କଟକରେ ପ୍ରମେୟ ‘ଗୃହଲକ୍ଷ୍ମୀ' କାର୍ଯ୍ୟକ୍ରମ ଆୟୋଜିତ

କଟକ: କଟକରେ ଦୈନିକ ଖବରକାଗଜ ପ୍ରମେୟର 'ଗୃହଲକ୍ଷ୍ମୀ' କାର୍ଯ୍ୟକ୍ରମ ଆୟୋଜିତ ହୋଇଯାଇଛି। ବିତରକମାନଙ୍କ ପରିବାର ସଦସ୍ୟଙ୍କୁ ନେଇ ଆୟୋଜିତ ଏହି କାର୍ଯ୍ୟକ୍ରମରେ ସ୍ମିତାଞ୍ଜଳି ସାହୁ ଚଳିତ ବର୍ଷର ଗୃହଲକ୍ଷ୍ମୀ ମୁକୁଟ ହାସଲ କରିଛନ୍ତି। ଏହି ଅବସରରେ ପ୍ରମେୟ ନ୍ୟୁଜ ସେଭେନ ଗ୍ରୁପ ଏଡିଟର ଗୋପାଳକୃଷ୍ଣ ମହାପାତ୍ର କହିଛନ୍ତି,ବିତରକ ଓ ସେମାନଙ୍କ ପରିବାର ଭିତରେ ପ୍ରମେୟ ପରିବାର ପ୍ରତି ଏକ ଆପଣାପଣ ଆଣିବା ଓ ସେମାନଙ୍କ ପରିବାରର ମହିଳାମାନଙ୍କର ପ୍ରତିଭାକୁ ସମ୍ମାନ ଦେବା ପାଇଁ ରାଜ୍ୟର ବିଭିନ୍ନ ସହରରେ ଏହି ପ୍ରୟାସ କରାଯାଉଛି।

ସୂଚନାଯୋଗ୍ୟ, ରବିବାର କଟକ ସାରଳା ଭବନରେ ଆୟୋଜିତ ହୋଇଥିବା କାର୍ଯ୍ୟକ୍ରମରେ ମହିଳାମାନଙ୍କ ମଧ୍ୟରେ ଶଙ୍ଖ ଧ୍ୱନି ପ୍ରତିଯୋଗିତା, ଝୋଟି, ମୁରୁଜ ଆଦି ପ୍ରତିଯୋଗିତାର ଆୟୋଜିତ ହୋଇଥିଲା। ତେବେ ଝୋଟି, ମୁରୁଜ ପ୍ରତିଯୋଗିତାରେ ଭାଗ ନେଇଥିବା ୯୫ ଜଣଙ୍କ ମଧ୍ୟରୁ ତିନି ଜଣଙ୍କୁ ପୁରସ୍କୃତ କରାଯାଇଥିଲା। ସେହିପରି ଶଙ୍ଖ ଧ୍ୱନି ପ୍ରତିଯୋଗିତାରେ ପ୍ରତିଯୋଗିତାରେ ୨୩ଜଣ ମହିଳା ଭାଗ ନେଇଥିଲେ। ସେମାନଙ୍କ ମଧ୍ୟରୁ ତିନି ଜଣ ଶ୍ରେଷ୍ଠ ପ୍ରତିଯୋଗୀଙ୍କୁ ଅର୍ଥ ପୁରସ୍କାର ସହ ଉତ୍ତରୀୟ ଦେଇ ସମ୍ବର୍ଦ୍ଧିତ କରାଯାଇଥିଲା। ଉଭୟ ମୁରୁଜ ଓ ଶଙ୍ଖ ଧ୍ୱନି ପ୍ରତିଯୋଗୀତରେ କୃତକାର୍ଯ୍ୟ ୬ ଜଣ ମହିଳାଙ୍କ ମଧ୍ୟରେ ଏକ ଲିଖିତ ପରୀକ୍ଷା ଜରିଆରେ ଚଳିତ ବର୍ଷର ଗୃହଲକ୍ଷ୍ମୀ ଚୟନ କରାଯାଇଥିଲା। ଏହି ଲିଖିତ ପରୀକ୍ଷାରେ ସର୍ବାଧିକ ନମ୍ବର ରଖି ସେଲ୍ଟର ଛକର ସ୍ମିତାଞ୍ଜଳି ସାହୁ ଚଳିତ ବର୍ଷର ଗୃହଲକ୍ଷ୍ମୀ ମୁକୁଟ ହାସଲ କରିଛନ୍ତି।

ବିତରକମାନଙ୍କୁ ଉତ୍ସାହିତ କରିବାକୁ ରାଜ୍ୟର ବିଭିନ୍ନ ସହରରେ ପ୍ରମେୟ ଖବରକାଗଜ ଏହି ଗୃହଲକ୍ଷ୍ମୀ ପ୍ରତିଯୋଗିତା ଆୟୋଜନ କରି ଆସୁଛି। ଏହା ସହ ବିତରକ ମାନଙ୍କ ପରିବାରର ମହିଳା ମାନଙ୍କ ମଧ୍ୟରେ ଥିବା ପ୍ରତିଭାକୁ ସମ୍ମାନ ଓ ସ୍ବୀକୃତି ଦେବା ପାଇଁ ପ୍ରମେୟ ପରିବାର ଏଭଳି କାର୍ଯ୍ୟକ୍ରମ ହାତକୁ ନେଇଛି ବୋଲି ପ୍ରମେୟ ଓ ନ୍ୟୁଜ ସେଭେନ ଗ୍ରୁପ ଏଡିଟର ଗୋପାଳକୃଷ୍ଣ ମହାପାତ୍ର କହିଛନ୍ତି।

କାର୍ଯ୍ୟକ୍ରମରେ ପ୍ରମେୟ କଟକ ଶାଖାର ଡିଜିଏମ ମାନସ ପଣ୍ଡାଙ୍କ ସହ ପ୍ରମେୟ ଓ ନ୍ୟୁଜ ସେଭେନ ପରିବାର ଯୋଗ ଦେଇଥିଲେ। କାର୍ଯ୍ୟକ୍ରମରେ ବାରବାଟୀ କଟକ ବିଧାୟିକା ସୋଫିଆ ଫିର୍ଦ୍ଦୋଶ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ।