ମହାନଦୀରେ ଭାସୁଥିଲା ମୃତଦେହ, ଶନିବାରଠୁ ଥିଲେ ନିଖୋଜ

କଟକ ୩।୨: ମହାନଦୀରୁ ମହିଳାଙ୍କ ମୃତଦେହ ଉଦ୍ଧାର । କଟକ ଚହଟାଛଟ ନିକଟରେ ଜଣେ ବୟସ୍କ ମହିଳାଙ୍କ ମୃତଦେହ ଉଦ୍ଧାର ହୋଇଛି । ଚହଟାଛକ ନିକଟ କାଳୀ ମନ୍ଦିର ପଛ ପଟେ ମହାନଦୀରେ ମୃତଦେହ ଭାସୁଥିବା ସ୍ଥାନୀୟ ଲୋକେ ଦେଖିଥିଲେ । ପରେ ଏ ନେଇ ପୋଲିସକୁ ଖବର ଦେଇଥିଲେ ସ୍ଥାନୀୟ ଲୋକେ । ଖବର ପାଇ ପୋଲିସ ଓ ଅଗ୍ନିଶମ ବିଭାଗ କର୍ମଚାରୀ ମାନେ ପହଞ୍ଚି ମୃତଦେହ ଉଦ୍ଧାର କରିଛନ୍ତି । ମୃତ ମହିଳା ଜଣଙ୍କ ହେଇଛନ୍ତି ତୁଳସୀପୁର ପୋଲିସ କଲୋନୀର ୭୫ବର୍ଷ ବୟସ୍କା ବାସନ୍ତୀ କର ।

ସୂଚନାଯୋଗ୍ୟ ଯେ, ମୃତ ମହିଳା ବାସନ୍ତୀ କର ଗତ ଶନିବାର ଠାରୁ ନିଖୋଜ ଥିଲେ । ଏ ନେଇ ବିଡାନାସୀ ଥାନାରେ ପରିବାର ଲୋକେ ଅଭିଯୋଗ କରିଥିଲେ। ପରିବାର ଲୋକଙ୍କ କହିବା ଅନୁସାରେ ବାସନ୍ତୀ ଶନିବାର ସମ୍ପୂର୍ଣ୍ଣ ସ୍ୱାଭାବିକ ଥିଲେ ଓ ନିଜର ନିତ୍ୟକର୍ମ ସ୍ବାଭାବିକ ଭାବେ କରିଥିଲେ। ମାତ୍ର ଅପରାହ୍ନ ସାଢ଼େ ଗୋଟାଏ ବେଳକୁ ବାସନ୍ତୀ ଘରେ ନଥିବା ପରିବାର ଲୋକେ ଦେଖିଥିଲେ। ବହୁ ଖୋଜାଖୋଜି କରିବା ପରେ ବାସନ୍ତୀଙ୍କୁ ପରିବାର ଲୋକେ ନପାଇବାରୁ ତାଙ୍କ ନିଖୋଜ ନେଇ ଥାନାରେ ସୂଚନା ଦେଇଥିଲେ । ଅଭିଯୋଗ ପାଇ ପୋଲିସ ତନାଘନା ଆରମ୍ଭ କରିଥିଲା । ତେବେ ମଙ୍ଗଳବାର ତାଙ୍କ ମୃତଦେହ ମହାନଦୀରେ ଭାସୁଥିବା ପୋଲିସକୁ ସ୍ଥାନୀୟ ଲୋକ ଖବର ଦେଇଥିଲେ । ଖବର ପାଇ ପୋଲିସ ମହିଳାଙ୍କ ମୃତଦେହ ଉଦ୍ଧାର କରିଛି । ତେବେ କେମିତି ମହିଳାଙ୍କ ମୃତ୍ୟୁ ହେଲା, କେଉଁ ପରିସ୍ଥିତିରେ ମୃତ୍ୟୁ ହେଲା ସେ ନେଇ ଅଧିକ ତନାଘନା ଆରମ୍ଭ କରିଛି ପୋଲିସ ।