ତାଇଓ୍ବାନ ସହ ବିବାଦ ମଧ୍ୟରେ ଚୀନ୍‌ର ବଡ଼ ନିଷ୍ପତ୍ତି, ଜାପାନ ସି-ଫୁଡ୍‌ ଉପରେ ଲଗାଇଲା ରୋକ୍‌

ବେଜିଂ: ଚୀନ୍ ପୁଣିଥରେ ଜାପାନରୁ ଆସୁଥିବା ସମସ୍ତ ସି-ଫୁଡ୍ ବା ସାମୁଦ୍ରିକ ଖାଦ୍ୟ ଆମଦାନୀ ଉପରେ ରୋକ ଲଗାଇଛି । ଜାପାନ ପ୍ରଧାନମନ୍ତ୍ରୀ ସାନାଏ ତାକାଇଚି ତାଇୱାନ ସମ୍ପର୍କରେ ମନ୍ତବ୍ୟ ଦେବା ପରେ ଏହି ପଦକ୍ଷେପ ନେଇଛି ଚୀନ୍। ତାକାଇଚି ଜାପାନ ସଂସଦରେ କହିଥିଲେ ଯେ, ଯଦି ଚୀନ୍ ତାଇୱାନ ଉପରେ ଆକ୍ରମଣ କରେ, ତେବେ ଜାପାନ ଯୁଦ୍ଧରେ ଯୋଗ ଦେବାକୁ ବାଧ୍ୟ ହେବ । କାରଣ ଏହା ଜାପାନର ସୁରକ୍ଷା ପାଇଁ ବିପଦ ସୃଷ୍ଟି କରିବ ବୋଲି ସେ କହିଥିଲେ । ଜାପାନ ପ୍ରଧାନମନ୍ତ୍ରୀ ଏହି ମନ୍ତବ୍ୟକୁ ନେଇ ଚୀନ୍ ଅସନ୍ତୋଷ ପ୍ରକାଶ କରିଥିଲା ।

ଚୀନର ବୈଦେଶିକ ମନ୍ତ୍ରଣାଳୟ କହିଛି ଯେ, ବର୍ତ୍ତମାନ ଜାପାନୀ ସାମୁଦ୍ରିକ ଖାଦ୍ୟର କୌଣସି ବଜାର ନାହିଁ। କିଛି ମାସ ପୂର୍ବରୁ ଚୀନ୍ ୨୦୨୩ରେ ଲାଗୁ ହୋଇଥିବା ପୂର୍ବ ପ୍ରତିବନ୍ଧକକୁ ଆଂଶିକ ଭାବରେ ଉଠାଇ ଦେଇଥିଲା। ଜାପାନ ଫୁକୁସିମା ପରମାଣୁ କେନ୍ଦ୍ରରୁ ଦୂଷିତ ପାଣି ସମୁଦ୍ରରେ ଛାଡ଼ିବାକୁ ନିଷ୍ପତ୍ତି ନେବାରୁ ପ୍ରଥମ ପ୍ରତିବନ୍ଧକ ଲାଗୁ ହୋଇଥିଲା । ୨୦୨୩ ପୂର୍ବରୁ, ଚୀନ୍ ଏବଂ ହଂକଂ ମିଳିତ ଭାବରେ ଜାପାନର ମୋଟ ସାମୁଦ୍ରିକ ଖାଦ୍ୟ ରପ୍ତାନିର ପ୍ରାୟ ୨୦% କିଣୁଥିଲେ। ଚୀନ୍ କହିଛି ଯେ, ଜଳ ଉତ୍ସ ଏବଂ ଏହାର ସୁରକ୍ଷା ଉପରେ ଅଧିକ ନଜର ରଖିବା ଆବଶ୍ୟକ। କିନ୍ତୁ ଏହାକୁ ଜାପାନ ବିରୁଦ୍ଧରେ ଚୀନ୍ ଦ୍ୱାରା ଏକ ରାଜନୈତିକ ପ୍ରତିକ୍ରିୟା ଭାବରେ ଦେଖାଯାଉଛି।

ଚୀନ୍ ମୁଖପାତ୍ର ମାଓ ନିଙ୍ଗ୍ କହିଛନ୍ତି ଯେ, ଜାପାନ ପ୍ରତିଶ୍ରୁତି ଦେଇଥିବା ବୈଷୟିକ ଡକ୍ୟୁମେଣ୍ଟେସନ୍ ପ୍ରଦାନ କରିନାହିଁ। ତାଇୱାନ ଉପରେ ପ୍ରଧାନମନ୍ତ୍ରୀ ତାକାଇଚିଙ୍କ ବକ୍ତବ୍ୟ ଚୀନ୍ ଲୋକଙ୍କ ପାଇଁ ଅପମାନଜନକ ଏବଂ ଚୀନ୍ ଲୋକମାନେ ମଧ୍ୟ ଜାପାନୀ ସାମୁଦ୍ରିକ ଖାଦ୍ୟ କିଣିବାକୁ ଚାହାନ୍ତି ନାହିଁ। ସେପଟେ ଚୀନ୍ ଲଗାତାର ତାଇଓ୍ବାନ ଉପରେ ନିୟନ୍ତ୍ରଣ ଆଣିବାକୁ ଚେଷ୍ଟା କରୁଛି । ସୈନ୍ୟ ବଳ ପ୍ରୟୋଗ କରି ଚୀନ୍ ସହ ତାଇଓ୍ବାନକୁ ମିଶାଇ ଦେବାକୁ ଚାହୁଁଛି ଡ୍ରାଗନ । ଏହାକୁ ନେଇ ମଧ୍ୟ ବିଶ୍ବସ୍ତରରେ ପ୍ରତିକ୍ରିୟା ପ୍ରକାଶ ପାଇଛି । ଆମେରିକା ମଧ୍ୟ ଏଥିପାଇଁ ଚୀନକ ବିରୋଧ କରିଆସିଛି ।

