ଭୟଙ୍କର ହେବ ଯୁଦ୍ଧ : ଇସ୍ରାଏଲକୁ ଟ୍ରମ୍ପ୍ ଦେବେ ୧୨ ହଜାର ବୋମା

ନ୍ୟୁୟର୍କ, ୦୮ /୦୩: ଅଧିକ ଉଗ୍ର ହେବାରେ ଲାଗିଛି ମଧ୍ୟପ୍ରାଚ୍ୟରେ ଲଢେଇ । କେହି କାହାରିକୁ ଛାଡିବାକୁ ନାରାଜ୍ । ଇସ୍ରାଏଲ ତେହେରାନ ଉପରେ ଘନ ଘନ ଆକ୍ରମଣ କରୁଛି । ବଡ ବଡ ପ୍ରତିଷ୍ଠାନ ଏବଂ ଜରୁରୀ କାର୍ଯ୍ୟାଳୟକୁ ଧ୍ୱଂସ କରି ଦେଉଛି । ଇସ୍ରାଏଲ ପଛରେ ଆମେରିକାର ସମର୍ଥନ ରହିଛି । ଉଭୟ ଦେଶ ଇରାନରେ ଧ୍ୱଂସଲୀଳା ଚଳାଇଛନ୍ତି । ଏହା ମଧ୍ୟରେ ଇସ୍ରାଏଲକୁ ବଡ ସାହାଯ୍ୟ କରିବାକୁ ଆମେରିକା ଘୋଷଣା କରିଛି ।

ରିପୋର୍ଟ ଅନୁସାରେ, ଇରାନ ବିରୋଧରେ ଯୁଦ୍ଧ ଲଢ଼ିବା ଲାଗି ଜରୁରିକାଳୀନ ଭିତ୍ତିରେ ଇସ୍ରାଏଲକୁ ୧୫୧.୮ ନିୟୁତ ଡଲାରର ୧୨ ହଜାର ଏରିୟଲ ବୋମା ଦେବ ଆମେରିକା । ବିନା କଂଗ୍ରେସର ସମୀକ୍ଷାରେ ଟ୍ରମ୍ପ ପ୍ରଶାସନ ଇସ୍ରାଏଲକୁ ଏହି ବୋମା ଯୋଗାଇଦେବ । ଆମେରିକାର ସ୍ୱରାଷ୍ଟ୍ର ବିଭାଗ ପକ୍ଷରୁ ଜାରି ଏକ ପ୍ରେସ୍ ବିବୃତ୍ତିରେ ଏକଥା କୁହାଯାଇଛି ।

ଏଥିରେ ଦର୍ଶାଯାଇଛି ଯେ ଇସ୍ରାଏଲକୁ ମୋଟ ୧୨ ହଜାର ବିଏଲ୍ ୧୧୦ଏ/ବି ବୋମା ବିକ୍ରି କରାଯିବ । ପ୍ରତ୍ୟେକ ବୋମାର ଓଜନ ୧ ହଜାର ପାଉଣ୍ଡ । ଆମେରିକାର ଜାତୀୟ ସ୍ୱାର୍ଥକୁ ଦୃଷ୍ଟିରେ ରଖି ତୁରନ୍ତ ବୋମା ବିକ୍ରି କରିବା ଲାଗି ପରରାଷ୍ଟ୍ର ସଚିବ ମାର୍କୋ ରୁବିଓ ପ୍ରସ୍ତାବ ଦେବା ପରେ ଟ୍ରମ୍ପ ପ୍ରଶାସନ ତାକୁ ଅନୁମୋଦନ କରିଛି । ଏହି ବୋମା ଫଳରେ ଇସ୍ରାଏଲ ଆକ୍ରମଣ କ୍ଷମତା ଆହୁରି ବଢ଼ିବ ଏବଂ ଏହାର ଭବିଷ୍ୟତରେ ଯୁଦ୍ଧାସ୍ତ୍ରର ଆବଶ୍ୟକତା ପୂରଣ ହୋଇପାରିବ । କୌଣସି ଦେଶକୁ ଯୁଦ୍ଧାସ୍ତ୍ର ବିକ୍ରି କରିବାକୁ ହେଲେ ଆମେରିକାକୁ କଂଗ୍ରେସର ଅନୁମୋଦନ ନେବାକୁ ହୋଇଥାଏ ।