କେତେ ଭୟଙ୍କର ଡେଲ୍ଟା ଫୋର୍ସ ? ଭେନେଜୁଏଲା ରାଷ୍ଟ୍ରପତିଙ୍କୁ ବନ୍ଦୀ କରି ଚର୍ଚ୍ଚାରେ ଆମେରିକୀୟ ସେନାର ସ୍ପେଶାଲ୍ ୟୁନିଟ୍

ନୂଆଦିଲ୍ଲୀ: ଆମେରିକା ଭେନେଜୁଏଲାର ରାଜଧାନୀ କାରାକାସ ସମେତ ଅନେକ ଅଞ୍ଚଳରେ ଆକ୍ରମଣ କରିଛି। ଏହି ଆକ୍ରମଣ ମଧ୍ୟରେ, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭେନେଜୁଏଲାର ରାଷ୍ଟ୍ରପତି ନିକୋଲାସ ମାଦୁରୋ ଏବଂ ତାଙ୍କ ପତ୍ନୀଙ୍କୁ ବନ୍ଦୀ କରିଥିବା ଦାବି କରିଛନ୍ତି। ଶନିବାର ଟ୍ରମ୍ପ କହିଛନ୍ତି ଯେ, ତାଙ୍କ ସୈନ୍ୟମାନେ ମାଦୁରୋ ଏବଂ ତାଙ୍କ ପରିବାରକୁ ବନ୍ଧକ କରି ଦେଶ ବାହାରକୁ ନେଇଯାଇଛନ୍ତି। ଭେନେଜୁଏଲାରେ ମାଦୁରୋଙ୍କୁ ବନ୍ଦୀ କରି ଅନ୍ୟ ଦେଶକୁ ପଳାଇବା କାମ ଆମେରିକୀୟ ସେନାର ଏକ ସ୍ୱତନ୍ତ୍ର ୟୁନିଟ୍ କରିଛି । ଇଏ ସେହି ଡେଲ୍ଟା ଫୋର୍ସ । ଏହି ଫୋର୍ସ ପୂର୍ବରୁ ଆମେରିକା ପାଇଁ ବିଦେଶରେ ସ୍ୱତନ୍ତ୍ର ଅପରେସନ୍ କରେ। ଏହି ୟୁନିଟ୍ ଆମେରିକାର ଅନେକ ଶତ୍ରୁଙ୍କୁ ହତ୍ୟା କରିଛି କିମ୍ବା ବନ୍ଦୀ କରିଛି ।

ଭେନେଜୁଏଲାର ଉପରାଷ୍ଟ୍ରପତି ଡେଲସି ରୋଡ୍ରିଗଜ୍ କହିଛନ୍ତି ଯେ, ରାଷ୍ଟ୍ରପତି ମାଦୁରୋ ଏବଂ ତାଙ୍କ ପତ୍ନୀଙ୍କ ବିଷୟରେ କିଛି ଜାଣନ୍ତି ନାହିଁ। ସେମାନେ ଜୀବିତ ଅଛନ୍ତି କି ନାହିଁ ସେ ଜାଣିବାକୁ ଚାହୁଁଛନ୍ତି । ଆମେରିକୀୟ ଅଧିକାରୀଙ୍କ ଅନୁଯାୟୀ, ନିକୋଲାସ ମାଦୁରୋଙ୍କୁ ଆମେରିକୀୟ ସେନାର ଶୀର୍ଷ ସ୍ୱତନ୍ତ୍ର ମିଶନ୍ ୟୁନିଟ୍ ଡେଲ୍ଟା ଫୋର୍ସ ଦ୍ୱାରା ବନ୍ଦୀ କରାଯାଇଛି । ୨୦୧୯ ମସିହାରେ ଅଲ-ବାଗଦାଦିକୁ ହତ୍ୟା କରିବା ଲାଗି ହୋଇଥିବା ମିଶନ ପାଇଁ ମଧ୍ୟ ଡେଲ୍ଟା ଫୋର୍ସ ଚର୍ଚ୍ଚାରେ ଥିଲା।

