ଭୟଙ୍କର ଫ୍ରଡ୍‌: ଅଲ୍‌ ଇଣ୍ଡିଆ ପ୍ରେଗନାଣ୍ଟ ଜବ୍‌ - ପ୍ଲେ ବଏ ସର୍ଭିସ୍‌, ସାରା ଦେଶରେ ଶହ ଶହ ଶିକାର , କିନ୍ତୁ ସମ୍ମାନ ଡରରେ ଲୁଚାଇଛନ୍ତି ମୁହଁ

ନୂଆଦିଲ୍ଲୀ : ନିଃସନ୍ତାନ ସୁନ୍ଦରୀ ମହିଳାଙ୍କୁ ମାତୃତ ସୁଖ ଦେଇପାରିଲେ ମିଳିବ ଲକ୍ଷ ଲକ୍ଷ ଟଙ୍କା । ତାସହ ଚାକିରି ଆଉ କମ୍ ସୁଧରେ ବଡ ବ୍ୟାଙ୍କ୍ ଲୋନ୍ ବି କରାଇଦିଆଯିବ । ସେମିତି ଫାଇଦା ପ୍ଲେ ବଏ ସର୍ଭିସ୍ ଦେଇ ପାରିଲେ । ଏହା କହୁଛି ସୋସିଆଲ ମିଡିଆରେ ଥିବା ବିଜ୍ଞାପନ । ଏଥିରେ ପ୍ରଲୋଭିତ ଲୋକଟି କଣ ପାଏ  କେବଳ ଅନୁଭବ କରିପାରେ । ତାହା ଆନନ୍ଦ , ମହାଆନନ୍ଦ ବି ସଂପୂର୍ଣ୍ଣ ଅବସାଦ କିମ୍ବା ମନସ୍ତାପ ତାହା କେବଳ ସେ କହିବ । କିନ୍ତୁ ବିହାର ପୋଲିସର ଖୁଲାସା ଏକ ଭୟଙ୍କର ରାକେଟ୍କୁ ସାମ୍ନାକୁ ଆଣିଛି । ବିବିସି ରିପୋର୍ଟ ଅନୁଯାୟୀ ବିହାରରୁ ଆରମ୍ଭ  ଏହି ମହା ସାଇବର ଠକେଇ ସାରା ଦେଶରେ ଅନେକ ଲୋକଙ୍କୁ ଫସେଇଛି । କୋଟି କୋଟି ଟଙ୍କାର ଠକେଇରେ କିନ୍ତୁ ପୋଲିସ ଏବେ ଅଭିଯୁକ୍ତଙ୍କ ଅପେକ୍ଷା ପୀଡିତଙ୍କୁ ବେଶି ଖୋଜୁଛି । କାରଣ ଅଭିଯୋଗ କରିବାକୁ କେହି ଆଗେଇ ଆସିନାହାନ୍ତି । ପୋଲିସ ଚାହୁଁଛି ଠକେଇର ପରିମାଣ କେତେ ଆଉ ଠକାମିର ଶିକାର କେତେ ଜଣ, ଏହାର ଆକଳନ ଅଧିକ ଗୁରୁତ୍ବପୂର୍ଣ୍ଣ ।

ବିହାରର ନୱାଡା ଜିଲ୍ଲାରେ ପୋଲିସ ଏପରି ଏକ ଗ୍ୟାଙ୍ଗର କାରନାମା ଧରିଛି । ସନ୍ତାନ ନଥିବା ମହିଳାଙ୍କୁ ଶାରିରୀକ ସୁଖ ଦେଇ ଗର୍ଭବତୀ କରିପାରିଲେ ପାରିଶ୍ରମିକରେ ମିଳିବ ଲକ୍ଷ ଲକ୍ଷ ଟଙ୍କା । ଅତି କମରେ ତାହା ୧୦ ଲକ୍ଷ ଟଙ୍କା । ଏହି ଅଫରରେ ସାରା ଦେଶରେ ଅନେକ ଫସିଛନ୍ତି । ଆଉ ଠକେଇରେ ପଡିଥିବା ବୁଝିବା ବେଳକୁ କିଛି ଟଙ୍କା ହରେଇ ସାରିଥାନ୍ତି ଏପରି ଲୋକମାନେ । ବିବିସିର ଏକ ରିପୋର୍ଟ ଅନୁଯାୟୀ ସାରା ଦେଶରେ ଏପରି ଠକାମିର ଶିକାର ହୋଇଛନ୍ତି ଶହ ଶହ ପୁରୁଷ ।

