ନୂଆପଡ଼ାରେ ବିଜେପିର ବଡ଼ ମିଶ୍ରଣ ପର୍ବ, ସାମିଲ୍ ହେଲେ ବରିଷ୍ଠ ନେତା ଭୁଜବଳ ଅଡ଼ବାଙ୍ଗ

ନୂଆପଡ଼ା: ନୂଆପଡାରେ ବଢୁଛି ବିଜେପି ବଳ। ପ୍ରତି ଦିନ ମିଶ୍ରଣ ପର୍ବରେ ଅନ୍ୟ ଦଳର ଶହ ଶହ କର୍ମୀ ବିଜେପିରେ ସାମିଲ ହେଉଛନ୍ତି।  ଯାହା କି ବିଜେପିକୁ ନୂଆପଡ଼ାରେ ଅଧିକ ଶକ୍ତିଶାଳୀ କରୁଛି। ଏହି କ୍ରମରେ ଆଜି ୨୪ ନିର୍ବାଚନର ସ୍ୱାଧୀନ ପ୍ରାର୍ଥୀ ଭୁଜବଳ ଅଡ଼ବାଙ୍ଗ ଆଜି ବିଜେପିରେ ସାମିଲ ହୋଇଛନ୍ତି। ମିଶ୍ରଣ ପର୍ବରେ ୧୦୦ରୁ ଅଧିକ ସମର୍ଥକଙ୍କ ସହ ବିଜେପିରେ ମିଶିଛନ୍ତି ଭୂଜବଳ ଆଡ଼ବାଙ୍ଗ।

ଭୁଜବଳ ଗତ ନିର୍ବାଚନରେ ୬୦୦  ଭୋଟ ପାଇଥିଲେ। ଚଳିତ ଉପନିର୍ବାଚନରେ ସେ ପ୍ରାର୍ଥୀ ପତ୍ର ଦାଖଲ କରିଥିଲେ ହେଲେ ଆଜି ତାହା ନାକଚ ହେବା ପରେ ବିଜେପିରେ ସାମିଲ ହୋଇଛନ୍ତି। ଏହାସହ ଆଡଭୋକେଟ୍ ଘାସିରାମ ବାଗ, ଅଶୋକ ଦେଓଗନ, ପୂର୍ଣ୍ଣ ଚନ୍ଦ୍ର ସାହୁ, ଗୋପାଳ ସାମନ୍ତ ବିଜେପିରେ ସାମିଲ ହୋଇଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନୀତି ଆଦର୍ଶରେ ଅନୁପ୍ରାଣିତ ହୋଇ ବିଭିନ୍ନ ରାଜନୈତିକ ଦଳରୁ ୧୦୦ ଜଣ କର୍ମୀ ବିଜେପିରେ ସାମିଲ ହୋଇଛନ୍ତି। ଏହି ମିଶ୍ରଣ ପର୍ବରେ ମନ୍ତ୍ରୀ ମୁକେଶ ମହାଲିଙ୍ଗ, ମନ୍ତ୍ରୀ ନିତ୍ୟାନନ୍ଦ ଗଣ୍ଡ, ସହ ପ୍ରଭାରୀ ଲତା ଉସେଣ୍ଡି ଉପସ୍ଥିତ ଥିଲେ।

ସୂଚନାଯୋଗ୍ୟ, ନୂଆପଡ଼ା ଉପନିର୍ବାଚନକୁ ନେଇ ରାଜ୍ୟ ରାଜନୀତି ଚରମରେ ରହିଛି। ବିଜେପି, ବିଜେଡି ଓ କଂଗ୍ରେସ ମଧ୍ୟରେ ବାକଯୁଦ୍ଧ ଜୋରଦାର ଚାଲିଛି। ତିନି ଦଳର ପ୍ରାର୍ଥୀ ପରସ୍ପରକୁ ଚେକ୍ ଦେବା ପାଇଁ କୌଣସି ସୁଯୋଗ ହାତଛଡ଼ା କରିବାକୁ ଚାହୁଁ ନାହାନ୍ତି। ବିଜେପି ପକ୍ଷରୁ ଦିବଙ୍ଗତ ନେତା ରାଜେନ୍ଦ୍ର ଢୋଲକିଆଙ୍କ ପୁଅ ଜୟ ଢୋଲକିଆ ପ୍ରାର୍ଥୀ ହୋଇଥିବା ବେଳେ ବିଜେଡି ପକ୍ଷରୁ ବରିଷ୍ଠ ନେତ୍ରୀ ସ୍ନେହାଙ୍ଗିନୀ ଛୁରିଆ ଓ କଂଗ୍ରେସ ପକ୍ଷରୁ ଘାସିରାମ ମାଝୀ ମଇଦାନରେ ଅଛନ୍ତି। ନୂଆପଡ଼ାରେ ନଭେମ୍ବର ୧୧ ତାରିଖ ଭୋଟିଂ ଥିବା ବେଳେ ନଭେମ୍ବର ୧୪ରେ ରହିଛି ଭୋଟ୍ ଗଣତି। ​​​​​​​