ୱାର୍ଲଡ ଚାମ୍ପିଅନ ରିଚା ଘୋଷ ହେଲେ ଡିଏସପି, ସିଏମ୍ ମମତା ବାନାର୍ଜୀ ଦେଲେ ନିଯୁକ୍ତି ପତ୍ର; 'ବଙ୍ଗ ଭୂଷଣ' ସମ୍ମାନରେ ସମ୍ମାନିତ

ନୂଆଦିଲ୍ଲୀ: ଭାରତୀୟ ମହିଳା କ୍ରିକେଟ୍ ଟିମର ଉଇକେଟ୍ କିପର ବ୍ୟାଟର ରିଚା ଘୋଷଙ୍କୁ ପଶ୍ଚିମବଙ୍ଗ ପୋଲିସରେ ଡିଏସପି ପଦରେ ନିଯୁକ୍ତ କରାଯାଇଛି । ରାଜ୍ୟର ମୁଖ୍ୟମନ୍ତ୍ରୀ ମମତା ବାନାର୍ଜୀ ତାଙ୍କୁ ଏହି ନିଯୁକ୍ତି ପତ୍ର କ୍ରିକେଟ୍ ଆସୋସିଏସନ ଅଫ୍ ବେଙ୍ଗଲର ସମ୍ମାନ ସମାରୋହରେ ପ୍ରଦାନ କରିଛନ୍ତି । ରିଚା ଘୋଷ ଭାରତୀୟ ମହିଳା ବିଶ୍ୱକପ ବିଜୟରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ ।

ପଶ୍ଚିମବଙ୍ଗ ସରକାର ରିଚା ଘୋଷଙ୍କୁ ବଙ୍ଗ ଭୂଷଣ ସମ୍ମାନରେ ବି ସମ୍ମାନିତ କରିଛନ୍ତି । ରାଜ୍ୟ ସରକାରଙ୍କ ପକ୍ଷରୁ ରିଚା ଘୋଷଙ୍କୁ ସୁନା ଚେନ୍ ପ୍ରଦାନ କରାଯାଇଛି । ସିଏବି ତାଙ୍କୁ ଏକ ସୁନା ବ୍ୟାଟ୍ ଏବଂ ଏକ ସୁନା ବଲ୍ ପ୍ରଦାନ କରିଥିଲା । ଏହା ସହିତ, ତାଙ୍କୁ ୩୪ ଲକ୍ଷ ଟଙ୍କା ନଗଦ ପୁରସ୍କାର ପ୍ରଦାନ କରାଯାଇଥିଲା । ରିଚା ଫାଇନାଲରେ ୩୪ ରନ୍ କରିଥିବାରୁ ତାଙ୍କୁ ଏହି ଅର୍ଥରାଶି ପ୍ରଦାନ କରାଯାଇଛି । 

ଭାରତୀୟ ଦଳ ଆଇସିସି ମହିଳା କ୍ରିକେଟ ବିଶ୍ୱକପ୍ ୨୦୨୫ର ଫାଇନାଲରେ ଦକ୍ଷିଣ ଆଫ୍ରିକାକୁ ୫୨ ରନରେ ପରାସ୍ତ କରିଥିଲା । ଭାରତ ପ୍ରଥମ ଥର ପାଇଁ ମହିଳା ବିଶ୍ୱକପ୍ ଜିତିଥିଲା । ଟାଇଟଲ୍ ମ୍ୟାଚ୍‌ରେ ରିଚା ଭାରତୀୟ ଦଳ ପାଇଁ ୩୪ ରନ କରିଥିଲେ, ଯାହା ଭାରତକୁ ୩୦୦ ପାଖାପାଖି ପହଞ୍ଚାଇବାରେ ସାହାଯ୍ୟ କରିଥିଲା । ୨୨ ବର୍ଷୀୟା ରିଚା ଘୋଷ ଭାରତୀୟ ମହିଳା ଦଳ ପାଇଁ ଦୁଇଟି ଟେଷ୍ଟ, ୫୧ ଦିନିକିଆ ଏବଂ ୬୭ ଟି-୨୦ ଅନ୍ତର୍ଜାତୀୟ ଖେଳିଛନ୍ତି । 

ରିଚା ଘୋଷ ମହିଳା ଦିନିକିଆରେ ୨୯.୩୫ ହାରରେ ୧୧୪୫ ରନ୍ କରିଛନ୍ତି । ମହିଳା ଦିନିକିଆରେ ସେ ସାତଟି ଅର୍ଦ୍ଧଶତକ ହାସଲ କରିଛନ୍ତି । ଟି-୨୦ ଆନ୍ତର୍ଜାତୀୟରେ, ସେ ୨୭.୩୫ ହାରରେ ୧୦୬୭ ରନ୍ ଏବଂ ଦୁଇଟି ଅର୍ଦ୍ଧଶତକ ହାସଲ କରିଛନ୍ତି ।