Pahalgam: ଆତଙ୍କବାଦୀ ଆକ୍ରମଣର ୮ ମାସ ପରେ ପହଲଗାମରେ ଜମୁଛି ପର୍ଯ୍ୟଟକଙ୍କ ଭିଡ଼

ନୂଆଦିଲ୍ଲୀ: ଏପ୍ରିଲ୍ ୨୨ , ୨୦୨୫କୁ କେବେ ଭୁଲିହେବ ନାହିଁ । ଏହି ଦିନ ପାକିସ୍ତାନୀ ଆତଙ୍କବାଦୀମାନେ କାଶ୍ମୀରର ପହଲଗାମରେ ୨୬ ଜଣ ନିରୀହ ଲୋକଙ୍କୁ ନିର୍ମମ ଭାବରେ ହତ୍ୟା କରିଥିଲେ। ଏହି ଘଟଣା ପରେ ଭାରତ ଅପରେସନ୍ ସିନ୍ଦୂର ଆରମ୍ଭ କରିଥିଲା । ପାକିସ୍ତାନକୁ କଡ଼ା ଜବାବ ଦେଇଥିଲା । ସେହି ସମୟରେ, କାଶ୍ମୀରର ସ୍ଥାନୀୟ ଲୋକଙ୍କ ବିଷୟରେ ଅନେକ ପ୍ରଶ୍ନ ଉଠିଥିଲା। ଏହି ଦୁଃଖଦ ଘଟଣା ପରେ, ଜମ୍ମୁ କାଶ୍ମୀରରେ ପର୍ଯ୍ୟଟକଙ୍କ ସଂଖ୍ୟା ହ୍ରାସ ପାଇଥିଲା । କିନ୍ତୁ ୮ ମାସ ପରେ ଉପତ୍ୟକାରେ ପୁଣି ଥରେ ପର୍ଯ୍ୟଟକଙ୍କ ସଂଖ୍ୟା ବୃଦ୍ଧି ପାଇଛି । ପହଲଗାମରେ ପର୍ଯ୍ୟଟକଙ୍କ ଭିଡ଼ ଜମୁଛି ।

ପହଲଗାମରେ ପହଞ୍ଚିଥିବା ପର୍ଯ୍ୟଟକଙ୍କ ସାକ୍ଷାତକାର ନିଆଯାଇଛି। ଜଣେ ପର୍ଯ୍ୟଟକ କହିଛନ୍ତି ଯେ, କାଶ୍ମୀରର ଲୋକମାନେ ବହୁତ ଭଲ ମୁଁ ହରିୟାଣାର ହିସାରରୁ ଆସିଛି ଏବଂ ଏହା କାଶ୍ମୀରରେ ମୋର ପ୍ରଥମ ଅଭିଜ୍ଞତା । କାଶ୍ମୀର ପ୍ରକୃତରେ ସୁନ୍ଦର। ଏଠାରେ ସୁରକ୍ଷା ବ୍ୟବସ୍ଥା ଭଲ ଏବଂ ଆମେ ନୂତନ ବର୍ଷ ପାଳନ କରିବାକୁ ଏଠାକୁ ଆସିଛି ବୋଲି ସେ କହିଛନ୍ତି ।

ଆମେ କାଶ୍ମୀର ଲୋକଙ୍କଠାରୁ ପୂର୍ଣ୍ଣ ସମର୍ଥନ ପାଉଛୁ ବୋଲି ପର୍ଯ୍ୟଟକଜଣଙ୍କ କହିଛନ୍ତି । ଅନ୍ୟ ଜଣେ ପର୍ଯ୍ୟଟକ କହିଛନ୍ତି ଯେ, ପହଲଗାମ, ସୋନମାର୍ଗ ଏବଂ ଗୁଲମାର୍ଗରେ ପ୍ରବଳ ତୁଷାରପାତ ହୋଇଛି । କାଶ୍ମୀରର ଉପତ୍ୟକା ମନମୁଗ୍ଧକର। ବହୁ ଲୋକ ଦୂରଦୂରାନ୍ତରୁ ବୁଲିବାକୁ ଆସୁଛନ୍ତି ଏବଂ ଏଠାକାର ବ୍ୟବସ୍ଥା ଉତ୍କୃଷ୍ଟ।

ଆଉ ଜଣେ ପର୍ଯ୍ୟଟକ କହିଛନ୍ତି ଯେ, ଏହା ସେମାନଙ୍କର ପହଲଗାମକୁ ତୃତୀୟ ଗସ୍ତ । ପରିବେଶରେ ଉନ୍ନତି ଆସିଛି। ସେ ଆହୁରି ମଧ୍ୟ କହିଛନ୍ତି ଯେ, ସ୍ଥାନୀୟ ଲୋକମାନେ ବହୁତ ସମର୍ଥନ କରୁଛନ୍ତି । ସେମାନଙ୍କର ସୁନ୍ଦର ବ୍ୟବହାର ଆମକୁ ଆକୃଷ୍ଟ କରୁଛି । ନୂତନ ବର୍ଷ ଆସିବା ସହିତ, ଦେଶ ସାରା ପର୍ଯ୍ୟଟକମାନେ ତୁଷାରପାତ ଏବଂ ସୁନ୍ଦର ଉପତ୍ୟକାର ମଜା ନେବା ପାଇଁ କାଶ୍ମୀରକୁ ଆସୁଛନ୍ତି।

ପହଲଗାମ ଆକ୍ରମଣ ଜମ୍ମୁକାଶ୍ମୀରର ପର୍ଯ୍ୟଟନକୁ ଗୁରୁତର ପ୍ରଭାବିତ କରିଥିଲା। ପର୍ଯ୍ୟଟନ ହେଉଛି ଜମ୍ମୁକାଶ୍ମୀରର ପ୍ରାଥମିକ ବ୍ୟବସାୟ । ଦୋକାନଠାରୁ ହୋଟେଲ ବ୍ୟବସାୟ ସବୁକିଛି ପର୍ଯ୍ୟଟକଙ୍କ ଉପରେ ନିର୍ଭର କରେ । ଅଫ-ସିଜନରେ, ସ୍ଥାନୀୟ ଆୟ କମ୍ ଥାଏ । କିନ୍ତୁ ତୁଷାରପାତ ଉପତ୍ୟକା ଏବଂ ସ୍ଥାନୀୟ ବାସିନ୍ଦାଙ୍କ ମୁହଁରେ ଏକ ଅନନ୍ୟ ହସ ଆଣିଦିଏ ।