ବାଂଲାଦେଶରେ ପାର୍ଟି ଗଢିଲେ ହିନ୍ଦୁ, ଲଢିବେ ନିର୍ବାଚନ, ଜିତି ପାରନ୍ତି ୪୦-୪୫ ଆସନ

ଢାକା ୨୭।୧୨: ବାଂଲାଦେଶରେ ହିନ୍ଦୁଙ୍କ ଉପରେ ହେଉଥିବା କ୍ରୁର ଅତ୍ୟାଚାର ମଧ୍ୟରେ ଗତ ଏପ୍ରିଲ ମାସରେ ପଞ୍ଜିକୃତ ବାଂଲାଦେଶ ମାଇନରିଟି ଜନତା ପାର୍ଟି (ବିଏମଜେପି) ପ୍ରଥମ ଥର ବାଂଲାଦେଶ ସାଧାରଣ ନିର୍ବାଚନ ଲଢିବାକୁ ପ୍ରସ୍ତୁତି କରୁଛି ଓ ଦେଶରେ ହିନ୍ଦୁ ଓ ଅନ୍ୟ ସଂଖ୍ୟା ଲଘୁଙ୍କ ଭୋଟ ହାସଲ କରିବାକୁ ଉଦ୍ୟମ କରିବ । ଜାତୀୟ ସଂସଦର ୩୦୦ ଆସନ ମଧ୍ୟରୁ ବିଏମଜେପି ୯୧ଟି ଆସନରେ ନିର୍ବାଚନ ଲଢିବାକୁ ଯୋଜନା କରିଥିବା ବେଳେ ଦଳ ୪୦ରୁ ୪୫ଟି ଆସନ ଜିତିବ ବୋଲି ସଭାପତି ସ୍ୱୀକୃତି ମଣ୍ଡଳ ଆଶାପୋଷଣ କରିଛନ୍ତି।

ମଣ୍ଡଳ କହିଛନ୍ତି ଯେ ଆମେ ସେହି ସବୁ ନିର୍ବାଚନ ମଣ୍ଡଳି ଉପରେ ଧ୍ୟାନ କେନ୍ଦ୍ରିତ କରିବୁ ଯେଉଁଠି ସଂଖ୍ୟା ଲଘୁ ବିଶେଷ କରି ହିନ୍ଦୁ ଭୋଟ ବ୍ୟାଙ୍କ ୨୦ରୁ ୬୦% ମଧ୍ୟରେ ରହିଛି। ଫେବୃଆରୀରେ ହେବାକୁ ଥିବା ସାଧାରଣ ନିର୍ବାଚନ ଲାଗି ସୋମବାର ପ୍ରାର୍ଥୀପତ୍ର ଦାଖଲର ଶେଷ ଦିନ। ଏଣୁ ପ୍ରାର୍ଥୀପତ୍ର କାମରେ ଲାଗିଥିବା ମଣ୍ଡଳ କହିଛନ୍ତି ଯେ ହିନ୍ଦୁ ମାନଙ୍କୁ ଭୋଟ ଦେବା ଲାଗି ବାହାରକୁ ଆଣିବା ନିମନ୍ତେ ପ୍ରଥମେ ସେମାନଙ୍କୁ ସୁରକ୍ଷିତ ଅନୁଭବ କରାଇବା ଦରକାର। ତେବେ ଦେଶରେ ମେଣ୍ଟ ଗଠନ ପାଇଁ କୌଣସି ମୁଖ୍ୟ ଧାରାର ପାର୍ଟି ତାହା ହୁଏତ ତାରିକ ରହମାନଙ୍କ ବିଏନପି ହେଉ ଅଥବା ଜମାତ-ଏ-ଇସ୍ଲାମୀ ସହାୟକ ସାବ୍ୟସ୍ତ ହୋଇ ପାରନ୍ତି ବୋଲି ମଣ୍ଡଳ କହିଛନ୍ତି।

ଏହି ପାର୍ଟିଙ୍କ ସହ ମେଣ୍ଟ କରାଯିବା ଯୋଗୁ ସଂଖ୍ୟା ଲଘୁ ପ୍ରତିଷୋଧ ଭୟ ବିନା ନିଜ ଘରୁ ଭୋଟ ଦେବାକୁ ଗୋଡ କାଢି ପାରନ୍ତି। ଆବାମୀ ଲିଗ୍ ଏବେ ଚର୍ଚ୍ଚାରୁ ବାହାରେ ରହିଛି। ଏଥିରେ ବିଏମଜେପି ଏବେ ଦେଶରେ ପୀଡ଼ିତ ହିନ୍ଦୁ ଓ ଅନ୍ୟ ସଂଖ୍ୟା ଲଘୁଙ୍କ ପାଇଁ ଏକମାତ୍ର ସ୍ୱର ହୋଇପାରେ। ମଣ୍ଡଳ କହିଛନ୍ତି ଯେ ପାର୍ଟିର ପ୍ରାର୍ଥୀ ତାଲିକା ଦିନେ ଦୁଇ ଦିନ ମଧ୍ୟରେ ଚୂଡ଼ାନ୍ତ ହୋଇଯିବ ଓ ଶନିବାର ସୁଦ୍ଧା ସବୁ ପ୍ରାର୍ଥୀପତ୍ର ଦାଖଲ ହୋଇଯିବ। ସେ କହିଛନ୍ତି ଯେ ବାଂଲାଦେଶକୁ ନେଇ ଭାରତର ଆଭିମୁଖ୍ୟ ବଦଳିବା ଦରକାର। ଏଥିରେ ଆବାମୀ ଲିଗକୁ ସମର୍ଥନ କରିବା ବଦଳେ କେବଳ ହିନ୍ଦୁଙ୍କ ସ୍ୱାର୍ଥକୁ ସମର୍ଥନ କରିବା ଦରକାର।

ସେ କହିଛନ୍ତି ଯେ ଯଦି ଭାରତ ଆବାମୀ ଲିଗ୍ ସମର୍ଥନରୁ ପଛକୁ ହଟେ ତେବେ ବାଂଲାଦେଶର ମୁଖ୍ୟ ଧାରର ପାର୍ଟିମାନେ ସତର୍କ ହୋଇଯିବେ ଓ ଏହା ଉପରେ ଧ୍ୟାନ ଦେବେ। ଭାରତ ଜାଣିବା ଦରକାର ଯେ ବାଂଲାଦେଶରେ ବିଏମଜେପି ହିନ୍ଦୁ ଓ ଅନ୍ୟ ସଂଖ୍ୟାଲଘୁଙ୍କ ଏକମାତ୍ର ସ୍ୱର। ସେ କହିଛନ୍ତି ଯେ ଆଭିମୁଖ୍ୟ ବଦଳାଇଲେ ଭାରତ ପ୍ରତି ବାଂଲାଦେଶ ମାନସିକତା ମଧ୍ୟ ବଦଳିବ। ସେ କହିଛନ୍ତି ଯେ ଆବାମୀ ଲିଗ୍ କେବଳ କ୍ଷମତା ହାସଲ କରିବା ପାଇଁ ଏ ପର୍ଯ୍ୟନ୍ତ ଭାରତକୁ ଉପଯୋଗ କରିଆସିଛି।