ୍କ ଭାଗ୍ୟ ଏମିତି ଦୁଃଖର ତାଲିକା ବି ବେଶ ଲମ୍ୱା । କାରଣ ୫ ଜଣ ଯାକ ସନ୍ତାନ ଜନ୍ମରୁ ଦିବ୍ୟାଙ୍ଗ। ଦିନ ମଜୁରିଆ ଲିଟାଙ୍କ କାମକୁ ଗଲେ ସ୍ତ୍ରୀ ସମ୍ଭାଳନ୍ତି ଘର । ଆଉ ଯଦି କାରମୀ କାମକୁ ଚାଲିଗଲେ ତେବେ କଥା ସରିଗଲା । ଉପାସରେ କଟେ ୫ ପିଲାଙ୍କ ଜୀବନ ।

ତଥାପି ବାପା-ମାଆ ମାନନ୍ତିନି ହାର୍ । ପରିବାରକୁ ବଞ୍ଚାଇବାକୁ ଯଥାସମ୍ଭବ ପ୍ରୟାସ କରନ୍ତି ଲିଟା-କାରମୀ । ବିଶେଷ କରି ଦୁଇ ପୁଅକୁ ସ୍ୱାଭାବିକ କରିବା କାମରେ ବି ଲଗାନ୍ତି । ବଡ଼ ଝିଅ ସୋମବାରୀ, ତା ପଛକୁ ବଡ଼ ପୁଅ ସମାଏ । ତା ପରେ ଠୁମ୍ପୁ ଏବଂ ଲାଲମୋହନ ଆଉ ସବୁଠାରୁ ସାନ ହେଉଛି ଝିଅ ପମା। ବିଡ଼ମ୍ୱନାର ବିଷୟ କେହି କଥା କହି ପାରନ୍ତି ନାହିଁ । ସେମାନଙ୍କ ମଧ୍ୟରୁ ଠୁମ୍ପୁ ଜମା ଚାଲିପାରେ ନାହିଁ। ଭଙ୍ଗା ଦଦରା ଚାଳ ଘରେ ପୁରା ପରିବାର ରହୁଛନ୍ତି । ଆଶ୍ଚର୍ଯ୍ୟର କଥା ଏହି ପରିବାରର ୫ ସନ୍ତାନ ଯେଉଁମାନଙ୍କର ବୟସ ୧୦ ରୁ ୨୧ ବର୍ଷ ହେବ ।

ଏତେ ପରେ ବି ଆଜି ପର୍ଯ୍ୟନ୍ତ ସରକାରୀ ଯୋଜନାରେ ମିଳି ପାରିନାହିଁ ଦିବ୍ୟାଙ୍ଗ ସାର୍ଟିଫିକେଟ କି ଭତ୍ତା । କେବଳ ଗୋଟିଏ ରାସନ କାର୍ଡରେ ମିଳୁଛି ୩୦ କିଲୋ ଚାଉଳ। ଯେଉଁଥିରେ ବିତୁଛି ଏହି ପରିବାରର ଜୀବନ। କାହିଁକି ନା ବାପା ଲିଟା ଯାହା ରୋଜଗାର କରି ଆଣନ୍ତି ତାହା ପୁରା ପରିବାରକୁ ନିଅଣ୍ଟ । ୨୩ ବର୍ଷ ତଳେ ସୁସ୍ଥ ଶିଶୁଟିଏ ପାଇଁ ସ୍ବପ୍ନ ଦେଖିଥିଲେ ଲିଟା । ହେଲେ ଭଗବାନ ପରିବାର ସିନା ଗଢିଥିଲେ, ଲଦିଦେଲେ ଦୁଃଖର ପାହାଡ । ପିଲା ଦେଲେ ତା ପୁଣି ରୋଗିଣା । ପିଲାଙ୍କୁ ଭଲ କରିବେ କଣ ଯାହା ରୋଜଗାର ସେଥିରେ ପୁରୁନି ପେଟ । ଏସବୁ ଭିତରେ ଆଶା ଓ ଅପେକ୍ଷା କ୍ଷୀଣ ହୋଇ ଆସୁଛି ।

​​​​​​​