ସିଡନୀରେ ବାପା-ପୁଅ କରିଥିଲେ ଆତଙ୍କବାଦୀ ଆକ୍ରମଣ, ଏପର୍ଯ୍ୟନ୍ତ ଗଲାଣି ୧୬ ଜୀବନ

ନୂଆଦିଲ୍ଲୀ ୧୫।୧୨; ରବିବାର ସିଡନୀର ବଣ୍ଡି ବିଚ୍ରେ ପହଲଗାମ୍ ଘଟଣାର ପୁନରାବୃତ୍ତି। ଆତତାୟୀଙ୍କ ଆଖିବୁଜା ଗୁଳିମାଡ଼ରେ ଏପର୍ଯ୍ୟନ୍ତ ୧୬ ଜଣଙ୍କର ମୃତ୍ୟୁ ହୋଇଛି। ସୂଚନା ମିଳିଛି ଏହି ଆତଙ୍କବାଦୀ ଆକ୍ରମଣର ଅପରାଧୀ ବାପା ଓ ପୁଅ ଥିଲେ। ସେମାନଙ୍କ ମଧ୍ୟରୁ ଜଣେ ଘଟଣାସ୍ଥଳେ ମୃତ୍ୟୁବରଣ କରିଥିଲେ। ଅଷ୍ଟ୍ରେଲିଆ ସରକାର ଏହି ଗୁଳିକାଣ୍ଡକୁ ଆତଙ୍କବାଦୀ ଆକ୍ରମଣ ବୋଲି କହିଛନ୍ତି। ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ଆନ୍ଥୋନୀ ଆଲବାନିଜମ୍ ଗଭୀର ଦୁଃଖ ପ୍ରକାଶ କରିଛନ୍ତି। ସେ କହିଛନ୍ତି, ବଣ୍ଡି ବିଚ୍ରେ ଯେଉଁ ଦୃଶ୍ୟ ଦେଖିବାକୁ ମିଳିଛି ତାହା କଷ୍ଟଦାୟକ।

ଏହି ଆକ୍ରମଣ ଅନ୍ତର୍ଜାତୀୟ ରାଜନୀତିକୁ ମଧ୍ୟ ଉଷ୍ମ କରିଛି। ଇସ୍ରାଏଲୀ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଅଷ୍ଟ୍ରେଲୀୟ ପ୍ରଧାନମନ୍ତ୍ରୀ ଆଣ୍ଟୋନି ଆଲବାନିଜ୍ ସରକାରଙ୍କ ଉପରେ ଯିହୂଦୀ ବିରୋଧୀ ମନୋଭାବକୁ ପ୍ରୋତ୍ସାହିତ କରୁଥିବା ଅଭିଯୋଗ କରିଛନ୍ତି। ନେତାନ୍ୟାହୁ କହିଛନ୍ତି ଯେ ପାଲେଷ୍ଟାଇନୀ ରାଷ୍ଟ୍ରକୁ ମାନ୍ୟତା ଦେବା ଭଳି ନିଷ୍ପତ୍ତି ଯିହୂଦୀ ବିରୋଧୀ ମନୋଭାବକୁ ଉସକାଏ ଏବଂ ବିଶ୍ୱବ୍ୟାପୀ ଯିହୂଦୀ ବିରୋଧୀ ମନୋଭାବ ବିରୁଦ୍ଧରେ ଦୃଢ଼ ଆଭିମୁଖ୍ୟ ଅପରିହାର୍ଯ୍ୟ। ଅଷ୍ଟ୍ରେଲିଆର ସୁରକ୍ଷା ସଂସ୍ଥାଗୁଡ଼ିକ ଉଚ୍ଚ ସତର୍କତାରେ ଅଛନ୍ତି, ଏବଂ ଆତଙ୍କବାଦୀ ଦୃଷ୍ଟିକୋଣ ସମେତ ଘଟଣାର ପୁଙ୍ଖାନୁପୁଙ୍ଖ ତଦନ୍ତ ଚାଲିଛି।

ଅଷ୍ଟ୍ରେଲୀୟ ତଦନ୍ତ ସଂସ୍ଥାଗୁଡ଼ିକ ତଦନ୍ତ ଆରମ୍ଭ କରିଛନ୍ତି। ଆକ୍ରମଣକାରୀମାନଙ୍କୁ ବାପା ଏବଂ ପୁଅ ଭାବରେ ଚିହ୍ନଟ କରାଯାଇଛି। ୫୦ ବର୍ଷୀୟ ବାପା ଘଟଣାସ୍ଥଳରେ ମୃତ୍ୟୁବରଣ କରିଥିଲେ, ଯେତେବେଳେ ତାଙ୍କ ୨୪ ବର୍ଷୀୟ ପୁଅକୁ ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଛି। ଏହା ସହ ସେ ପୋଲିସ ହେପାଜତରେ ଅଛନ୍ତି। ଏହି ଆକ୍ରମଣରେ ଯିହୂଦୀ ପର୍ବ ହନୁକାହକୁ ଟାର୍ଗେଟ କରାଯାଇଥିଲା, ଯେଉଁଥିରେ ୧୬ ଜଣଙ୍କର ମୃତ୍ୟୁ ହୋଇଥିଲା ଏବଂ ୪୨ ଜଣ ଆହତ ହୋଇଥିଲେ।

ପ୍ରତ୍ୟକ୍ଷଦର୍ଶୀ କ'ଣ କହିଛନ୍ତି

ସିଡନୀ ଆକ୍ରମଣ ସହିତ ପାକିସ୍ତାନୀ ସମ୍ପର୍କ ସାମ୍ନାକୁ ଆସିଛି। ଅଷ୍ଟ୍ରେଲୀୟ ତଦନ୍ତକାରୀ ସଂସ୍ଥାଗୁଡ଼ିକ ଏହି ମାମଲାକୁ ଗମ୍ଭୀରତାର ସହ ନେଉଛନ୍ତି। ଗୁରୁତ୍ୱପୂର୍ଣ୍ଣ କଥା ହେଉଛି, ଆକ୍ରମଣରେ ସମ୍ପୃକ୍ତ ବାପା ଏବଂ ପୁଅ ପାକିସ୍ତାନୀ ବଂଶୋଦ୍ଭବ ବୋଲି ଚିହ୍ନଟ କରାଯାଇଛି। ରିପୋର୍ଟ ଅନୁଯାୟୀ, ସନ୍ଧ୍ୟା ପ୍ରାୟ ୬ଟା ୪୦ ମିନିଟ୍ରେ ଦୁଇ ଆକ୍ରମଣକାରୀ ଗାଡିରୁ ବାହାରିଥିଲେ ଓ ବଣ୍ଡି ପାଭିଲିଅନ୍ ନିକଟରେ ଫାୟରିଂ ଆରମ୍ଭ କରିଦେଇଥିଲେ। ଗୁଳି ଶବ୍ଦ ଶୁଣିବା ମାତ୍ରେ ପୁରା ଅଞ୍ଚଳରେ ଆରମ୍ଭ ହୋଇଯାଇଥିଲା ଧାଁ ଦଉଡ। ଲୋକ ଜୀବନ ବଞ୍ଚାଇବା ପାଇଁ ପଳାଇବାକୁ ଚେଷ୍ଟା କରିଥିଲେ।