ଅବସର ନେବେ ରୋନାଲ୍ଡୋ, ୧୦୦୦ ଗୋଲ୍ ପରେ ଛାଡିବେ ଫୁଟବଲ

ନୂଆଦିଲ୍ଲୀ, ୦୬ |୧୧  :  କିଛିଦିନ ପରେ ଆଉ ଶୁଭିବନି ରୋନାଲ୍ଡୋ ରୋନାଲ୍ଡୋ ନାରା । ପଡିଆରେ ଦେଖିବାକୁ ମିଳିବନି ସେଲିବ୍ରେସନ୍ । କାରଣ ଖୁବ୍ ଶୀଘ୍ର ଫୁଟବଲକୁ ବାଏ ବାଏ କରିବେ ପର୍ତ୍ତୁଗାଲର ମହାନ ଫୁଟବଲର କ୍ରିଷ୍ଟିଆନୋ ରୋନାଲ୍ଡୋ । ଏନେଇ ସେ ସଙ୍କେତ ଦେଇଛନ୍ତି । କିନ୍ତୁ କେବେ ସେ ଶେଷ ମ୍ୟାଚ୍ ଖେଳିବେ ସେନେ କିଛି ସ୍ପଷ୍ଟ କରିନାହାଁନ୍ତି ।

ପିଅର୍ସ ମୋର୍ଗାନଙ୍କୁ ଦେଇଥିବା ସାକ୍ଷାତକାରରେ ରୋନାଲ୍ଡୋ କହିଛନ୍ତି ଯେ, ସେ ଏବେ ଅଲ୍ ନସାର ଫୁଟବଲ କ୍ଲବ୍ ପାଇଁ ଖେଳୁଛନ୍ତି । କିନ୍ତୁ ଖୁବ ଶୀଘ୍ର ସେ ଅବସର ନେବେ । ଏନେଇ ସେ ବହୁ ଦିନରୁ ଭାବିଛନ୍ତି । ତେବେ ଏହି ନିଷ୍ପତ୍ତି କଷ୍ଟଦାୟକ ହେବ । ବୋଧହୁଏ ତାଙ୍କ ଆଖିରୁ ଲୁହ ଝରି ଆସିବ । ସେ ଜଣେ ଖୋଲା ହୃଦୟର ବ୍ୟକ୍ତି ।

ସେ ଆହୁରି କହିଛନ୍ତି ଯେ, ଅବସର ପରେ ସେ ଭବିଷ୍ୟତରେ କଣ କରିବେ ତାହା ପାଇଁ ୨୫ ବର୍ଷରୁ ଚିନ୍ତା କରିଛନ୍ତି । ତେଣୁ ଖେଳିବା ଛାଡିଲେ ମଧ୍ୟ ତାଙ୍କର ସେମିତି କିଛି ଅସୁବିଧା ହେବ ନାହିଁ । ଅଧିକ ସମୟ ସେ ପରିବାର ସହ ବିତାଇବେ । ଏହାସହ ପଡିଆରେ ଗୋଲ୍ କରିବା ସମୟରେ ମିଳୁଥିବା ଖୁସିର ତୁଳନା ନାହିଁ । କିନ୍ତୁ ସବୁ ଜିନିଷର ଆରମ୍ଭ ଏବଂ ଶେଷ ରହିଛି ବୋଲି ସେ କହିଛନ୍ତି ।

ନିଜ ସନ୍ତାନଙ୍କୁ ନେଇ ରୋନାଲ୍ଡୋ କହିଛନ୍ତି ଯେ, ତାଙ୍କ ପୁଅ କମ୍ ବୟସରେ ଭଲ ଖେଳୁଛି । ଏହି ବୟସରେ ଅନେକ ଶିଶୁ ବହୁତ ଭୁଲ କାମ କରନ୍ତି । କିନ୍ତୁ ପୁଅ ଫୁଟବଲ ଉପରେ ଫୋକସ କରୁଛି । ସେ ମଧ୍ୟ ପିଲାଦିନେ କମ୍ ବୟସରେ ଏହା କରୁଥିଲେ ।

ସୂଚନାଯୋଗ୍ୟ, ପର୍ତ୍ତୁଗାଲ ସହ ବିଭିନ୍ନ ଲିଗ୍ ମୁକାବିଲା ଖେଳିଛନ୍ତି ରୋନାଲ୍ଡ । ଏହାସହ ୯୫୦ରୁ ଅଧିକ ଗୋଲ୍ କରିଛନ୍ତି । ତେବେ ତାଙ୍କ ଲକ୍ଷ୍ୟ  ୧୦୦୦ ଗୋଲ୍ ବୋଲି ଏହି ମହାନ ଫୁଟବଲ ତାରକା କହିଛନ୍ତି ।