ଟିକିଏ ବି ନାହିଁ ମଣିଷପଣିଆ: ବାଇକ ବାଜି ସାଇଡ୍ ମିରର ଭାଙ୍ଗିଗଲା ବୋଲି ଡେଲିଭରି ଏଜେଣ୍ଟ ଉପରେ କାର୍ ଚଢ଼ାଇ ମାରିଦେଲେ ଦମ୍ପତି

ନୂଆଦିଲ୍ଲୀ: ଆଜିର ଆଧୁନିକତାର ଔଧତ୍ୟରେ ମଣିଷ ମନରେ ଖାଲି ବିଷ ହିଁ ବିଷ ଭରି ରହିଛି। ହସରୁ ଆଉ ଅମୃତ ଝରୁନି କି କଥାରେ ଆଉ ଆପଣାପଣ ନାହିଁ। ମୁହଁରେ ଅସନ୍ତୋଷ ଓ ବିଷଣ୍ଣତା। ଖାଲି ଅବିଶ୍ୱାସର ବଳୟ ଭିତରେ ମେଞ୍ଚା ମେଞ୍ଚା କ୍ରୋଧ, ହିଂସା ଓ ଷଡ଼ଯନ୍ତ୍ର ଭିତରେ ଘାଣ୍ଟି ଚକଟି ହେଇ ମଷି ଏବେ ଚୁପ୍‌ ଶୈତାନ ପାଲଟିଗଲାଣି। ଦୟା ଧର୍ମ ମାନବିକତାର ଯେମିତି କିଛି ମୂଲ୍ୟା ନାହିଁ। ବେଙ୍ଗାଲୁରରେ ଯେଉଁ ଘଟଣା ଘଟିଛି ସେ ବିଷୟରେ ଚିନ୍ତା କଲେ ଆପଣଙ୍କୁ ହୁଏତ ଏମିତି ଲାଗିପାରେ।

ଭୁଲରେ ବାଇକ୍ ବାଜି କାର୍‌ର ମିରର ସାମାନ୍ୟ ଭାଙ୍ଗିଯିବାରୁ ଡେଲିଭରି ଏଜେଣ୍ଟ ଉପରେ ଗାଡ଼ି ଚଢ଼ାଇ ମାରିଦେଲେ ଦମ୍ପତି। ଜଣଙ୍କ ଜୀବନ ଅପେକ୍ଷା ସାମାନ୍ୟ କାର୍‌ ମିରର ତାଙ୍କ ପାଇଁ ଏତେବଡ଼ ହେଇଗଲା। ଏବେ ବେଙ୍ଗାଲୁରୁ ସାଉଥ ପୁଲିସ ଦୁଇ ହତ୍ୟାକାରୀ ଦମ୍ପତିଙ୍କୁ ଗିରଫ କରିଛି।

ଘଟଣା ଘଟିଛି ଅକ୍ଟୋବର ୨୮ ତାରିଖ ରାତି ସାଢ଼େ ୧୧ଟା ସମୟରେ। ଡେଲିଭରି ଏଜେଣ୍ଟ ଦର୍ଶନ ଓ ତାଙ୍କ ସାଙ୍ଗ ବରୁଣ ଶ୍ରୀ ରାମ ଟେମ୍ପୁଲ ଏରିଆରେ ବାଇକରେ ଯାଉଥିବା ବେଳେ ଏହି ଦମ୍ପତି ତାଙ୍କୁ ପଛରୁ ଧକ୍କା ଦେଇଥିଲେ। ଘଟଣା ସ୍ଥଳରେ ବାଇକ ଚଳାଉଥିବା ଦର୍ଶନଙ୍କର ମୃତ୍ୟୁ ହୋଇଥିବା ବେଳେ ପଛରେ ବସିଥିବା ବରୁଣ ଆହତ ହୋଇଥିଲେ।

