Mohan Bhagwat on bangladesh hindu: ବାଂଲାଦେଶକୁ ଆରଏସଏସ ମୁଖ୍ୟଙ୍କ ଚେତାବନୀ; ୧.୨ କୋଟି ହିନ୍ଦୁ ଯଦି ଏକାଠୀ ହେଲେ…

ନୂଆଦିଲ୍ଲୀ: ବାଂଲାଦେଶରେ ହିନ୍ଦୁଙ୍କ ବଢୁଥିବା ସମସ୍ୟା ନେଇ କଡ଼ା ପ୍ରତିକ୍ରିୟା ଦେଇଛନ୍ତି ରାଷ୍ଟ୍ରୀୟ ସ୍ୱୟମସେବକ ସଂଘ(ଆରଏସଏସ) ମୁଖ୍ୟ ମୋହନ ଭାଗବତ। ଯଦି ବାଂଲାଦେଶର ହିନ୍ଦୁ ଏକଜୁଟ ହୋଇ ନିଜ ଅଧିକାର ପାଇଁ ଲଢ଼େଇ କରିବାକୁ ନିଷ୍ପତ୍ତି ନେବେ ତାହାଲେ ସାରା ବିଶ୍ୱରେ ହିନ୍ଦୁମାନଙ୍କ ଠାରୁ ତାଙ୍କୁ ସମର୍ଥନ ମିଳିବ। ରବିବାର ମୁମ୍ବାଇର ଆରଏସଏସ୍ କାର୍ଯ୍ୟକ୍ରମର ଦ୍ୱିତୀୟ ଦିନରେ ନିଜର ବକ୍ତବ୍ୟ ରଖିବା ବେଳେ ଏଭଳି କଡ଼ା ମେସେଜ୍ ଦେଇଛନ୍ତି ଆରଏସଏସ୍ ମୁଖ୍ୟ ମୋହନ ଭାଗବତ।

ମୋହନ ଭାଗବତ କହିଛନ୍ତି “ବାଂଲାଦେଶରେ ପାଖାପାଖି ୧.୨୫ କୋଟି ହିନ୍ଦୁ ଜନସଂଖ୍ୟା ରହିଛି। ଯଦି ସେମାନେ ସେଠାରେ ରହି ଲଢ଼େଇ କରିବାକୁ ନିଷ୍ପତ୍ତି ନେବେ, ତେବେ ସାରା ବିଶ୍ୱରେ ଥିବା ହିନ୍ଦୁମାନେ ତାଙ୍କୁ ସହଯୋଗ କରିବେ।” ମୁମ୍ବାଇ ୱାର୍ଲିର ନେହେରୁ ସେଣ୍ଟରରେ ଆରଏସଏସ ଶତବାର୍ଷିକୀ ପାଳନ ପାଇଁ ଆୟୋଜିତ 'ସଂଘ ଯାତ୍ରାର ୧୦୦ ବର୍ଷ: ନୂଆ ଦିଗନ୍ତ' ଶୀର୍ଷକ ଦୁଇ ଦିନିଆ ବ୍ୟାଖ୍ୟାନମାଳା ଅବସରରେ ଏହା କହିଥିଲେ ଭାଗବତ।

ପଢ଼ନ୍ତୁ- ଖରାଦିନରେ ଶୁଖିଯିବ ପାକିସ୍ତାନ, ମିଳିବନି ଟୋପାଏ ପାଣି... ଚେନାବ ନଦୀରେ ଭାରତ ଆରମ୍ଭ କଲା ବଡ ପ୍ରକଳ୍ପ

ଶେଖ ହସିନାଙ୍କ ସରକାରର ପତ୍ତନ ପରେ ବାଂଲାଦେଶରେ ସଂଖ୍ୟାଲଘୁଙ୍କ ବିରୁଦ୍ଧରେ ଭିଡ଼ ହିଂସା ବଢ଼ିଯାଇଛି। ବିଶେଷରି ଭାରତ ବିରୋଧୀ ବାଂଲାଦେଶୀ ଛାତ୍ର ନେତା ଉସମାନ ହାଦୀର ମୃତ୍ୟୁ ପରେ ସ୍ଥିତି ଆହୁରି ସାଂଘାତିକ ହୋଇଯାଇଛି। ଭାରତ ସରକାର ଏନେଇ ବାରମ୍ବାର ଢାକା ନିକଟରେ ଅଭିଯୋଗ ଉଠାଇଥିଲେ ମଧ୍ୟ ବାଂଲାଦେଶରେ ମୁସ୍ଲିମ ମୌଳବାଦୀଙ୍କର ଉତ୍ପାତ ଦିନକୁ ଦିନ ବଢ଼ି ଚାଲିଛି। ଏହି ଅଶାନ୍ତି ମଧ୍ୟରେ,ହିଂସାତ୍ମକ ବାଂଲା ଜନତା ଦେଶବ୍ୟାପୀ ହିନ୍ଦୁ ନାଗରିକଙ୍କୁ ଟାର୍ଗେଟ କରୁଛନ୍ତି। ଯେଉଁଥିରେ ବ୍ୟବସାୟୀ,ଶ୍ରମିକ ଏବଂ ଛାତ୍ରଙ୍କମାନେ ବି ଅଛନ୍ତି।

