ଆଉ କାହା ପ୍ରରୋଚନାରେ ଏଭଳି କରୁଛନ୍ତି ମିଲର, କଡ଼ା ଆଭିମୁଖ୍ୟ ଗ୍ରହଣ କରିପାରନ୍ତି ସରକାର

ଭୁବନେଶ୍ବର ୬।୧: କେବେ ତୁଟିବ ମଣ୍ଡି ଟେନସନ୍ । ରାଜ୍ୟରେ ମଣ୍ଡି ଅବ୍ୟବସ୍ଥାକୁ ନେଇ ସରକାର ଏବଂ ମିଲର୍ସ ମୁହାଁମୁହିଁ ହୋଇଛନ୍ତି । ସମବାୟ ମନ୍ତ୍ରୀ ପ୍ରଦୀପ ବଳ ସାମନ୍ତ କହିଛନ୍ତି, ସରକାର ମିଲର ମାନଙ୍କ ସହିତ ବିଚାର ବିମର୍ଶ କରୁଛନ୍ତି କିନ୍ତୁ ନିଷ୍କର୍ସ ବାହାରି ପାରିନାହିଁ । ମିଲରଙ୍କ ୪ ଦଫା ଦାବି ସରକାର ପୂରଣ କରିବାର ସରକାରଙ୍କର କୌଣସି ବାଧ୍ୟବାଧକତା ନାହିଁ । ସେମାନଙ୍କ ଦାବି ପୂରଣର କୌଣସି ଯଥାର୍ଥତା ନାହିଁ । ବର୍ତ୍ତମାନ ଧାନ କିଣା ସିଜିନ ଚାଲିଛି । ତେଣୁ ସେମାନେ ସରକାରଙ୍କୁ ହରଡ଼ ଘଣାରେ ପକେଇବାକୁ ଚେଷ୍ଟା କରୁଛନ୍ତି । ଆଉ କାହା ପ୍ରରୋଚନାରେ ମିଲର ମାନେ ଏଭଳି କରୁଛନ୍ତି । ସରକାର କିଛି କଡ଼ା ଆଭିମୁଖ୍ୟ ଗ୍ରହଣ କରିପାରନ୍ତି । ଯୋଗାଣ ବିଭାଗ ଆଲୋଚନା କରୁଛି । ଖୁବ୍ଶୀଘ୍ର ଏ ସମସ୍ୟାର ସମାଧାନ ହୋଇଯିବ ବୋଲି ସମବାୟ ମନ୍ତ୍ରୀ ପ୍ରଦୀପ ବଳ ସାମନ୍ତ କହିଛନ୍ତି ।

ଆନ୍ଦୋଳନରେ ମିଲର୍ସ, ମଣ୍ଡିରୁ ଉଠୁନି ଧାନ । ଧାନ ଉଠୁନଥିବାରୁ ରାସ୍ତାରେ ଚାଷୀ । ୧୦ ତାରିଖ ସୁଦ୍ଧା ସମସ୍ତ ଜିଲ୍ଲାରେ ମଣ୍ଡି ଖୋଲିବା ପାଇଁ ରାଜ୍ୟ ସରକାର ପ୍ଲାନ କରିଥିବା ବେଳେ ଏପର୍ଯ୍ୟନ୍ତ କିନ୍ତୁ ଧାନ ଉଠାଣ ନେଇ କେଁ ହଟୁନି । ଗୋଟିଏ ପଟେ ମିଲର୍ସ କବାଟ କିଳିଛନ୍ତି ଅନ୍ୟପଟେ ରାସ୍ତାରେ ଧାନ ଗଦେଇଛନ୍ତି ଚାଷୀ । ମିଲର୍ସଙ୍କ ଆନ୍ଦୋଳନ ପାଇଁ ମଣ୍ଡିରେ ପଡି ରହିଛି ଧାନ । ଯେଉଁଥି ପାଇଁ ଧାନକିଣା ଠପ୍ ହୋଇଛି । ଯାହାକୁ ନେଇ ଚାଷୀ ଅସନ୍ତୋଷ ବଢିବାରେ ଲାଗିଛି । ଆଉ ପଡ଼ିରହିଥିବା ଧାନକୁ ଶୀତ କାକରରେ ଜଗି ରହିଛନ୍ତି ଚାଷୀ ।

ମିଲର୍ସ ସଂଘ ରାଜ୍ୟ ସରକାରଙ୍କ ପାଖରେ ବିଭିନ୍ନ ଦାବି ରଖିଛି । ଯେଉଁଥିରେ ରହିଛି–

୧- ସରକାର ସମସ୍ତ ବାକି ଥିବା ଟଙ୍କା ତୁରନ୍ତ ପ୍ରଦାନ କରନ୍ତୁ । ୨୦୨୩-୨୦୨୪ ଆର୍ଥିକ ବର୍ଷ ସହ ୨୦୨୪-୨୦୨୫ ଆର୍ଥିକ ବର୍ଷ ପାଇଁ ମିଲର ମାନଙ୍କର ରକ୍ଷଣାବେକ୍ଷଣ ଓ ପରିବହନ ବାବଦରେ ୩୫୦ କୋଟି ଟଙ୍କା ବାକି ରହିଛି । ଏହାକୁ କ୍ଲିୟର କରିବା ଲାଗି ମିଲର୍ସ ସଂଘ ଦାବି କରିଛି ।

୨- ୨୦୨୫-୨୬ ଆର୍ଥିକ ବର୍ଷ ପାଇଁ ମୂଲ୍ୟ ସ୍ଥିର କରନ୍ତୁ ସରକାର । ପୂର୍ବରୁ ବାରମ୍ବାର ସରକାରଙ୍କୁ ଏ ନିଷ୍ପତି ନେବାକୁ ଦାବୀ କରିଥିଲେ ସୁଦ୍ଧା ଏ ପର୍ଯ୍ୟନ୍ତ ସରକାର ସନ୍ତୋଷଜନକ ନିଷ୍ପତ୍ତି ନେଉନାହାନ୍ତି ।

୩- ସରକାର ଧାନ ସଂଗ୍ରହ ସହ ଟ୍ରାନ୍ସପୋର୍ଟ ବ୍ୟବସ୍ଥା ବୁଝିଦେଲେ ମିଲିଂ ଆରମ୍ଭ କରିବୁ ।

୪- ଚାଷୀଙ୍କୁ ହାଇରାଣ କରିବା ଆମ ଉଦ୍ଦେଶ୍ୟ ନୁହେଁ ବୋଲି ମିଲର୍ସ ସଂଘ କହିଛି । ପଞ୍ଜାବ ଓ ଛତିଶଗଡ ଭଳି ରାଜ୍ୟରେ ସରକାର ନିଜେ ଧାନ ସଂଗ୍ରହ କରୁଥିବା ମିଲର୍ସ କହିଛନ୍ତି ।