ପ୍ରଥମେ ଏହାକୁ ଏକ ଦୁର୍ଘଟଣାଜନିତ ମୃତ୍ୟୁ ବୋଲି ଦର୍ଶାଇ ଜେପି ନଗର ଟ୍ରାଫିକ ପୁଲିସ ଷ୍ଟେସନରେ ମାମଲା ପଞ୍ଜିକୃତ କରାଯାଇଥିଲା। ହେଲେ ସିସିଟିଭି ଫୁଟେଜ୍ ଚେକ୍ କରିବା ପରେ ଏହା ଏକ ହତ୍ୟା ବୋଲି ପୁଲିସ ସନ୍ଦେହ କରିଥିଲା। କାର ତାଙ୍କୁ ଗୋଡ଼ାଇ ଗୋଡ଼ାଇ ଯୋଜନାବଦ୍ଧ ଭାବେ  ଧକ୍କା ଦେଇଛି ବୋଲି ପୁଲିସ ଜାଣିବାକୁ ପାଇଥିଲା।  

ଡିସିପି (ଦକ୍ଷିଣ) ଲୋକେଶ ଜଗାଲାସୁରଙ୍କ ଅନୁଯାୟୀ, ଦର୍ଶନଙ୍କ ବାଇକ୍ କାର ସହିତ ଧକ୍କା ହେବା ପରେ କାର୍‌ର ସାଇଡ ମିରର ବାଙ୍ଗିଯାଇଥିଲା। ଏଥିରେ ଦମ୍ପତ୍ତି ଓ ଦର୍ଶନଙ୍କ ମଧ୍ୟରେ  ଝଗଡ଼ା ହୋଇଥିଲା। ଏହାପରେ ଦର୍ଶନ ସେଠାରୁ ଚାଲିଯାଇଥିଲେ। ଏହି ଘଟଣାରେ କ୍ରୋଧିତ ହୋଇ କାର ଡ୍ରାଇଭର ତାଙ୍କ ଗାଡ଼ିକୁ ପଛକୁ ଫେରାଇ ଥିଲେ। ଏବଂ ଦର୍ଶନଙ୍କ ଟୁହ୍ୱିଲରଙ୍କୁ ପିଛା କରି ଜାଣିଶୁଣି ପଛରୁ ଧକ୍କା ଦେଇଥିଲେ।

ଅଭିଯୁକ୍ତ, ଜଣକ ହେଲ ଫିଜିକାଲ ଏଜୁକେସନ ଟିଚର ମନୋଜ ଶର୍ମା ଏବଂ ତାଙ୍କ ପତ୍ନୀ ଆରତୀ। ଦୁର୍ଘଟଣା ଘଟାଇବା ପରେ ପ୍ରମାଣ ନଷ୍ଟ କରିବା ପାଇଁ ଉକ୍ତ ଦମ୍ପତି ସେଠାରେ ଖସି ପଡ଼ିଥିବା ଭଙ୍ଗା କାର ପାର୍ଟ୍ସ ସଂଗ୍ରହ କରିବା ପାଇଁ ମୁଖା ପିନ୍ଧି ପୁଣିଥରେ ସେହି ସ୍ଥାନକୁ ଆସିଥିଲେ। କାର୍‌ ପାର୍ଟ ନେଇ ଫେରିଯାଇଥିଲେ।

ଏହି ଘଟଣା ଜଣାପଡ଼ିବା ପରେ ପରେ ପୁଲିସ ପ୍ରମାଣ ନଷ୍ଟ କରିବା ଅଭିଯୋଗ ସହିତ ଭାରତୀୟ ଦଣ୍ଡ ସଂହିତାର ଧାରା ୩୦୨ ଅନୁଯାୟୀ ମାମଲାକୁ ହତ୍ୟା ଭାବରେ ପୁନଃବର୍ଗୀକୃତ କରିଥିଲା। ମାମଲାରେ ଦମ୍ପତିଙ୍କୁ ଗିରଫ କରାଯାଇ କୋର୍ଟରେ ହାଜର କରାଯାଇଥିବା ବେଳେ ଅଧିକ ତଦନ୍ତ ଜାରି ରହିଛି।