ଗୌହାଟି ରୁ କୋଲକାତା ରୁଟ୍‌ରେ ଚାଲିବ ଦେଶର ପ୍ରଥମ ବନ୍ଦେ ଭାରତ ସ୍ଲିପର୍ ଟ୍ରେନ୍: ପ୍ରଧାନମନ୍ତ୍ରୀ କରିବେ ଉଦ୍‌ଘାଟନ

ନୂଆଦିଲ୍ଲୀ: First Vande Bharat sleeper train, ଦେଶର ପ୍ରଥମ ବନ୍ଦେ ଭାରତ ସ୍ଲିପର୍ ଟ୍ରେନ୍ ଗୌହାଟି ରୁ କୋଲକାତା ରୁଟ୍‌ରେ ଚାଲିବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପତାକା ଦେଖାଇ ଏହାର ଶୁଭାରମ୍ଭ କରିବେ। ଗୁରୁବାର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଏହି ଘୋଷଣା କରିଛନ୍ତି। ଟ୍ରେନ୍ର ଏକାଧିକ ଥର ସଫଳ ପରୀକ୍ଷଣ ପରେ ରେଳମନ୍ତ୍ରୀ ଏହି ଘୋଷଣା କରିଛନ୍ତି। ରାତ୍ରୀକାଳୀନ ଯାତ୍ରା ପାଇଁ ବନ୍ଦେ ଭାରତ ସ୍ଲିପର୍ ଟ୍ରେନ୍ ଗ୍ରାହକଙ୍କୁ ଆରାମାଦାୟକ ଯାତ୍ରା ଦେବ।

ଏକ ସାମ୍ବାଦିକ ସମ୍ମିଳନୀରେ ସମ୍ବୋଧିତ କରି ବୈଷ୍ଣବ କହିଛନ୍ତି ଯେ ନୂଆ ସେବା କେବଳ ବ୍ୟବସାୟିକ ଯାତ୍ରୀଙ୍କୁ ଲାଭ ଦେବ ନାହିଁ, ଏହି ଦୁଇ ସହରକୁ ଯାତ୍ରା କରୁଥିବା ପରିବାର, ଛାତ୍ରଛାତ୍ରୀ ଏବଂ ପର୍ଯ୍ୟଟକଙ୍କୁ ଦ୍ରୁତ ଏବଂ ଅଧିକ ନିର୍ଭରଯୋଗ୍ୟ ରାତ୍ରୀ ଯାତ୍ରାର ଲାଭ ଦେବ।

ମନ୍ତ୍ରୀ କହିଛନ୍ତି “ବନ୍ଦେ ଭାରତ ସ୍ଲିପର ଟ୍ରେନର ପରୀକ୍ଷଣ ଏବଂ ପ୍ରମାଣପତ୍ର ସମାପ୍ତ ହୋଇଛି। ଏବଂ ଏହାର ପ୍ରଥମ ପ୍ରସ୍ତାବିତ ରୁଟ୍ ହେଉଛି ଗୌହାଟି-କୋଲକାତା। ପ୍ରଧାନମନ୍ତ୍ରୀ ମୋଦି ଆଗାମୀ ଦିନରେ ଏହି ରୁଟରେ ଉଦଘାଟନୀ ଯାତ୍ରାକୁ ପତାକା ଦେଖାଇ ଶୁଭାରମ୍ଭ କରିବେ। ଏହି ସଫଳତା ଏକ ପ୍ରମୁଖ ମାଇଲଖୁଣ୍ଟ, କାରଣ ବନ୍ଦେ ଭାରତ ସ୍ଲିପର ଯାତ୍ରୀମାନଙ୍କୁ ବିଶ୍ୱସ୍ତରୀୟ ସୁବିଧା, ବର୍ଦ୍ଧିତ ସୁରକ୍ଷା ଏବଂ ଦୀର୍ଘ ଦୂର ରାତ୍ରୀ ଯାତ୍ରା ପାଇଁ ଏକ ଆଧୁନିକ ଯାତ୍ରା ଅଭିଜ୍ଞତା ପ୍ରଦାନ କରିବ।”