କିପରି ଚାଲିଥିଲା ରାକେଟ୍

ସୋସିଆଲ ମିଡିଆରେ ଆକର୍ଷଣୀୟ ବିଜ୍ଞାପନ ଦେଇ ଏହି ରାକେଟ ଚାଲିଥିଲା । “ଅଲ ଇଣ୍ଡିଆ ପ୍ରେଗନାଣ୍ଟ ଜବ୍ “ ନାମରେ ଆସୁଥିଲା ଏହି ବିଜ୍ଞାପନ । ତାହା ବେଶ୍ ହାଇଲାଇଟ୍ ହୋଇ ବା ସ୍ତ୍ରଲ କଲେ ବେଶ୍ ସ୍ପଷ୍ଟ ଭାବେ ଆସୁଥିଲା । ସୋସିଆଲ ମିଡିଆର କିଛି ଅଧିକ ୟୁଜର ଥିବା ପ୍ଲାଟଫର୍ମ ରେ ଏହି ବିଜ୍ଞାପନ ଆକର୍ଷଣୀୟ ଢଙ୍ଗରେ ଉପସ୍ଥାପିତ ହେଉଥିଲା । ଅର୍ଥ ବଦଲରେ ନିଃସନ୍ତାନ ମହିଳାଙ୍କ ସହ ସମ୍ଭୋଗ ଏବଂ ସେମାନଙ୍କୁ ଗର୍ଭତୀ କରିବାର ସର୍ତ୍ତ । ଏହା ସହ ଚାକିରି ଆଉ ଋଣର ଲୋଭ ଦେଉଥିଲା ସେହି ବିଜ୍ଞାପନ । କିନ୍ତୁ ସେସବୁ ଥିଲା ଫେକ୍ ପ୍ରତିଶୃତି । କିନ୍ତୁ ଏପରି ସର୍ତ୍ତ ଆଉ ସୁଯୋଗର ସହଜରେ ଫସୁଥିଲେ ଅନେକ ବୋକା, ଭୋଲାଭାଲା ପୁରୁଷ । ଆଉ ସେଥିରେ ସେହି ଫେକ୍ ସାଇବର ଲୁଟେରାର ଲକ୍ଷ୍ୟ ସାଧନ ହେଉଥିଲା । ବିଜ୍ଞାପନରେ ବିଶ୍ବାସ କରି ସେହି ଲିଙ୍କରେ କ୍ଲିକ୍ କରି ଯୋଗାଯୋଗ କରୁଥିବା ଲୋକଙ୍କୁ ରେଜିଷ୍ଟ୍ରେସନ ଫି , ହୋଟେଲ ଭଡା ଆଦି ପାଇଁ କିଛି ଅର୍ଥ ଦେବାକୁ କୁହାଯାଉଥିଲା । ଆଉ ସୁନ୍ଦରୀ ମହିଳା, ମୋଟା ଅଙ୍କର ଅର୍ଥ, ଚାକିରି ଲୋଭରେ ଥିବା ଲୋକେ ସାଙ୍ଗେ ସାଙ୍ଗେ ବିଜ୍ଞାପନ ଦାତାଙ୍କ କଥାରେ ରାଜି ହୋଇଯାଉଥିଲେ ।

ତେବେ ଗ୍ରାହକଙ୍କୁ ପ୍ରଭାବିତ କରିବାକୁ ସାଇବର ଠକ କିଛି ମଡେଲଙ୍କ ଫଟୋ, ହୋଟେଲ ଆଉ ମିଛ ଲୋକେସନ ଇତ୍ୟାଦି ବି ପଠାଉଥିଲା । ଏଥିରେ ବିଶ୍ବାସ କରି ଗ୍ରାହକଟି କିଛି ଟଙ୍କା ଡିପୋଜିଟ କରି ଦେବା ପରେ ହିଁ ଖେଳ ଶେଷ । ନା ମିଳୁଥିଲେ ସୁନ୍ଦରୀ ନିଃସନ୍ତାନ ମହିଳା, ନା ଚାକିରି , ନା ଟଙ୍କା । ବିଜ୍ଞାପନ ଦାତା ଦେଇଥିବା କିଛି ବି ପ୍ରତିଶୃତି ପୂରଣ ହୋଇ ପାରୁନଥିଲା । ତାପରେ ଯୋଗାଯୋଗ କଲେ ବି ନଥିଲା ଫାଇଦା । ସମ୍ମାନହାନୀ ଭୟରେ ବିଚରା ଗ୍ରହକଟି ରହୁଥିଲା ଚୁପ୍ । ଏ ସବୁର ପର୍ଦ୍ଦାଫାସ କରିଛି ନୱାଡା ସାଇବର ସେଲ୍ ପୋଲିସ ।

