ମିଳିଲା ୩୫୦୦ ବର୍ଷ ତଳର ସଭ୍ୟତା : ସହରରେ ଥିଲା ବିରାଟ କାରଖାନା ଏବଂ ସଭାଗୃହ

ଆସ୍ତାନା, ୨୧|୧୧: ସାମ୍ନାକୁ ଆସିଲା ୩୫୦୦ ବର୍ଷ ତଳର ଇତିହାସ । ମାଟି ତଳୁ ମିଳିଲା ପୁରୁଣା ସଭ୍ୟତା । ପ୍ରତ୍ନତତ୍ତ୍ୱ ବିଭାଗ କାଜଖସ୍ତାନରେ ବହୁ ପ୍ରାଚୀନ ସଭ୍ୟତାକୁ ଆବିଷ୍କାର କରିଛି । ଯାହା ପୂର୍ବରୁ ୟୁରେସିଆନ ତୃଣଭୂମିର ଅନ୍ତର୍ଗତ ଥିଲା ।

ତେବେ ପ୍ରାଚୀନ ସଭ୍ୟତାକୁ ସେମିୟାର୍କା ସହରରେ ଠାବ କରାଯାଇଛି । ସେମିୟାର୍କା ସହରକୁ ସିଟି ଅଫ୍ ସେଭେନ୍ ରାଭାଇନ୍ ବା ୭ଟି କେନାଲର ସହର ବୋଲି କୁହାଯାଏ । ପ୍ରାଚୀନ ସମୟର ଏହା ଏକ ଉନ୍ନତ ସହରର ଆଖ୍ୟା ପାଇଥିଲା । ୟୁସିଏଲ ଏବଂ ଦୁରହାମ ବିଶ୍ବବିଦ୍ୟାଳୟର ବିଶେଷଜ୍ଞ ୧୪୦ ହେକ୍ଟର ଅଞ୍ଚଳରେ ଖନନ କରିଥିଲେ । ଯେଉଁଥିରେ କାଂସ୍ୟ ଯୁଗର ଅନେକ ସାମଗ୍ରୀ ଏବଂ ଉପକରଣ ମିଳିଥିଲା ।

ଜଣାପଡିଛି ଯେ, ସେମିୟାର୍କା ସହର ୧୬୦୦ ଖ୍ରୀଷ୍ଟପୂର୍ବରୁ ରହି ଆସିଛି । ଏଠାରେ କିଛି ଯାଯାବର ପ୍ରଥମେ ରହୁଥିଲେ । ସେମାନେ କୃଷିକାର୍ଯ୍ୟ କରି ବଞ୍ଚୁଥିଲେ । ପଶୁପାଳନ ସେଠାକାର ଲୋକଙ୍କ ମୁଖ୍ୟ ଜୀବିକା ଥିଲା । ସହରର ବିଭିନ୍ନ ସ୍ଥାନରେ ଅସ୍ଥାୟୀ ଘର କରି ବସବାସ କରିବା ସେତେବେଳର ଲୋକଙ୍କୁ ପସନ୍ଦ ଥିଲା । ସହରକୁ ଆଧୁନିକ ଢାଞ୍ଚାରେ ମଧ୍ୟ ଗଢାଯାଇଥିଲା ।

ଖନନ ବେଳେ ଜଣା ପଡିଥିଲା ଯେ, ଗୋଟିଏ ଘରେ ଏକାଧିକ କୋଠରୀ ରହିଥିଲା । ଯାହା ଆଜିକାଲିର ଆଧୁନିକ ଘର ସହ ସମାନ । ଘର ମଝିରେ ବାରଣ୍ଡା ଭିଳ ବଡ ସ୍ଥାନ ରହିଛି । ଯେଉଁଠି ସେମାନେ ଅନେକ ସାଂସ୍କୃତିକ କାର୍ଯ୍ୟକ୍ରମ କରୁଥିବା ଅନୁମାନ କରାଯାଉଛି । ଖାଲି ଏତିକି ନୁହେଁ ପ୍ରାଚୀନ ଲୋକେ ଏଠାରେ ଟିଣ ଏବଂ କଂସାରେ ବିଭିନ୍ନ ସାମଗ୍ରୀ ପ୍ରସ୍ତୁତ କରୁଥିଲେ । ଏଥିପାଇଁ କାରଖାନା ପ୍ରତିଷ୍ଠା ହୋଇଥିଲା ।

ମୁଖ୍ୟ ଅନୁସନ୍ଧାନକାରୀ ଡକ୍ଟର ମିଲଜାନା ରେଡିଭୋଜେବି କହିଛନ୍ତି ଯେ, ସେମିୟାର୍କ ପୃଥିବୀରେ ଆବିଷ୍କୃତ ହୋଇଥିବା ପ୍ରାଚୀନ ଆଧୁନିକ ସହର ମଧ୍ୟରୁ ଅନ୍ୟତମ । ଯାଯାବରମାନେ ଏଠାକୁ ଆସି ସ୍ଥାୟୀ ବାସିନ୍ଦା ପାଲଟିଥିଲେ । ବଡ ବଡ କଳକାରାଖାନା ସ୍ଥାପନା କରିବାର କୌଶଳ ସେମାନଙ୍କୁ ଜଣାଥିଲା । ଇରଟିସ୍ ନଦୀ ଅବବାହିକାରେ ଥିବାରୁ ଚାଷକାର୍ଯ୍ୟ ଦ୍ୱାରା ବାସିନ୍ଦାମାନେ ଶସ୍ୟ ଉତ୍ପାଦନ କରୁଥିଲେ ।

ସେ ଆହୁରି କହିଛନ୍ତି ଯେ, ବସବାସ କରୁଥିବା ଅଞ୍ଚଳରୁ ଅଳ୍ପଦୂରରେ କିଛି ବ୍ୟକ୍ତିଙ୍କ ଅବଶେଷ ମିଳିଛି । ସେଠାରେ ମୃତବ୍ୟକ୍ତିଙ୍କୁ କବର ଦିଆଯାଉଥିଲା । ୩୫୦୦ ବର୍ଷ ପୂର୍ବରୁ ସେମିୟାର୍କା ବାଣିଜ୍ୟିକ ପେଣ୍ଠସ୍ଥଳୀ ଥିଲା ବୋଲି ମଧ୍ୟ ଜଣାପଡିଛି । ଏତ ପ୍ରାଚୀନ ସହରର ଆବିଷ୍କାର ଆଗକୁ ପ୍ରତ୍ନତତ୍ତ୍ୱ କ୍ଷେତ୍ରରେ ନୂଆ ନୂଆ ସତ ସାମ୍ନାକୁ ଆଣିବ ବୋଲି କୁହାଯାଉଛି ।