ବିଦେଶରେ ବଢ଼ିଲା ଭାରତୀୟ ଚା’ର ଚାହିଦା, ଚକିତ କଲା ଏହି ଦେଶକୁ ରପ୍ତାନୀ

ନୂଆଦିଲ୍ଲୀ: ବିଦେଶରେ ବଢ଼ୁଛି ଭାରତୀୟ ଚା’ର ଚାହିଦା। ଯାହାର ସ୍ପଷ୍ଟ ଉଦାହରଣ ମିଳିଛି ୨୦୨୫ରେ ଭାରତରୁ ବିଦେଶକୁ ହୋଇଥିବା ଚା’ ରପ୍ତାନୀରୁ। କାରଣ ଗତବର୍ଷ ଭାରତରୁ ଚା’ ରପ୍ତାନୀ ସର୍ବକାଳୀନ ରେକର୍ଡ କରିଛି। ଏଥିରେ ମୁଖ୍ୟତଃ ଇରାନ ଏବଂ ଇରାକ ଏମିତିକି ଚୀନର ଅଧିକ ଯୋଗଦାନ ରହିଛି। କାରଣ ଏହି ତିନି ଦେଶକୁ ହିଁ ହୋଇଛନ୍ତି ସର୍ବାଧିକ ରପ୍ତାନୀ।

ଭାରତୀୟ ଚା’ ବୋର୍ଡର ଅସ୍ଥାୟୀ ତଥ୍ୟ ଅନୁଯାୟୀ, ୨୦୨୫ ଜାନୁଆରୀ-ଡିସେମ୍ବରରେ ଭାରତରୁ ୨୮୦.୪୦ ମିଲିୟନ କିଲୋଗ୍ରାମ ଚା’ ରପ୍ତାନୀ କରିଥିଲା। ଯାହା ୨୦୨୪ର ସମାନ ସମୟ ଅବଧି ମଧ୍ୟରେ ହୋଇଥିବା ୨୫୬.୧୭ ମିଲିୟନ କିଲୋଗ୍ରାମ ରପ୍ତାନୀ ତୁଳନାରେ ଅଧିକ।

ସେହିଭଳି ରପ୍ତାନୀ ଯୋଗୁ ଚା’ରୁ ହୋଇଥିବା ଆୟ ୨୦୨୫ରେ ୮, ୪୮୮.୪୩ କୋଟି ଟଙ୍କା ରହିଛି। ଯାହା ୨୦୨୪ରେ ୭, ୧୬୭. ୪୧ କୋଟି ଟଙ୍କା ଥିଲା। ରିପୋର୍ଟ ଅନୁସାରେ, UAE, ଇରାକ ଏବଂ ଚୀନରେ ଚା’ ବ୍ୟବହାର ଦ୍ରୁତ ଗତିରେ ବୃଦ୍ଧି ପାଇଛି। ଯେତେବେଳେକି ରୁଷ ଏବଂ ଯୁକ୍ତରାଷ୍ଟ୍ରରେ ହ୍ରାସ ପରିଲକ୍ଷିତ ହୋଇଛି।

ଚା’ ବୋର୍ଡ ଉପାଧ୍ୟକ୍ଷ ସି ମୁରୁଗାନଙ୍କ କହିବା ଅନୁସାରେ, ୨୦୨୫ରେ ଭାରତରୁ ହୋଇଥିବା ଚା’ ରପ୍ତାନୀ ସର୍ବୋଚ୍ଚ। ଏଥିପାଇଁ ରପ୍ତାନିକାରୀମାନେ ପ୍ରଶଂସା ପାଇବାର ଯୋଗ୍ୟ। ଏସିଆନ୍ ଟି କମ୍ପାନିର ନିର୍ଦ୍ଦେଶକ ମୋହିତ ଅଗ୍ରୱାଲ କହିଛନ୍ତି ଯେ, ଭାରତର ଚା’ ରପ୍ତାନୀ ୨୮୦ ମିଲିୟନ କିଲୋଗ୍ରାମର ସର୍ବକାଳୀନ ସର୍ବାଧିକ ସ୍ତରରେ ପହଞ୍ଚିଛି। ସେ ଆହୁରି ମଧ୍ୟ କହିଛନ୍ତି ଯେ, ଅସ୍ଥିର ରାଜନୈତିକ ପରିସ୍ଥିତି ସତ୍ତ୍ୱେ ଚା’ ବୋର୍ଡ ନେତୃତ୍ୱରେ ରପ୍ତାନିକାରୀମାନେ ମଧ୍ୟପ୍ରାଚ୍ୟ ବଜାର ଯେମିତିକି ଇରାନ, ଇରାକ ଏବଂ ତୁର୍କୀ ବଜାରରେ ଏଣ୍ଟ୍ରି କରିଥିଲେ। ଆଉ ଅସ୍ଥିରତା ସତ୍ତ୍ବେବି ଭଲ ପ୍ରଦର୍ଶନ କରିଥିଲେ।

