Questioning Humanity : ଆମକୁ କାହିଁକି ମାରିଲ , ଆମର ଭୁଲ୍ କ'ଣ ? କାଳି ପଚାରୁଛି ପ୍ରଶ୍ନ... ଏଥର ଉତ୍ତର ଦିଅନ୍ତୁ

ଭୁବନେଶ୍ୱର:  ସେ ଭାରି ସୁନ୍ଦରିଆ... ଚାହାଣୀ ଯେମିତି ସ୍ୱଭାବ ବି ସେମିତି... ସେ ଭାରି ଶାନ୍ତ ଓ ନମ୍ର... ନାଁ ତାର କାଳି...ଏୟାରପୋର୍ଟ ନିକଟ ଖେଳପଡ଼ିଆରେ ଥିଲା ତା’ ଦୁନିଆ । ୮ ବର୍ଷ ଧରି ବିମାନବନ୍ଦର କାର୍ଗୋ ଗେଟ୍, ପାଣିପାଗ ଅଫିସ, ନବୀନ ନିବାସ ପାଖରେ ବୁଲୁଥାଏ ସେ । ଆଦୌ ଚିଡଚିଡ଼ା ପ୍ରକୃତିର ନଥିଲା । ତା ଜୀବନ କାଳରେ ବି କାହାରିକୁ ଆଘାତ ଦେଇନି, ଡରେଇନି । ସେଥିପାଇଁ ତ ଆଖ ପାଖରେ କାଳି ସଭିଁଙ୍କର ଗେହ୍ଲା। କାଳିର କାହାଣୀରେ ଟ୍ୱିଷ୍ଟ ଆସିଲା। ଦେଢ଼ ମାସ ତଳେ ୪ଟି ଛୁଆକୁ ଜନ୍ମ ଦେଇଥିଲା ‘କାଳି’ । ତା’ପରଠୁ ଖୁସି କହିଲେ ନ ସରେ । ଡଉଲ ଡାଉଲ ଛୁଆଙ୍କୁ ସାଙ୍ଗରେ ଧରି ଘୁରି ବୁଲୁଥିଲା। ଏଣେତେଣେ ବୁଲି ନିଜେ ଖାଉଥିଲା, ଛୁଆଙ୍କ ପାଇଁ ବି ଆହାର ଖୋଜି ଆଣୁଥିଲା । କିନ୍ତୁ ହଠାତ୍ ଦିନେ ଉଭାନ ହୋଇଗଲା କାଳି । ୪ଟି ଛୁଆ ବି ଦେଖିବାକୁ ମିଳିଲେନି । ସପ୍ତାହେ ବିତିଗ ଲା, ମା’ ଛୁଆ କାହାରି ପତ୍ତା ମିଳିଲାନି । ହେଲେ ୧୭ ତାରିଖରେ ୪ଟି ଛୁଆଙ୍କ ମୃତଦେହ ମିଳିଲା ଡ୍ରେନ୍ରୁ। ଆଉ ତାର ଠିକ୍ ୨ଦିନ ପରେ ଏକ ଜରି ଅଖା ଭିତରୁ ମିଳିଲା କାଳିର ମୃତଦେହ । ଅର୍ଥାତ୍ ନିଖୋଜ ହେବାର 15 ଦିନ ପରେ ମିଳିଥିଲା ମୃତଦେହ। ତାଙ୍କୁ କେହି ଦୃର୍ବୃତ୍ତ ମାରି ଦେଇଥିଲା। ତାପରେ ଅଖାରେ ପୂରାଇ ବାନ୍ଧି ଦେଇଥିଲା, ଏମିତି ଅଭିଯୋଗ ହେଉଛି। ଏ ଘଟଣା ଯେତିକି ଅମାନୁଷିକ... ସେତିକି ହୃଦୟ ବିଦାରକ ।

