Nuapada Byelection: ରାଜେନ୍ଦ୍ର ଢୋଲକିଆ କାହାର ? ବିଜେଡିର ନା’ ବିଜେପିର ?

ଭୁବନେଶ୍ଵର: ନୂଆପଡ଼ାର ବିଜେଡି ବିଧାୟକ ରାଜେନ୍ଦ୍ର ଢୋଲକିଆଙ୍କ ଦେହାନ୍ତ ପରେ ସେଠାରେ ଉପନିର୍ବାଚନ ହେଉଛି । ତେବେ ସ୍ବର୍ଗତ ରାଜେନ୍ଦ୍ର ଢୋଲକିଆଙ୍କ ପୁଅ ଜୟ ଢୋଲକିଆ ଶଂଖ କ୍ୟାମ୍ପ ଛାଡ଼ି ପଦ୍ମ କ୍ୟାମ୍ପରୁ ପ୍ରାର୍ଥୀ ହୋଇଛନ୍ତି । ଜୟ ବିଜେପିକୁ ଯିବା ପରେ  ନୂଆପଡ଼ାରେ ସ୍ନେହାଙ୍ଗିନୀ ଛୁରିଆଙ୍କୁ ପ୍ରାର୍ଥୀ କରିଛି ବିଜେପି । ହେଲେ ଏବେ ନୂଆପଡ଼ାରେ ବିଚିତ୍ର ସ୍ଥିତି ଦେଖିବାକୁ ମିଳିଛି । ଉଭୟ ବିଜେଡି ଓ ବିଜେପି ପୋଷ୍ଟରରେ ରାଜେନ୍ଦ୍ର ଢୋଲକିଆଙ୍କ ଫଟୋ ଲାଗିଥିବା ଦେଖିବାକୁ ମିଳିଛି । ଏମିତିରେ ପ୍ରଶ୍ନ ଉଠୁଛି ରାଜେନ୍ଦ୍ର ଢୋଲକିଆ କାହାର ? ବିଜେଡିର ନା’ ବିଜେପିର ?

ରାଜେନ୍ଦ୍ର ଢୋଲକିଆ କାହାର ? ବିଜେଡିର ନା’ ବିଜେପିର ?  ବିଜେପିର ଏହି ପୋଷ୍ଟରରେ ପ୍ରାର୍ଥୀ ଜୟ ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆଙ୍କ ପୋଷ୍ଟରରେ ମଧ୍ୟ ରହିଛି ରାଜେନ୍ଦ୍ର ଢୋଲକିଆଙ୍କ ଫଟୋ । ଏଥିରୁ କ’ଣ  ବୁଝି ହେଉଛି ?  ଏୟା ବୁଝା ପଡ଼ୁଛି ଯେ, ଉଭୟ ବିଜେପି ଓ ବିଜେଡି ଏବେ ରାଜେନ୍ଦ୍ର ଢୋଲକିଆଙ୍କ ନାଁରେ ଭୋଟ୍ ମାଗିବାକୁ ବଡ଼ ଯୋଜନା କରିଛନ୍ତି । ବିଗତ ଦିନରେ ବିଜେଡି ପ୍ରାର୍ଥୀ ଭାବେ ନୂଆପଡ଼ା ନିର୍ବାଚନରେ ବିଜେପିକୁ ଚେକ୍ ଦେଇ ଆସୁଥିଲେ  ରାଜେନ୍ଦ୍ର ଢୋଲକିଆ ।

ହେଲେ ଏବେ ସମୟ ବଦଳିଛି । ବଦଳିଛି ରାଜନୈତିକ ସମ୍ମୀକରଣ । ରାଜେନ୍ଦ୍ରଙ୍କ ପୁଅ ଜୟ ଢୋଲକିଆ ଏଥର ବିଜେଡି କ୍ୟାମ୍ପ ଛାଡ଼ି ବିଜେପିରୁ ପ୍ରାର୍ଥୀ ହୋଇଛନ୍ତି । ଏମିତିରେ ନିଜ ପୋଷ୍ଟରରେ ଜୟ ବାପାଙ୍କ ଫଟୋ ଲଗାଇବାକୁ ପଛାଇ ନାହାନ୍ତି । କହିଛନ୍ତି, ମୋ ବାପା ୫୦ବର୍ଷ ଧରି ଲୋକଙ୍କ ସେବା କରି ଆସୁଥିଲେ । ମୋତେ ମଧ୍ୟ ନୂଆପଡ଼ାବାସୀ ୫ବର୍ଷ ହେଲା ଦେଖୁଛନ୍ତି । ବିଜେଡି ଦଳୀୟ ପ୍ରାର୍ଥୀଙ୍କ ପୋଷ୍ଟରରେ  ମୋ ବାପାଙ୍କ ଫଟୋ ଲଗାଇ ଭୋଟ୍ ନେବାକୁ ଚେଷ୍ଟା କରୁଛି କହି ବର୍ଷିଛନ୍ତି ଜୟ ଢୋଲକିଆ ।

ସେପଟେ ଜୟ ଢୋଲକିଆଙ୍କ ଏଭଳି ଅଭିଯୋଗର ଜବାବ୍ ରଖିଛି ବିଜେଡି । ଦଳ କହିଛି ରାଜେନ୍ଦ୍ର ଢୋଲକିଆ ବିଜେଡିରୁ ଜିତି ବିଧାୟକ ଓ ମନ୍ତ୍ରୀ ହୋଇଥିଲେ । ସେ କୌଣସି ପରିବାରରେ ସୀମିତ ନୁହନ୍ତି । ଯେହେତୁ ସେ ବିଜେଡିର ଆସେଟ୍ ଥିଲେ ତେଣୁ ଦଳ ତାଙ୍କ ଫଟୋ ବ୍ୟବହାର କରିବାରେ କୌଣସି ଅସୁବିଧା ନାହିଁ । ଏଥିରେ ରାଜନୀତି କରିବା ଠିକ୍ ନୁହେଁ ବୋଲି କହିଛି ବିଜେଡି ।

ରାଜନୀତିରେ  କେହି କାହାର ସ୍ଥାୟୀ ଶତ୍ରୁ କିମ୍ବା ମିତ୍ର ନଥାନ୍ତି । ତା'ର ଅନେକ ଉଦାହରଣ ରହିଛି। ହେଲେ ନୂଆପଡ଼ାରେ ବିଜେପିର ଚିର ପ୍ରତିଦ୍ବନ୍ଦ୍ବୀ ରହି ଆସିଥିବା ରାଜେନ୍ଦ୍ର ଢୋଲକିଆଙ୍କ ଫୋଟୋ ଏବେ ବିଜେପି ପୋଷ୍ଟରରେ ଶୋଭା ପାଉଥିବା ଦେଖି ଅନେକ ଆଶ୍ଚର୍ଯ୍ୟ ହେଉଥିବେ ନିଶ୍ଚୟ ।