ଭାରତର ଜନସଂଖ୍ୟା ସମସ୍ୟା ନେଇ ଏମିତି କହିଲେ ଭାଗବତ

ତେବେ ଭାରତରେ ଦେଖା ଦେଉଥିବା ଘରୋଇ ସମସ୍ୟା ନେଇ ମଧ୍ୟ ଭାଗବତ ପୂର୍ବ ସରକାରଙ୍କୁ ଟାର୍ଗେଟ୍ କରିଛନ୍ତି। ଆରଏସଏସ ମୁଖ୍ୟ କହିଛନ୍ତି ଯେ ଅତୀତର ସରକାରଗୁଡ଼ିକ ଭାରତରେ ପରିବର୍ତ୍ତିତ ଜନସଂଖ୍ୟା ଗତିଶୀଳତାକୁ ସମାଧାନ କରିବା ପାଇଁ ଯଥେଷ୍ଟ ପଦକ୍ଷେପ ନେଇ ନଥିଲେ। ଆଜି ଯେଉଁ ପରିବର୍ତ୍ତନ ଦେଖା ଦେଉଛି, ତାହା ଜନ୍ମହାର ଏବଂ ଅବୈଧ ଅନୁପ୍ରବେଶ ପରିବର୍ତ୍ତନର ପ୍ରମୁଖ କାରଣ ବୋଲି କହିଛନ୍ତି ଭାଗବତ। ବର୍ତ୍ତମାନ ସରକାର ଏ ଦିଗରେ କାମ କରୁଛନ୍ତି। ଏବେ ଏହା ସଫଳ ହେବ ବୋଲି ସେ କହିଛନ୍ତି। ଭାରତ ବେଶି ସମୟ ଦୁର୍ବଳ ହୋଇ ରହିବ ନାହିଁ, ଭାରତକୁ କେହି ଭାଙ୍ଗିପାରିବେ ନାହିଁ। ଯିଏ ଭାଙ୍ଗିବାକୁ ଚେଷ୍ଟା କରିବ ସେ ନିଜେ ଦୁର୍ବଳ ହୋଇଯିବ ବୋଲି ଭାଗବତ କହିଛନ୍ତି।

କେଉଁଠି ପାଣ୍ଠି ଯୋଗାଡ଼ କରୁଛି ଆର୍ଏସଏସ?

ଆରଏସଏସର ଫଣ୍ଡିଂ କେଉଁଠୁ ହେଉଛି ସେ ନେଇ ମଧ୍ୟ ଅଭିଭାଷଣରେ ଉତ୍ତର ରଖିଥିଲେ ମୋହନ ଭାଗବତ। ସେ କହିଛନ୍ତି “ଲୋକେ ଆରଏସଏସ ଫଣ୍ଡ କେଉଁଠୁ ଆସୁଛି ଜାଣିବା ପାଇଁ ବହୁତ ଇଚ୍ଛୁକ। ଆମେ ଆମ କର୍ମୀମାନଙ୍କ ଠାରୁ ପାଣ୍ଠି ଯୋଗାଡ଼ କରୁ। ଆମେ ଯାତ୍ରା କଲା ବେଳେଆମେ ଖାଦ୍ୟ କିଣିବା ପରିବର୍ତ୍ତେ ଟିଫିନ୍ ମାଗୁ। ଆମେ ହୋଟେଲରେ ନୁହେଁ,ଶ୍ରମିକଙ୍କ ଘରେ ରହୁ।” ସେହିପରି ସଂଗଠନର ନେତୃତ୍ୱ ଓ ଜାତିଗତ ଭେଦଭାବ ନେଇ ମଧ୍ୟ ସେ କହିଛନ୍ତି“ଯେକୌଣସି ଜାତିର ଯେକୌଣସି ବ୍ୟକ୍ତି ଆରଏସଏସମୁଖ୍ୟ ହୋଇପାରିବେ। ଏସସି-ଏସଟି କିମ୍ବା ବ୍ରାହ୍ମଣ ହେବା କୌଣସି ଯୋଗ୍ୟତା ନୁହେଁ। ଯଦିଓ ଆରଏଏସ ପ୍ରାରମ୍ଭରେ ବ୍ରାହ୍ମଣମାନଙ୍କ ଦ୍ୱାରା ଆରମ୍ଭ ହୋଇଥିଲା, ତେବେ ଆମେ ସମସ୍ତ ଜାତି ପାଇଁ କାମ କରୁ।”

ସେହିପରି ମୁସଲିମ ଅଞ୍ଚଳରେ କାମ କରିବାରେ ଚ୍ୟାଲେଞ୍ଜ ନେଇ ସେ କହିଛନ୍ତି ଆମେ ଝଗଡ଼ାଝାଣ୍ଟିକୁ ପସନ୍ଦ କରୁନା। ଯଦି ସେମାନେ କିଛି ଅପମାନଜନକ ଶବ୍ଦ ବ୍ୟବହାର କରନ୍ତିଆମେ ଏହାର ଉତ୍ତର ଦେଉ ନା। ଫଳରେ ସଂଘର୍ଷ ହୁଏ ନାହିଁ।

ତେବେ ଆରଏସଏସର ଆଭିମୁଖ୍ୟ ସ୍ପଷ୍ଟ କରିବାକୁ ଯାଇ ସେ କହିଛନ୍ତି ଯେ ସଂଘ କାହା ବିରୁଦ୍ଧରେ ନୁହେଁ। ଏହା କ୍ଷମତା ଚାହେଁ ନାହିଁ। ଏହାର ଉଦ୍ଦେଶ୍ୟ କେବଳ ସମାଜକୁ ଏକତ୍ର କରିବା ବ୍ରିଟିସ ସମୟରେ ବହୁ ଭିନ୍ନତା ସୃଷ୍ଟି ହୋଇଥିଲା, ସମସ୍ତଙ୍କୁ ଏକତ୍ରିତ କରିବାକୁ ୧୯୨୫ ମସିହାରେ କେଶବ ବଳିରାମ ହେଡଗେୱାର ଆରଏସଏସର ପ୍ରତିଷ୍ଠା କରିଥିଲେ।