ନୂଆପଡ଼ାରେ ସ୍ନେହାଙ୍ଗିନୀଙ୍କ ମାରାଥନ ପ୍ରଚାର, ଜିତାପଟ ନେଇ ଦେଖାଇଲେ ଦମ୍ଭୋକ୍ତି

ନୂଆପଡ଼ା ୨୪/୧୦: କାହାର ହେବ ନୂଆପଡା? କିଏ ମାରିବ ବାଜି ? ନୂଆପଡା ଲଢେଇରେ କିଏ ଜିତିବ ଗଡ଼? ଗାଁ ଗାଁରେ ତ୍ରିମୁଖୀ ପ୍ରତିଦ୍ୱନ୍ଦ୍ୱୀତାର ଝଲକ । ବିଜେଡି, କଂଗ୍ରେସ ଓ ବିଜେପି ପ୍ରାର୍ଥୀଙ୍କ ମଧ୍ୟରୁ କାହାର ହେବ ବିଜୟ ତାହାକୁ ନେଇ ଜାରି ରହିଛି ସସପେନ୍ସ । ସେପଟେ ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆଙ୍କୁ ଆଦିବାସୀ ସମାଜ ସମର୍ଥନ ଘୋଷଣା କରିବା ପରେ ବିଜୟର ଆଶା ଉଜ୍ବଳ ହୋଇଛି। ଗୋଣ୍ଡ ସମାଜ, ଶବର ସମାଜ, ଭୁଞ୍ଜିଆ ସମାଜ, ବରିହା ସମାଜ ପକ୍ଷରୁ ସ୍ନେହାଙ୍ଗିନୀଙ୍କୁ ଆଶୀର୍ବାଦ କରିବା ସହ ବିଜେଡିକୁ ସାମର୍ଥନ ଦେବା ପାଇଁ ନିଷ୍ପତ୍ତି ନେବା ପରେ ବିରୋଧୀ ଶିବିର ଛାନିଆ ହୋଇଛନ୍ତି । 

ମହିଳା, ଚାଷୀ ଆଦି ପ୍ରସଙ୍ଗରେ ବିଜେପିକୁ ଟାର୍ଗେଟ କରୁଛି ବିଜେଡି। ଉପନିର୍ବାଚନରେ ଜନତା ଦୃଢ଼ ଜବାବ ଦେବେ ବୋଲି କହିଛି ଦଳ। ୩୦୦ ୟୁନିଟ ମାଗଣା ବିଜୁଳି, ୩ ହଜାର ଟଙ୍କା ଭତ୍ତା, ସମସ୍ତ ମହିଳାଙ୍କୁ ସୁଭଦ୍ରା ଯୋଜନାରେ ସାମିଲ କରିବା କୁଆଡେ ଗଲା ବୋଲି ପ୍ରଶ୍ନ କଲେଣି ନୂଆପଡାବାସୀ । ବିଜେପି ଶାସନରେ ଥାଇ ମଧ୍ୟ ପ୍ରାର୍ଥୀ ପାଇଲେନି। ଓଲଟି ବିଜେଡି ପ୍ରାର୍ଥୀଙ୍କୁ ଚୋରି କରି ପ୍ରାର୍ଥୀ କଲେ। ଯାହାକୁ ନେଇ ନିଜ ଦଳରେ ଦେଖାଦେଲାଣି ଅସନ୍ତୋଷ। ଆସନ୍ତା ନଭେମ୍ବର ୧୧ ତାରିଖରେ ନୂଆପଡ଼ା ଉପନିର୍ବାଚନ। ୧୪ ତାରିଖ ଗଣତିରେ ସବୁ କିଛି ହେବ ସ୍ପଷ୍ଟ। 

ଏହାରି ଭିତରେ ଆଜି ପ୍ରଚାର କରିଛନ୍ତି ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆ । ନୂଆପଡ଼ାର ବିଭିନ୍ନ ପଂଚାୟତରେ ମାରାଥନ ପ୍ରଚାର କରିଛନ୍ତି। ନୂଆଗାଁ ପଞ୍ଚାୟତ, ଟିକିରିପଡା ପଂଚାୟତରେ ଘର ଘର ବୁଲି ଲୋକଙ୍କୁ ଭେଟି ଭୋଟ ମାଗିଛନ୍ତି । ନୂଆପଡ଼ାର ଉନ୍ନତି ପାଇଁ ବିଜେଡି ସରକାର ଅନେକ କାମ କରିଛନ୍ତି। ଆଫିବାସୀ ଦଲିତ ବର୍ଗ ସହ ସବୁବେଳେ ଠିଆ ହୋଇଛନ୍ତି। ପୂର୍ବ ପରି ପୁଣି ଥରେ ଉପନିର୍ବାଚନରେ ବିଜେଡି ସହ ରହିବେ ବୋଲି ଅନୁରୋଧ କରିଛନ୍ତି।