ଇରାକ ଏବଂ ୟୁଏଇରେ ବୃଦ୍ଧି ପାଇଛି ଚାହିଦା

ତଥ୍ୟ ଅନୁଯାୟୀ, ୨୦୨୫ ମସିହାରେ ଇରାକକୁ ରପ୍ତାନୀ ୫୨.୫୯ ମିଲିୟନ କିଲୋଗ୍ରାମ ଥିଲା। ଯାହା ୨୦୨୪ ମସିହାରେ ୪୦.୪୭ ମିଲିୟନ ରହିଥିଲା। ସେହିଭଳି ୨୦୨୪ରେ ୪୩.୪୮ ମିଲିୟନ କିଲୋଗ୍ରାମ ତୁଳନାରେ ୟୁଏଇକୁ ୨୦୨୫ରେ ରପ୍ତାନୀ ୫୦.୭୧ ମିଲିୟନ କିଲୋଗ୍ରାମ ହେବା ନେଇ ଅନୁମାନ କରାଯାଉଛି। ସେପଟେ ୨୦୨୫ରେ ଇରାନକୁ ରପ୍ତାନୀ ୧୧.୨୫ ମିଲିୟନ କିଲୋଗ୍ରାମ ହୋଇଥିଲା। ଯାହା ୨୦୨୪ରେ ୯.୨୫ ମିଲିୟନ କିଲୋଗ୍ରାମ ଥିଲା।

ଚୀନ୍‌କୁ ରପ୍ତାନୀରେ ରେକର୍ଡ

ସବୁଠୁ ଆକର୍ଷଣୀୟ ଥିଲା ଚୀନ୍‌କୁ ଚା’ ରପ୍ତାନୀ। କାରଣ ୨୦୨୫ ଜାନୁଆରୀ- ଡିସେମ୍ବରରେ ଚୀନ୍‌କୁ ରପ୍ତାନୀ ୧୬. ୧୩ ମିଲିୟନ କିଲୋଗ୍ରାମ ଥିଲା। ଯାହା ୨୦୨୫ରେ ମାତ୍ର ୬.୨୪ ମିଲିୟନ କିଲୋଗ୍ରାମ ଥିଲା। ମୁରୁଗାନଙ୍କ ମତରେ ଆମେରିକାର ଟାରିଫ୍ ଯୋଗୁ ଭାରତୀୟ ରପ୍ତାନିକାରୀ ନୂତନ ବଜାର ସନ୍ଧାନରେ ଥିଲେ। ଏମିତିରେ ଚୀନ୍ ସେମାନଙ୍କ ପାଇଁ ଏକ ଭଲ ଅପ୍ସନ ହୋଇଥିଲା। ସେପଟେ ୨୦୨୫ରେ ଆମେରିକାକୁ ମଧ୍ୟ ରେକର୍ଡ ସଂଖ୍ୟକ ୧୫.୨୧ ମିଲିୟନ କିଲୋଗ୍ରାମର ଚା’ ରପ୍ତାନୀ ହୋଇଛି। ଯାହା ୨୦୨୪ ମସିହାରେ ୧୭.୧୪ ମିଲିୟନ କିଲୋଗ୍ରାମ ଥିଲା। ତେବେ ଭାରତ-ଆମେରିକା ବାଣିଜ୍ୟ ଚୁକ୍ତି ପରେ ଚା’ ରପ୍ତାନୀ ଆହୁରି ବଢ଼ିବ ବୋଲି ଅନୁମାନ କରାଯାଉଛି।

ଉଲ୍ଲେଖଯୋଗ୍ୟ, ଭାରତୀୟ ଚା ବୋର୍ଡ ଏବେ ଅନ୍ୟ ବଜାର ଉପରେ ମଧ୍ୟ ଧ୍ୟାନ ଦେଉଛି। ଆଫଗାନିସ୍ତାନ, ଉତ୍ତର ଆଫ୍ରିକୀୟ ଦେଶ ଯେପରିକି- ଆଲଜେରିଆ, ଟ୍ୟୁନିସିଆ, ମରକ୍କୋ ଏବଂ ଇଜିପ୍ଟକୁ ରପ୍ତାନୀ ୩୦୦ ମିଲିୟନ କିଲୋଗ୍ରାମରେ ପହଞ୍ଚିବ ବୋଲି ଆଶା କରାଯାଉଛି।