ସ୍ୱଦେଶୀ ନିର୍ମିତ ବନ୍ଦେ ଭାରତ ସ୍ଲିପର ଟ୍ରେନର ଶେଷ ହାଇ-ସ୍ପିଡ୍ ପରୀକ୍ଷଣ ନିକଟରେ କୋଟା-ନାଗଦା ସେକ୍ସନରେ ହୋଇଛି। ପରୀକ୍ଷଣ ସମୟରେ, ଟ୍ରେନଟି ଘଣ୍ଟା ପ୍ରତି ୧୮୦ କିଲୋମିଟର ବେଗରେ ପହଞ୍ଚିଥିଲା। ଏହି ଟ୍ରେନରେ ମୋଟ ୧୬ଟି କୋଚ୍ ରହିବ, ଯେଉଁଥିରେ ୧୧ଟି ତିନି-ସ୍ତରୀୟ ଏସି କୋଚ୍, ୪ଟି ଦୁଇ-ସ୍ତରୀୟ ଏସି କୋଚ୍ ଏବଂ ୧ଟି ପ୍ରଥମ ଏସି କୋଚ୍ ରହିଛି। ଟ୍ରେନର ମୋଟ ଯାତ୍ରୀ କ୍ଷମତା ୮୨୩ ରହିବ। ସେଥିରେ ୩ଏସିର ୬୧୧ ଜଣ, ୨ଏସିର ୧୮୮ ଏବଂ ୧ଏସିର ୨୪ ଜଣ ଯାତ୍ରୀ କ୍ଷମତା ରହିବ।

ସ୍ଲିପର ଟ୍ରେନ୍ ପାଇଁ ଭଡା ଘୋଷଣା କରାଯାଇଛି। ୩ ଏସିର ଭଡା ପ୍ରାୟ ୨,୩୦୦ ଟଙ୍କା ହେବ, ଏଥିରେ ଯାତ୍ରୀଙ୍କ ପାଇଁ ଖାଦ୍ୟର ବ୍ୟବସ୍ଥା ରହିବ। ୨ଏସି ପାଇଁ ଭଡା ପ୍ରାୟ ୩,୦୦୦ ଟଙ୍କା ହେବ ବୋଲି କୁହାଯାଉଛି। ପ୍ରଥମ ଏସି ପାଇଁ ପ୍ରାୟ ୩,୬୦୦ ଟଙ୍କା ହେବ। ଏହି ଟ୍ରେନ୍ରେ ଯାତ୍ରୀମାନେ ଅନେକ ଅତ୍ୟାଧୁନିକ ଫିଚର୍ସର ସୁବିଧା ପାଇପାରିବେ। ପୂର୍ବରୁ ଯେମିତି ଟ୍ରେନ୍ଗୁଡ଼ିକ ଯେଉଁଭଳି ପ୍ରଭଳ ଥରୁଥିଲା। ଏଥିରେ ସେମିତି ହେବନି। ଯାତ୍ରୀମାନେ ଏକ ସ୍ମୁଥ୍ ଯାତ୍ରା କରିପାରିବେ।

ଏରଗୋନୋମିକାଲି ଡିଜାଇନ୍ ହୋଇଥିବା ବର୍ଥ, ଭେଷ୍ଟିବୁଲ୍ସ ସହିତ ଅଟୋମେଟିକ୍ ଡୋର, ଏବଂ ଉନ୍ନତ ସସପେନସନ୍ ଏବଂ ଟ୍ରେନ୍ ଗର୍ଜନ କମିବା ଯୋଗୁ ଯାତ୍ରା ଆରାମଦାୟକ ହେବ। ଟ୍ରେନର ଡିଜାଇନ୍ ବି ସେଭଳି କରାଯାଇଛି। ଅତିରିକ୍ତ ସୁରକ୍ଷା ପାଇଁ ବନ୍ଦେ ଭାରତ ସ୍ଲିପର ଟ୍ରେନ୍ରେ କବଚ ଆଣ୍ଟି-କଲିଜନ ସିଷ୍ଟମ ଏବଂ ଏକ ଜରୁରୀକାଳୀନ ଟକ୍-ବ୍ୟାକ୍ ସିଷ୍ଟମ ଲାଗିଛି। ଏଥିସହିତ, ସ୍ୱଚ୍ଛତା ପାଇଁ ଏଥିରେ ଟେକ୍ନୋଲୋଜୀର ବ୍ୟବହାର କରାଯାଇଛି। ଏବଂ ଡ୍ରାଇଭର କ୍ୟାବରେ ଉନ୍ନତ ନିୟନ୍ତ୍ରଣ ଏବଂ ସୁରକ୍ଷା ବ୍ୟବସ୍ଥା ରହିଛି। ଟ୍ରେନରେ ଏୟାରୋଡାଇନାମିକ୍ ବାହ୍ୟ ଏବଂ ସ୍ୱୟଂଚାଳିତ ବାହ୍ୟ ଯାତ୍ରୀ ଦ୍ୱାର ମଧ୍ୟ ରହିଛି।