ଭାରତୀୟ ସେଫଙ୍କ ହାତ ରନ୍ଧା ଖାଦ୍ୟ ଖାଇବେନି ପୁଟିନ! କିଏ ତାଙ୍କ ପାଇଁ ରାନ୍ଧିବେ ସ୍ୱାଦିଷ୍ଟ ଖାଦ୍ୟ?

ନୂଆଦିଲ୍ଲୀ ୪।୧୨: ଭ୍ଲାଦିମୀର ପୁଟିନ ଯେବେ ବି ଋଷିଆରୁ ବାହାରକୁ ଯାଆନ୍ତି ତାଙ୍କ ସହ ଏକ ପୁରା ‘ସେଫ୍ ଟିମ୍’ ମଧ୍ୟ ଯାଇଥାନ୍ତି। ତାଙ୍କ ଜାହାଜରେ ଋଷୀୟ ଟ୍ୱରଗ, ଆଇସ୍କ୍ରିମ, ଋଷୀୟ ମହୁ ଓ ଋଷିଆ ବୋତଲ ବନ୍ଦ ପାଣି ମଧ୍ୟ ମହଜୁଦ କରାଯାଏ। ପୁଟିନ ସବୁଥର ଭଳି ଏଥର ମଧ୍ୟ ଭାରତୀୟ ସେଫଙ୍କ ରନ୍ଧା ଖାଦ୍ୟକୁ ଟାଳିବେ। ଡିସେମ୍ବର ୨୦୧୪ରେ ଯେବେ ପୁଟିନ ଭାରତ ଆସିଥିଲେ ମୁମ୍ବାଇ ତାଜ ହୋଟେଲର ଏକ ଫ୍ଲୋରକୁ ଋଷିଆ ସିକ୍ୟୁରିଟି ଏଜେନ୍ସୀ ଏସଏଫଓ ନିଜ ନିୟନ୍ତ୍ରଣକୁ ନେଇଥିଲା ଓ ହୋଟେଲ ରୋଷେଇରୁ ସବୁ ଭାରତୀୟ ମସଲା ହଟାଇ ଦିଆଯାଇଥିଲା।

୨୦୧୮ ଭାରତ-ଋଷିଆ ସମ୍ମିଳନୀ କାଳରେ ଋଷୀୟ ସେଫ ହାଇଦ୍ରାବାଦ ହାଉସ କିଚେନରେ ତାଙ୍କ ଷ୍ଟୋଭ ଜଳାଇଥିଲେ। ୬ ଅକ୍ଟୋବର ୨୦୧୮ରେ ‘ଦି ହିନ୍ଦୁ’ ଲେଖିଥିଲା ରାଷ୍ଟ୍ରପତି ଭବନରେ ବିରିୟାନୀ ଓ କବାବ ଛାଡି ପୁଟିନ କେବଳ ତାଙ୍କ ଋଷୀୟ ସାଲାଡ ଓ ଟ୍ୱରଗ ଖାଇଲେ। ସେହିପରି ୨୦୨୨ରେ ସମରକନ୍ଦ ଏସସିଓ ସମ୍ମିଳନୀ ପରେ ଉଜବେକିସ୍ତାନ ରାଷ୍ଟ୍ରପତି ମିର୍ଜିୟୋୟେଭ ପୁଟିନଙ୍କୁ ଖୁଆଇବାକୁ ଉଦ୍ୟମ କରିଥିଲେ, କିନ୍ତୁ ପୁଟିନ ମନା କରିଦେଇଥିଲେ। କ୍ରେମଲିନ କହିଛି ଯେ ରାଷ୍ଟ୍ରପତିଙ୍କର ଖାସ ଭୋଜନ ଓ ସିକ୍ୟୁରିଟି ନିୟମ ରହିଛି, ବିଦେଶରେ ବି ଆମେ ଆମ ପ୍ରଡକ୍ଟ ବ୍ୟବହାର କରୁ।

ଭାରତୀୟ ସେଫଙ୍କୁ ଭରସା କରନ୍ତିନି କି ପୁଟିନ?
ଏପରି ନୁହେଁ ଯେ ପୁଟିନଙ୍କୁ ଭାରତୀୟ ସେଫ ପସନ୍ଦ କି ଭରସା କରନ୍ତିନି । ଏଫଏସଓର ପୂର୍ବତନ ଅଧିକାରୀ ତଥା ଏବେକା ସାମ୍ବାଦିକ ଆନ୍ଦ୍ରେଇ ସୋଲଦାତୋଭ ତାଙ୍କ ପୁସ୍ତକ ‘ଦି ନ୍ୟୁ ନୋବିଲିଟି’ରେ ଲେଖିଛନ୍ତି ଯେ ୨୦୦୧ରୁ ପୁଟିନଙ୍କ ବିଦେଶ ଗସ୍ତ କାଳରେ ‘ପୋର୍ଟେବଲ ଫୁଡ ଲାବରେଟରୀ’ ସାଙ୍ଗରେ ଯାଉଛି। ଏହି ଲ୍ୟାବ ପ୍ରତ୍ୟେକ ଖାଦ୍ୟକୁ ସ୍ପେକ୍ଟ୍ରୋ ମିଟର ଓ କେମିକାଲ ଟେଷ୍ଟରେ ଚେକ୍ କରେ। ୨୦୧୭ରେ ଫ୍ରାନ୍ସର ବର୍ସାୟ ପ୍ୟାଲେସରେ ମଧ୍ୟ ଏଇଆ ହୋଇଥିଲା। ଫରାସୀ ସେଫ କ୍ରୋଇସ୍ୟାନ ଓ ଫୋଇ ଗ୍ରା ତିଆରି କରିଥିଲେ। ତେବେ ପୁଟିନ ନିଜର ସୁରି ସୁପ ଓ ଟ୍ୱାରଗ ଖାଇଥିଲେ।

ପୁଟିନଙ୍କ ସିକ୍ୟୁରିଟି କୌଣସି ଦେଶ ଓ ତାଙ୍କ ସେଫ ଉପରେ ଭରସା କରେନି। ଋଷ ଟୁଡେରେ ପ୍ରକାଶିତ ଏକ ରିପୋର୍ଟ ଅନୁସାରେ ପୁଟିନଙ୍କ ଖାଦ୍ୟ ମସ୍କୋ ବାହାରେ ତିଆରି ହୋଇଥିବା ଏକ ସ୍ପେଶାଲ ଫାର୍ମରୁ ଆସିଥାଏ, ଯେଉଁଠି କ୍ଷୀର ଦେଉଥିବା ଗାଈଙ୍କ ଉପରେ ୨୪ ଘଣ୍ଟା ନଜର ରଖାଯାଏ। ଅର୍ଥାତ ପୁଟିନଙ୍କ ଭାରତ ଗସ୍ତ କାଳରେ ଭାରତୀୟ ସେଫମାନଙ୍କ ରନ୍ଧା ଖାଦ୍ୟ କେବଳ ଫଟୋ ଉଠାଇବା ଲାଗି ସାଜସଜାରେ ରହିଯିବ ।