ଘଟଣା ଡିସେମ୍ବର ପ୍ରଥମ ସପ୍ତାହର। କାଳି କୁଆଡ଼େ ନିଖୋଜ ହୋଇଗଲା। ଛୁଆ ୪ଟିଙ୍କର ବି ଦେଖା ମିଳିଲାନି । କାଳିକୁ ଖାଇବାକୁ ଦେଉଥିବା ପଶୁ ପ୍ରେମୀ ଶାନ୍ତିଲତା ସେଠୀ, ଅଙ୍କିତା ସୁବୁଦ୍ଧିଙ୍କ କହିବା ମୁତାବକ, କାଳି ବହୁତ ଶାନ୍ତ ସ୍ୱଭାବର । ଏୟାରପୋର୍ଟ ବାହାରେ ଥିବା ଏହି ଖେଳ ପଡି଼ଆରେ କାଳି ସହ ଅନ୍ୟ ୬ଟି ବୁଲା କୁକୁର ରହୁଥିଲେ। ପ୍ରତିଦିନ ସେମାନେ କୁକୁରମାନଙ୍କୁ ଖାଇବାକୁ ଦିଅନ୍ତି । ନିଖୋଜ ହେବା ପରେ ସେମାନ କାଳିକୁ ବହୁତ ଖୋଜିଥିଲେ । ତାପରେ ଏକ ଡ୍ରେନ୍ରେ ୪ଟି ଛୁଆ ମିଳିବା ପରେ କାଳିକୁ କେହି ମାରି ଦେଇଥିବେ ବୋଲି ସେମାନେ ନିଶ୍ଚିତ ହୋଇଥିଲେ । ୧୯ ତାରିଖ ସକାଳେ ରାସ୍ତାକଡ଼ରେ ଏକ ଧଳା ରଙ୍ଗର ଜରି ଅଖାରୁ ମିଳିଥିଲା । ସେଥିରୁ ଗନ୍ଧ ବାହାରୁଥିଲା। ଖେଳପଡି଼ଆରେ ଖେଳୁଥିବା ଯୁବକମାନେ ସନ୍ଦେହରେ ପୋଲିସକୁ ଖବର ଦେଇଥିଲେ । ପଶୁପ୍ରେମୀ ମଧ୍ୟ ଖବର ପାଇ ସେଠାକୁ ଧାଇଁ ଯାଇଥିଲେ । ପୋଲିସ ଉପସ୍ଥିତିରେ ଜରି ଅଖାରୁ କାଳିର ମୃତଦେହ ବାହାର କରାଯାଇଥିଲା । ତା’ ଦେହରେ କୌଣସି କ୍ଷତଚିହ୍ନ ନଥିଲା । କି ପାଟିରୁ ରକ୍ତ ବାହାର ନଥିଲା । କାଳିକୁ ଶ୍ୱାସରୁଦ୍ଧ କରି ମାରି କେହି ଦୁର୍ବୃତ୍ତ ତାକୁ ଅଖାରେ ପୂରାଇ ବାନ୍ଧି ଦେଇଥିଲା। କାଳିକୁ ହତ୍ୟା କରାଯାଇଥିବା ନେଇ ଏୟାରପୋର୍ଟ ଥାନାରେ ଏତଲା ଦେଇଥିଲେ ପଶୁପ୍ରେମୀ ।

ପୋଲିସ୍ ୪୫୫/୨୫ରେ ମାମଲା ରୁଜୁ କରିଛି । ମାମଲାରେ ପଶୁ ହିଂସା ନିରୋଧ ଆଇନ୍ ୧୯୬୦ର ସେକ୍ସନ ୧୧ ଓ ବିଏନଏସ୍ ୩୨୫ ଦଫା ଲଗାଯାଇଛି । ଶାନ୍ତିଲତା ଅଭିଯୋଗ କରିଛନ୍ତି ଯେ ବିଗତ ଦିନରେ ବିମାନବନ୍ଦର ଆଖପାଖରୁ ପ୍ରାୟ ୪୦-୪୫ କୁକୁର ମରିଛନ୍ତି । ଏମାନଙ୍କୁ କେହି ଉଦ୍ଦେଶ୍ୟମୂଳକ ଭାବେ ମାରିକି ବଣବୁଦାରେ ଫିଙ୍ଗି ଦେଉଛି । ଯାହା ଉପରେ ଏଯାଏଁ କିଛି କାର୍ଯ୍ୟାନୁଷ୍ଠାନ ହୋଇନି। କିନ୍ତୁ ବଡ଼ କଥା ହେଉଛି... କାଳିର ଆତ୍ମା ଏବେ କାନ୍ଦୁଛି। ସେ ପ୍ରଶ୍ନ କରୁଛି ଏ ମଣିଷ ସମାଜକୁ। ମୁଁ କଣ ଭୁଲ କଲି। ମୋ କୁନି କୁନି ଛୁଆ ମାନଙ୍କର ଭୁଲ୍ ବା କଣ। ଆମ ସହ ଏମିତି କାହିଁ କଲ। ଆମେ କଣ ଦୋଷ କଲୁ... ଏତେ ସବୁ ପ୍ରଶ୍ନ ସେହି ଭଦ୍ର ଚେହେରା ତଳେ ଥିବା ଅମଣିଷ ମାନଙ୍କୁ। ଉତ୍ତର ତାଙ୍କୁ ମିଳିବ ତ ?