ଜଙ୍ଗଲରେ ଛାଡି ଚାଲିଗଲା ମା': ଉଦ୍ଧାର କଲା ବନବିଭାଗ, ଚାଲିଛି ଚିକିତ୍ସା

ଅନୁଗୁଳ ୦୮/୧୧: ଅନ୍ତ ଫାଡି ଜନ୍ମ କଲା । ଚାଲି ଆସୁନଥିଲା, ଚାଲି ଶିଖେଇଲା । ଖାଇ ଆସୁନଥିଲା, ଖୁଆଇଦେଲା । କେମିତି ଚଳିବି, ଖାନେ କାନେ କହି ଶିଖେିଲା । ଜଙ୍ଗଲ, ରାସ୍ତା ଘାଟ ସହ ପରିଚୟ କଲା । ହେଲେ ଅଧାବାଟେ ମୋତେ ଛାଡି ଚାଲିଗଲା । ଜନ୍ମକଲା ସନ୍ତାନକୁ ପରକଲା । ଅଧାବାଟରେ ଛାଡି ଚାଲିଗଲା ଜନ୍ମଦାତ୍ରୀ । ମାଆ ହୋଇ କରିଦେଲା ସାତପର । ଅନୁଗୁଳ ଶ୍ୟାମସୁନ୍ଦରପୁରରୁ ଛୁଆ ହାତୀକୁ ଉଦ୍ଧାର କରିଛି ବନବିଭାଗ । କାରଣ ଛୁଆହାତୀକୁ ମା' ହାତୀ ଛାଡି ଜଙ୍ଗଲକୁ ପଳାଇ ଯାଇଛି । 

ସୂଚନା ଥାଉକି, ଛୁଆ ହାତୀକୁ ଧରି ହାତୀ ପଲ ଜଙ୍ଗଲରେ ଖାଦ୍ୟ ଅନ୍ୱେଷଣରେ ଆସିଥିଲେ । କିଛି ସମୟ ଚଲାବୁଲା ପରେ କୌଣସି କାରଣରୁ ଛୁଆକୁ ଛାଡି ହାତୀ ପଲ ସହ ଚାଲିଯାଇଛି ମାଆ । ଏଣେ ତେଣେ ମା ହାତୀକୁ ଖୋଜିବା ପରେ ସ୍ଥାନୀୟ ଲୋକମାନେ ହାତୀ ଛୁଆକୁ ଦେଖି, ବନ ବିଭାଗକୁ ଖବର ଦେଇଥିଲେ । ପରେ ବନ ବିଭାଗ ହାତୀ ଛୁଆକୁ ନେଇ ପୁରୁଣାଗଡ଼ ନର୍ସରୀରେ ରଖିଛନ୍ତି । ତାକୁ ଜଙ୍ଗଲ ବିଭାଗ ଚିକିତ୍ସା କରୁଛନ୍ତି । ହାତୀ ଛୁଆକୁ ଖାଇବା ଦେବା ସହ ସାଲାଇନ ଦେଇଛନ୍ତି । ହାତୀ ଛୁଆଟି ସାମାନ୍ୟ ଦୁର୍ବଳ ଥିବା ଜଣାପଡୁଛି । ତାର ବୟସ ସେହି ଏକମାସ ହେବ ବୋଲି ଜଣାପଡିଛି । ହାତୀ ଛୁଆର ଚିକିତ୍ସା ଚାଲିଛି।