ISISର ଅଲ-ବାଗଦାଦି ଦୀର୍ଘ ସମୟ ଧରି ଆମେରିକା ପାଇଁ ଚ୍ୟାଲେଞ୍ଜ ସୃଷ୍ଟି କରିଥିଲା। ଟ୍ରମ୍ପ ଡେଲ୍ଟା ଫୋର୍ସକୁ ପ୍ରଶଂସା କରି କହିଛନ୍ତି, ମାଦୁରୋଙ୍କୁ ବନ୍ଦୀ କରିବାର ଅପରେସନ ଅତି ଚମତ୍କାର । କେବଳ ଆମେରିକା ନୁହେଁ ବରଂ ବିଶ୍ୱର ସବୁଠାରୁ ଭୟଙ୍କର ସାମରିକ ୟୁନିଟ୍ ମଧ୍ୟରେ ଡେଲ୍ଟା ଫୋର୍ସ ଅନ୍ୟତମ । ଏହି ଆତଙ୍କବାଦ ବିରୋଧୀ ୟୁନିଟ୍ର ସରକାରୀ ନାମ ହେଉଛି ଫାଷ୍ଟ ସ୍ପେଶାଲ୍ ଫୋର୍ସ ଅପରେସନାଲ୍ ଡିଟାଚମେଣ୍ଟ-ଡେଲ୍ଟା (1st SFOD-D)। ସାଧାରଣ ଭାଷାରେ, ଏହାକୁ ଡେଲ୍ଟା ଫୋର୍ସ କୁହାଯାଏ।

ଡେଲ୍ଟା ଫୋର୍ସ ହେଉଛି ଆମେରିକୀୟ ସେନାର ଯୁଗ୍ମ ସ୍ୱତନ୍ତ୍ର ଅଭିଯାନ କମାଣ୍ଡ (JSOC) ଅଧୀନରେ ଏକ ଟାୟାର ଓ୍ବାନ ସ୍ୱତନ୍ତ୍ର ମିଶନ ୟୁନିଟ୍। ଏହି ୟୁନିଟ୍ ଏପରି ମିଶନଗୁଡ଼ିକୁ ପରିଚାଳନା କରେ, ଯାହା ସାଧାରଣ ଚର୍ଚ୍ଚାରୁ ଦୂରେଇ ରହେ । ଶତ୍ରୁ ଅଞ୍ଚଳରୁ ବନ୍ଧକମାନଙ୍କୁ ଉଦ୍ଧାର କରିବା ଏବଂ ଆମେରିକା ଦ୍ୱାରା ମନୋନୀତ ଆତଙ୍କବାଦୀଙ୍କୁ ଟ୍ରାକ୍ କରି ହତ୍ୟା କରିବା ଭଳି ମିଶନରେ ସାମିଲ ହୁଏ ଡେଲ୍ଟା ଫୋର୍ସ । ଏହି ଅପରେସନଗୁଡ଼ିକ ପ୍ରାୟତଃ ଏତେ ଗୁପ୍ତ ହୋଇଥାଏ ଯେ, ଆମେରିକୀୟ ସାଂସଦମାନେ ମଧ୍ୟ ଏଗୁଡ଼ିକ ବିଷୟରେ ଅଜ୍ଞ ଥାଆନ୍ତି।

ଆମେରିକା ସେନାର ଡେଲ୍ଟା ଫୋର୍ସ ୟୁନିଟ୍ ୧୯୭୦ ଦଶକର ଶେଷ ଭାଗରେ ତିଆରି ହୋଇଥିଲା । ବ୍ରିଟିଶ SASକୁ ଅନୁକରଣ କରି ଏହି ଫୋର୍ସ ତିଆରି କରିଥିଲା ଆମେରିକା । ଆମେରିକୀୟ ସେନାକୁ ଏକ ଉତ୍ସର୍ଗୀକୃତ ଆତଙ୍କବାଦ ବିରୋଧୀ ବାହିନୀ ଯୋଗାଇବା ଲକ୍ଷ୍ୟରେ ଡେଲ୍ଟା ଫୋର୍ସ ଆତ୍ମପ୍ରକାଶ କରିଥିଲା । ଏହି ଫୋର୍ସ ଶତ୍ରୁ ଦେଶରେ ପ୍ରବେଶ କରି ଶତ୍ରୁକୁ କବଜା କରିବାରେ ମାହିର ।

ସୂଚନାଯୋଗ୍ୟ, ଆବୁ ବକର ଅଲ-ବାଗଦାଦିକୁ ମୃତ୍ୟୁର ଦ୍ବାର ଦେଖାଇଥିଲା ଡେଲ୍ଟା ଫୋର୍ସ । ଏହା ସହ ୨୦୦୩ରେ ଡେଲ୍ଟା ଫୋର୍ସ ‘ଅପରେସନ୍ ରେଡ୍ ଡାଉନ୍’ ଅଧୀନରେ ଇରାକର ପୂର୍ବତନ ରାଷ୍ଟ୍ରପତି ସଦ୍ଦାମ ହୁସେନଙ୍କୁ କାବୁ କରିଥିଲା । ଏହି ଫୋର୍ସକୁ ଆହୁରି ଅନେକ ସଫଳ ଅପରେସନର ମଧ୍ୟ ଶ୍ରେୟ ଦିଆଯାଏ । ଡେଲ୍ଟା ଫୋର୍ସ ଆମେରିକା ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି କହିଲେ, ଭୁଲ ହେବ ନାହିଁ ।