Bhadrak : ନିର୍ଦ୍ଦୟୀ ବାପା-ମାଆ, ମାସକର ଶିଶୁକନ୍ୟାକୁ ବିକ୍ରି କରିଦେଲେ ୨୦ହଜାର ଟଙ୍କାରେ

ଭଦ୍ରକ : ଆଜି ବି ଶିଶୁ କନ୍ୟା ପ୍ରତି ବିମୁଖତା ଜାରି ରହିଛି । କେତେ ବେଳେ ଭ୍ରୁଣ ହତ୍ୟା ହେଉଛି ତ କେତେବେଳେ ବଧୂ ହତ୍ୟା । କିନ୍ତୁ ଏବେ ବି ଏମିତି କିଛି ଅମଣିଷ ଅଛନ୍ତି ଯେଉଁମାନେ ଶିଶୁ କନ୍ୟାକୁ ବିକ୍ରି କରି ଦେଉଛନ୍ତି । ଏମିତି ଏକ ଘଟଣାକୁ ଆମେ ଆପଣଙ୍କ ସାମ୍ନାକୁ ଆଣିବୁ , ଯାହା ଆପଣଙ୍କୁ ଚମକାଇ ଦେବ । କାରଣ ଜନ୍ମ କରିବାର ମାସେ ପରେ ଶିଶୁ କନ୍ୟାକୁ ବାପା, ମାଆ ଓ ଆଇ ମିଶି ମାତ୍ର ୨୦ ହଜାର ଟଙ୍କାରେ ବିକ୍ରି କରିଥିବା ନେଇ ଥାନାରେ ଅଭିଯୋଗ କଲେ ଜେଜେ ମା। ଭଦ୍ରକ ଜିଲ୍ଲା ଭଣ୍ଡାରିପୋଖରୀ ଥାନା ଅଧୀନ ବୟାବନାପୁର ଗାଁରେ ଘଟିଛି ଏମିତି ଏକ ଅଭାବନୀୟ ଘଟଣା। ଏହି ଗାଁର ସାବିତ୍ରୀ ଦାସ ତାଙ୍କ ନାତୁଣୀକୁ ତାଙ୍କ ପୁଅ ଓ ବୋହୂ ୨୦ହଜାର ଟଙ୍କାରେ ବିକ୍ରି କରିଥିବା ନେଇ ଭଣ୍ଡାରିପୋଖରୀ ଥାନାରେ ଏତଲା ଦିଆଯାଇଛି। ପୁଅ ସିପୁ ଦାସ , ବୋହୂ ରିନା ଦାସ ଓ ତାଙ୍କ ସମୁଦୁଣି ମିଳି ମିଶି ତାଙ୍କ ମାସକର ନାତୁଣୀକୁ ବିକ୍ରି କରିଛନ୍ତି ବୋଲି ଅଭିଯୋଗ ଆଣିଛନ୍ତି ଜେଜେମା । ସେ ନାତୁଣୀ ବିଷୟରେ ପଚାରିବାରୁ ତାଙ୍କୁ ମାଡପିଟ୍ କରିବା ସହ ଗାଳିଗୁଲଜ କରିଥିବା କହିଛନ୍ତି ସାବିତ୍ରୀ ।

ଅଭିଯୋଗ ପରେ ଆକ୍ସନକୁ ଆସିଛି ଭଣ୍ଡାରିପୋଖରୀ ପୋଲିସ। ଗାଁକୁ ଯାଇ ଶିଶୁ କନ୍ୟାର ବାପା , ମା ଓ ଆଇକୁ ଉଠାଇ ଆଣି ପଚରାଉଚୁରା କରିଛି । ତେବେ ମାସକର ଶିଶୁ କନ୍ୟାକୁ ମାତ୍ର ୨୦ହଜାର ଟଙ୍କାରେ କଟକ ରଜାବଗିଚା ଅଞ୍ଚଳରେ ବିକ୍ରି କରାଯାଇଥିବା ବିଶ୍ଵସ୍ଥ ସୂତ୍ରରୁ ସୂଚନା ମିଳିଛି । ସ୍ଥାନୀୟ ସରପଞ୍ଚ ପ୍ରତିନିଧିଙ୍କ କହିବା ଅନୁଯାୟୀ ଶିଶୁ କନ୍ୟାର ଜେଜେ ମାଆ ଘଟଣା ବିଷୟରେ ଜଣାଇବା ପରେ ସେ ପୋଲିସକୁ ଅବଗତ କରିଥିଲେ । ଶିଶୁ କନ୍ୟାକୁ ଉଦ୍ଧାର କରିବା ସହ ଦୃଢ଼ କାର୍ଯ୍ୟନୁଷ୍ଠାନ ଦାବି କରିଛନ୍ତି । ଅନ୍ୟପଟେ ଘଟଣାକୁ ନେଇ ଆଇନଜୀବୀ କହିଢନ୍ତି ଯେ ଶିଶୁ ସୁରକ୍ଷା ବିଭାଗକୁ ଟିକେ କ୍ରିୟାଶୀଳ ହେବାର ଆବଶ୍ୟକ ରହିଛି । ତେବେ ଜନ୍ମ କଲା ମାଆ ଯେତେବେଳେ ଝିଅକୁ ବିକ୍ରି କରିବ ସେତେବେଳେ ଆଉ କାହାକୁ ବା ଦୋଷ ଦେବ। କେବେଳ ଏତିକି କହି ହେବ ଦୃଢ଼ କାଯ୍ୟାନୁଷ୍ଠାନ ଆବଶ୍ୟକ ।