ସାବରକର ମାନହାନୀ ମାମଲା: ରାହୁଲଙ୍କ ବିରୋଧରେ ଦିଆଯାଇଥିବା ସିଡିରେ କିଛି ନାହିଁ, ୟଟ୍ୟୁବ୍ ଭିଡିଓକୁ କୋର୍ଟଙ୍କ ନା

ନୂଆଦିଲ୍ଲୀ: କଂଗ୍ରେସ ନେତା ରାହୁଲ ଗାନ୍ଧୀଙ୍କ ବିରୋଧରେ ମାନହାନୀ ମାମଲାରେ କୋର୍ଟରେ ଏକ ବଡ଼ ଡ୍ରାମା ହୋଇଛି । ପୁଣେର ସାଂସଦ-ବିଧାୟକ କୋର୍ଟରେ ଶୁଣାଣି ଚାଲିଥିଲା। ରାହୁଲ ବିନାୟକ ଦାମୋଦର ସାବରକରଙ୍କ ବିରୋଧରେ ଆପତ୍ତିଜନକ ଭାଷଣ ଦେଇଥିବା ଅଭିଯୋଗ ହୋଇଥିଲା। କୋର୍ଟରେ ଏକ ସିଡି ଚଲାଇ ଦିଆଯାଇଥିଲା, ଯେଉଁଥିରେ ସାବରକରଙ୍କ ବିରୋଧରେ ରାହୁଲଙ୍କ ଆପତ୍ତିଜନକ ଭାଷଣ ଥିବା ଦାବି କରାଯାଇଥିଲା । କିନ୍ତୁ, ସିଡିରେ କୌଣସି ମସଲା ନଥିଲା । ଅର୍ଥାତ ସିଡି ବ୍ଲାଙ୍କ ଥିଲା । ବିଚାରପତି ଏବଂ ଓକିଲ ଅପେକ୍ଷା କରିଥିଲେ, କିନ୍ତୁ ସ୍କ୍ରିନରେ କିଛି ଦେଖାଯାଇ ନଥିଲା। ଆଶ୍ଚର୍ଯ୍ୟର କଥା ହେଉଛି, ଏହି ସିଡିରେ ରେକର୍ଡ ହୋଇଥିବା ଭାଷଣକୁ ଆଧାର କରି ମାମଲା ଆରମ୍ଭ କରାଯାଇଥିଲା ଏବଂ ରାହୁଲ ଗାନ୍ଧୀଙ୍କୁ କୋର୍ଟରେ ହାଜର ହେବାକୁ ସମନ କରାଯାଇଥିଲା।

ଅଭିଯୋଗକାରୀଙ୍କ ଓକିଲ ସେହି ଖାଲି ସିଡି ଦେଖି ଆଶ୍ଚର୍ଯ୍ୟ ହୋଇଥିଲେ । ହିନ୍ଦୁତ୍ୱ ବିଚାରଧାରାର ବିନାୟକ ଦାମୋଦର ସାବରକରଙ୍କ ଅଣନାତି ସାତ୍ତ୍ବିକ ସାବରକର ରାହୁଲ ଗାନ୍ଧୀଙ୍କ ବିରୋଧରେ ଅଭିଯୋଗ କରିଥିଲେ । ଯେଉଁଥିରେ ସେ ଲଣ୍ଡନରେ ଏକ ଭାଷଣ ଦେଇଥିଲେ ଯେଉଁଥିରେ ସେ ସାବରକରଙ୍କ ବିଷୟରେ ଅପମାନଜନକ ମନ୍ତବ୍ୟ ଦେଇଥିଲେ। ମାଜିଷ୍ଟ୍ରେଟ୍ ଅମୋଲ ସିନ୍ଦେ ପୁଣେର ଏମପି-ଏମଏଲଏ କୋର୍ଟରେ ମାମଲାର ଶୁଣାଣି କରୁଥିଲେ। ମାମଲାରେ ପ୍ରଥମେ ପ୍ରମାଣ ସ୍ୱରୂପ ଏକ ସିଡି ଦାଖଲ କରାଯାଇଥିଲା। ରିପୋର୍ଟ ଅନୁଯାୟୀ ଏହି ସିଡି ପୂର୍ବରୁ କୋର୍ଟରେ ଚାଲିଥିଲା ଏବଂ ଏହା ଆଧାରରେ ରାହୁଲ ଗାନ୍ଧୀଙ୍କୁ ସମନ ଜାରି କରାଯାଇଥିଲା।

