କେକେଆର୍‌କୁ ବଡ଼ ଝଟକା: ଆଇପିଏଲ୍ ୨୦୨୬ରୁ ବାଦ୍ ପଡ଼ିଲେ ହର୍ଷିତ ରାଣା, ରିପ୍ଲେସମେଣ୍ଟ ଖୋଜୁଛି ଦଳ

କୋଲକାତା: ଆସନ୍ତା ଇଣ୍ଡିଆନ୍ ପ୍ରିମିୟର୍ ଲିଗ୍ (ଆଇପିଏଲ୍) ୨୦୨୬ ସଂସ୍କରଣ ପୂର୍ବରୁ କୋଲକାତା ନାଇଟ୍ ରାଇଡର୍ସ (KKR) କୁ ଏକ ଶକ୍ତ ଝଟକା ଲାଗିଛି। ଦଳର ଷ୍ଟାର୍ ଅଲରାଉଣ୍ଡର ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟରୁ ବାଦ୍ ପଡ଼ିଛନ୍ତି।

ୱାର୍ମ-ଅପ୍ ମ୍ୟାଚରେ ହୋଇଥିଲେ ଆହତ

ଟି-୨୦ ବିଶ୍ୱକପ୍ ପୂର୍ବରୁ ଖେଳାଯାଇଥିବା ଏକ ୱାର୍ମ-ଅପ୍ ମ୍ୟାଚ୍ ବେଳେ ରାଣା ଆହତ ହୋଇଥିଲେ। ସେବେଠାରୁ ସେ କ୍ରିକେଟ୍ ପଡ଼ିଆରୁ ଦୂରରେ ଅଛନ୍ତି। ମିଳିଥିବା ରିପୋର୍ଟ ଅନୁଯାୟୀ, କେକେଆର୍ ଏପର୍ଯ୍ୟନ୍ତ ଏହି ଅଲରାଉଣ୍ଡରଙ୍କ ବଦଳ ଖେଳାଳି (Replacement) କିଏ ହେବେ, ସେନେଇ କୌଣସି ଚୂଡ଼ାନ୍ତ ନିଷ୍ପତ୍ତି ନେଇପାରିନାହିଁ ଏବଂ ସନ୍ଧାନ ଜାରି ରଖିଛି।

ଦଳରେ ସାମିଲ ହେଲେ ଜିମ୍ବାୱେ ପେସର୍ ମୁଜାରବାନି

ଅନ୍ୟପଟେ, ଶୁକ୍ରବାର ଦିନ କେକେଆର୍ ଜିମ୍ବାୱେର ଦ୍ରୁତ ବୋଲର ବ୍ଲେସିଂ ମୁଜାରବାନିଙ୍କୁ ନିଜ ଦଳରେ ସାମିଲ କରିବାକୁ ଯୋଜନା କରୁଥିବା ନେଇ କହିଛି । ୬ ଫୁଟ୍ ୮ ଇଞ୍ଚ ଉଚ୍ଚତା ବିଶିଷ୍ଟ ଏହି ଦକ୍ଷିଣହାତୀ ପେସର୍ ସର୍ଟର୍ ଫର୍ମାଟରେ ଜିମ୍ବାୱେର ଜଣେ ପ୍ରମୁଖ ବୋଲର ଭାବେ ଉଭା ହୋଇଛନ୍ତି। ତାଙ୍କର ଉଚ୍ଚତା ହିଁ ବୋଲିଂରେ ବେଶୀ  ସହାୟକ ହେଉଛି । ସେ ଅଧିକ ବାଉନ୍ସ ବୋଲିଂ କରି ଗୁରୁତ୍ୱପୂର୍ଣ୍ଣ ସମୟରେ ୱିକେଟ୍ ନେବାରେ ବେଶ୍ ମାହିର୍।

ମୁଜାରବାନିଙ୍କ ଟି-୨୦ ରେକର୍ଡ

ଟି-୨୦ କ୍ରିକେଟରେ ମୁଜାରବାନିଙ୍କ ପାଖରେ ବେଶ୍ ଭଲ ଅଭିଜ୍ଞତା ରହିଛି। ସେ ୮୦ରୁ ଅଧିକ ଆନ୍ତର୍ଜାତୀୟ ଟି-୨୦ ମ୍ୟାଚ୍ ଖେଳି ପ୍ରାୟ ୨୧ ହାରରେ ୯୦ରୁ ଅଧିକ ୱିକେଟ୍ ଅକ୍ତିଆର କରିଛନ୍ତି। ଏହି ଫର୍ମାଟରେ ତାଙ୍କର ଶ୍ରେଷ୍ଠ ବୋଲିଂ ପ୍ରଦର୍ଶନ ହେଉଛି, ୮ ରନ୍ ଦେଇ ୩ ୱିକେଟ୍ ନେଇଛନ୍ତି ।

ଆଇପିଏଲ୍ ୨୦୨୬  ଅଭିଯାନ ପାଇଁ ପ୍ରସ୍ତୁତି ଆରମ୍ଭ କରିବେ ମୁଜାରବାନି । ମାର୍ଚ୍ଚ ୧୭ ତାରିଖରେ କୋଲକାତାରେ ପହଞ୍ଚି କେକେଆର୍ ସ୍କ୍ୱାଡରେ ସେ ଯୋଗଦେବେ ବୋଲି ଜଣାପଡ଼ିଛି ।