ତାଇଓ୍ବାନକୁ ନେଇ ବିବାଦ ମଧ୍ୟରେ ଜାପାନ ପ୍ରଧାନମନ୍ତ୍ରୀଙ୍କ ମନ୍ତବ୍ୟ ଚୀନର ଟେନସନ ବଢ଼ାଇଛି । ନିଜର ପ୍ରତିରକ୍ଷା ନୀତିକୁ ନେଇ ତାକାଇଚି ଏଭଳି କିଛି ମନ୍ତବ୍ୟ ଦେଇଥିଲେ । ଚୀନ୍ ପଟୁ ସମ୍ଭାବ୍ୟ ଆକ୍ରମଣ କଥା କହିଥିଲେ ଜାପାନ ପ୍ରଧାନମନ୍ତ୍ରୀ । ଏହାକୁ ନେଇ ବେଜିଂ ଅସନ୍ତୋଷ ପ୍ରକାଶ କରିବା ସହ, ମନ୍ତବ୍ୟ ଫେରାଇ ନେବାକୁ ତାକାଇଚିଙ୍କୁ କହିଥିଲା । କିନ୍ତୁ ତାକାଇଚି ଏଭଳି କରିନଥିଲେ । ଉତ୍ତେଜନା ବଢ଼ିବାରୁ ଜାପାନ ନିଜର ଜଣେ ଉଚ୍ଚ ଅଧିକାରୀଙ୍କୁ ବେଜିଂ ପଠାଇଥିଲା । ଦୁଇ ଦେଶ ମଧ୍ୟରେ ସଂପର୍କରେ ସୁଧାର ଆଣିବାକୁ ଚେଷ୍ଟା କରିଥିଲା ଟୋକିଓ । କିନ୍ତୁ ଏଥିରେ କିଛି ଫଳ ମିଳିପାରିଲା ନାହିଁ ।

ଅନ୍ୟପକ୍ଷରେ, ସାମୁଦ୍ରିକ ଖାଦ୍ୟ ଆମଦାନୀ ବନ୍ଦ କରିବା ସହିତ, ଚୀନ୍ ଆହୁରି ଅନେକ ପଦକ୍ଷେପ ନେଇଛି। ବିବାଦୀୟ ସେନକାକୁ ଦ୍ୱୀପପୁଞ୍ଜ ନିକଟରେ ଚୀନ୍ ତଟରକ୍ଷୀ ଜାହାଜ ମୁତୟନ କରିଛି ଏବଂ ଜାପାନର ଦ୍ୱୀପ ୟୋନାଗୁନି ନିକଟରେ ସାମରିକ ଡ୍ରୋନ୍ ଉଡ଼ାଇଛି। ଚୀନ୍ ଜାପାନ ପାଇଁ ଏକ ଯାତ୍ରା ପରାମର୍ଶ ମଧ୍ୟ ଜାରି କରିଛି । ଫଳରେ ଜାପାନକୁ ପ୍ରାୟ ୫ ଲକ୍ଷ ଲୋକ ନିଜର ବିମାନ ଟକେଟ୍ କ୍ୟାନ୍ସଲ କରି ଦେଇଛନ୍ତି । ଜାପାନୀ ପର୍ଯ୍ୟଟନ ଏବଂ କମ୍ପାନୀଗୁଡ଼ିକର ସେୟାର ଦ୍ରୁତ ହ୍ରାସ ପାଇଛି। ଜାପାନୀ ଚଳଚ୍ଚିତ୍ର ଏବଂ ଅନେକ ସାଂସ୍କୃତିକ କାର୍ଯ୍ୟକ୍ରମ ମଧ୍ୟ ବାତିଲ କରାଯାଇଛି। ଜାତିସଂଘରେ ଚୀନର ପ୍ରତିନିଧି ଫୁ କଙ୍ଗ କହିଛନ୍ତି ଯେ, ତାକାଇଚିଙ୍କ ମନ୍ତବ୍ୟ ଯୋଗୁଁ ଜାପାନ ସୁରକ୍ଷା ପରିଷଦରେ ସ୍ଥାୟୀ ସଦସ୍ୟତା ପାଇଁ ଅଯୋଗ୍ୟ।