ପୋଲିସର ଆକ୍ସନ

ଏହି ଘଟଣାରେ ପୋଲିସ ୮ ଜଣଙ୍କୁ ଗିରଫ କରିଛି । ସେମାନଙ୍କ ଠାରୁ ଏହି ସାଇବର ଫ୍ରଡ ରାକେଟ ଚଳାଇବା ଲାଗି ବ୍ୟବହୃତ ୯ ଟି ମୋବାଇଲ ଫୋନ, ଏକ ପ୍ରିଣ୍ଟର ଜବତ ହୋଇଛି । ପୋଲିସ ଅଧିକାରୀଙ୍କ ସୂଚନାରୁ ଜଣାଯାଇଛି ଯେ, ଆହୁରି ୧୮ ଅଭିଯୁକ୍ତଙ୍କୁ ଖୋଜା ଚାଲିଛି । ତେବେ ସବୁଠୁ ଗୁରୁତ୍ବପୂର୍ଣ୍ଣ ହେଲା , ଏହି ସାଇବର ଫ୍ରଡ୍ରେ ଅଭିଯୁକ୍ତଙ୍କ ଅପେକ୍ଷା ପୀଡିତଙ୍କୁ ଅଧିକ ତଲାସ କରୁଛି ପୋଲିସ । କାରଣ ସେମାନେ ଅଭିଯୋଗ କରୁନାହାନ୍ତି । କିନ୍ତୁ ଅଭିଯୁକ୍ତଙ୍କ ସଂଖ୍ୟା, ସେମାନଙ୍କ ରାକେଟ୍‌ର ଚେର ସହ ଠେକେଇ ପରିମାଣ ଜାଣିବା ଜରୁରି । ଏଥିଲାଗି ପୀଡିତଙ୍କୁ ଖୋଜୁଛି ପୋଲିସ । କିନ୍ତୁ ସେମାନେ ସମ୍ମାନ ଭୟରେ ନୀରବ ଥିବା ପୋଲିସ କହିଛି ।

ଆହୁରି ଠକେଇ ତରିକା

କେବଳ ଅଲ ଇଣ୍ଡିଆ ପ୍ରେଗନାଣ୍ଟ ଜବ୍ ନୁହେଁ, ଏକାଧିକ ଶୀର୍ଷକରେ ବିଜ୍ଞାପନ ଦେଇ ଲାକଙ୍କୁ ଭୂଆଁ ବୁଲେଇ ଠକୁଥିଲେ ଏହି ରାକେଟ୍ । ପ୍ଲେ ବଏ ସର୍ଭିସ୍ , ଚିପର ଲୋନ୍ ସର୍ଭିସ , ଧନୀ ଫାଇନାନ୍ସ , ଏସବିଆଇ ଚିପ୍ ଲୋନ୍ ଇତ୍ୟାଦି ଶୀର୍ଷକ ଦେଇ ସରଳ , ବୋକା ଲୋକଙ୍କୁ ଟାର୍ଗେଟ କରୁଥିଲେ ଏହି ଗ୍ୟାଙ୍ଗ୍ । ତେବେ ସୁବିଧା ଦେବା ଆଗରୁ ବା ପ୍ରତିଶୃତି ପାଳନ ଆଗରୁ ରେଜିଷ୍ଟ୍ରେସନ , ପ୍ରୋସେସିଂ କଷ୍ଟ ଭଳି ନାମରେ ଆଗୁଆ କିଛି ଟଙ୍କା ନେଇ ଯାଉଥିଲେ । ତାପରେ ଫ୍ରଡ୍ ଫେରାର୍ । ଆଉ ଏପଟେ ଠକାମିରେ ଫସିଥିବା ବୁଝିବା ବେଳକୁ ପୀଡିତ ଜଣକ ଠକେଇର ଶିକାର ହୋଇସାରିଥାନ୍ତି । ପୋଲିସରେ ଅଭିଯୋଗ କରିବାକୁ ବି ଭୟ । ବିହାରର ନୱାଡା ପୋଲିସ ଏବେ ଖୋଜୁଛି ଏହି ଫ୍ରଡଷ୍ଟାରମାନଙ୍କ ଚେର ।