ଗୁରୁବାର, ନଭେମ୍ବର ୨୭ ତାରିଖରେ, କୋର୍ଟରେ ସାତ୍ତ୍ବିକ ସାବରକରଙ୍କ ସାକ୍ଷ୍ୟ ଚାଲିଥିଲା। ଏହି ସମୟରେ କୋର୍ଟରେ ସିଡିର ସିଲ୍ ବାହାର କରି ଚଲାଯାଇଥିଲା । କିନ୍ତୁ ସିଡିଟି ଖାଲି ଥିଲା ଏବଂ ଏଥିରେ କୌଣସି ତଥ୍ୟ ନଥିଲା। ସାତ୍ତ୍ବିକଙ୍କ ଓକିଲ ସଂଗ୍ରାମ କୋଲହଟକର ଏହି ଦୃଶ୍ୟ ଦେଖି ଆଶ୍ଚର୍ଯ୍ୟ ହୋଇଗଲେ। ସେ କୋର୍ଟକୁ ଜଣାଇଥିଲେ ଯେ, ଏହି ସମାନ ସିଡି ପୂର୍ବରୁ କୋର୍ଟରେ ବାଜିଥିଲା ଏବଂ ଏହା ଆଧାରରେ ମାମଲା ଆରମ୍ଭ ହୋଇଥିଲା। ଏକ ଖାଲି ସିଡି ପାଇବା ପରେ, କୋଲହାଟକର କୋର୍ଟକୁ କହିଥିଲେ ଯେ, ରାହୁଲ ଗାନ୍ଧୀଙ୍କ ବିବାଦୀୟ ଭାଷଣ ସୋସିଆଲ ମିଡିଆ ପ୍ଲାଟଫର୍ମ ୟୁଟ୍ୟୁବରେ ଉପଲବ୍ଧ ଏବଂ ସେଠାରୁ ସିଧାସଳଖ ଦେଖାଯାଇପାରିବ। ସେ କୋର୍ଟକୁ ଭିଡିଓର ଏକ ଲିଙ୍କ ମଧ୍ୟ ପ୍ରଦାନ କରିଥିଲେ, କିନ୍ତୁ ରାହୁଲ ଗାନ୍ଧୀଙ୍କ ପ୍ରତିନିଧିତ୍ୱ କରୁଥିବା ଓକିଲ ମିଲିନ୍ଦ ପାୱାର ଦୃଢ଼ ପ୍ରତିବାଦ କରିଥିଲେ।

ସେ କୋର୍ଟକୁ କହିଥିଲେ ଯେ, ଅନଲାଇନ୍ ଭିଡିଓକୁ ପ୍ରମାଣ ଭାବରେ ବିବେଚନା କରାଯାଇପାରିବ ନାହିଁ। ମାଜିଷ୍ଟ୍ରେଟ ସିନ୍ଦେ ମଧ୍ୟ ଏଥିରେ ସମ୍ମତି ଜଣାଇଥିଲେ । ପାୱାରଙ୍କ ସହ ସହମତ ହୋଇ ସେ କୋଲହଟକରଙ୍କୁ କହିଥିଲେ, ଭାରତୀୟ ପ୍ରମାଣ ଆଇନର ଧାରା 65B ଅନୁଯାୟୀ, (YouTube) URL ପ୍ରମାଣପତ୍ର ଦ୍ୱାରା ସମର୍ଥିତ ନୁହେଁ। ତେଣୁ, ଏହାକୁ ପ୍ରମାଣ ଭାବରେ ଗ୍ରହଣ କରାଯାଇପାରିବ ନାହିଁ।