ସରକାରୀ ବିମାନରେ ଯାତ୍ରା କଲେ ଧୀରେନ୍ଦ୍ର ଶାସ୍ତ୍ରୀ, ପାଦ ଛୁଇଁ ମୁଣ୍ଡିଆ ମାରିଲେ ପୋଲିସ ଅଧିକାରୀ; ଆପତ୍ତି ଉଠାଇଲା କଂଗ୍ରେସ

ନୂଆଦିଲ୍ଲୀ: ବାଗେଶ୍ବର ଧାମ ମୁଖ୍ୟ ଧୀରେନ୍ଦ୍ର ଶାସ୍ତ୍ରୀ ଛତିଶଗଡ଼ ସରକାରଙ୍କ ଏକ ବିମାନରେ ଯାତ୍ରା କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଛନ୍ତି । ଜଣେ ଧର୍ମ ପ୍ରଚାରକଙ୍କୁ କାହିଁକି ସରକାରୀ ବିମାନ ଯୋଗାଇ ଦିଆଯାଇଥିଲା ବୋଲି ରାଜ୍ୟ କଂଗ୍ରେସ ପ୍ରଶ୍ନ କରିଛି । କେବେଳ ସେତିକି ନୁହେଁ, ଜଣେ ପୋଲିସ ଅଧିକାରୀ ବାଗେଶ୍ବର ବାବାଙ୍କୁ ଚରଣ ସ୍ପର୍ଶ କରି ପ୍ରଣାମ କରିବାକୁ ନେଇ ମଧ୍ୟ ପ୍ରଶ୍ନ ଉଠିଛି । ରାଜ୍ୟର ଜଣେ ମନ୍ତ୍ରୀ ଏବଂ ଧୀରେନ୍ଦ୍ର ଶାସ୍ତ୍ରୀ ବିମାନରୁ ଓହ୍ଳାଇବା ପରେ ସେଠରେ ମୁତୟନ ଜଣେ ପୋଲିସ ଅଧିକାରୀ ମନ୍ତ୍ରୀଙ୍କୁ ସାଲ୍ୟୁଟ କରିଥିଲେ ଏବଂ ଶାସ୍ତ୍ରୀଙ୍କୁ ମୁଣ୍ଡିଆ ମାରିଥିଲେ । ଏହି ସମୟରେ ପୋଲିସ ଅଧିକାରୀ ମୁଣ୍ଡରୁ ନିଜ ଟୋପି ଓହ୍ଲାଇ ଦେଇଥିଲେ । ଛତିଶଗଡ଼ କଂଗ୍ରେସ ଯୋଗାଯୋଗ ବିଭାଗର ମୁଖ୍ୟ ସୁଶୀଲ ଆନନ୍ଦ ଶୁକ୍ଲା ଶନିବାର କହିଛନ୍ତି, ଶାସ୍ତ୍ରୀଙ୍କ ପାଇଁ ସରକାରୀ ବିମାନ ଯୋଗାଇ ଲୋକଙ୍କ ଟଙ୍କା ବରବାଦ କରାଯାଇଛି । ସରକାରୀ ଅର୍ଥର ଅପଚୟ ହୋଇଛି ବୋଲି ସେ କହିଛନ୍ତି ।

ସୋସିଆଲ ମିଡିଆରେ ପ୍ରସାରିତ ହେଉଥିବା ଭିଡିଓରେ ଦେଖାଯାଇଛି, ରାଇପୁର ଏୟାରପୋର୍ଟରେ ରାଜ୍ୟର ମନ୍ତ୍ରୀ ଗୁରୁ ଖୁସଓ୍ବନ୍ତ ସାହେବଙ୍କ ସହ ଧୀରେନ୍ଦ୍ର ଶାସ୍ତ୍ରୀ ସରକାରୀ ବିମାନରୁ ତଳକୁ ଓହ୍ଲାଉଛନ୍ତି । ଏହି ସମୟରେ ଜଣେ ପୋଲିସ ଅଧିକାରୀ ପ୍ରଥମେ ମନ୍ତ୍ରୀଙ୍କୁ ସାଲ୍ୟୁଟ କରୁଛନ୍ତି ଏବଂ ପରେ ଟୋପି ଓ ଜୋତା ଖୋଲି ଶାସ୍ତ୍ରୀଙ୍କ ପାଦ ଛୁଇଁ ପ୍ରଣାମ କରୁଛନ୍ତି । ତେବେ ଧୀରେନ୍ଦ୍ର ଶାସ୍ତ୍ରୀ ଦୁର୍ଗରେ ଆୟୋଜିତ ଏକ ଧାର୍ମିକ ସଭାରେ ଯୋଗ ଦେବାକୁ ଛତିଶଗଡ଼ ଗସ୍ତ କରିଥିଲେ ।

ସାମ୍ବିଧାନର କେଉଁ ନିୟମ ଆଧାରରେ ଜଣେ ଧର୍ମ ପ୍ରଚାରକଙ୍କୁ ସରକାରୀ ବିମାନ ଦିଆଯାଇଥିଲା, ସେନେଇ ରାଜ୍ୟ ସରକାର ସ୍ପଷ୍ଟୀକରଣ ଦିଅନ୍ତୁ ବୋଲି ସୁଶୀଲ ଆନନ୍ଦ ଶୁକ୍ଲା ଦାବି କରିଛନ୍ତି । ଧୀରେନ୍ଦ୍ର ଶାସ୍ତ୍ରୀ କୌଣସି ଧର୍ମ ଗୁରୁ କିମ୍ବା ପୀଠାଧୀଶ୍ବର ନୁହଁନ୍ତି । ଏପରିକି ସେ ଦେଶର ସାମଗ୍ରୀକ ସଂସ୍କୃତି ବିରୋଧୀ ବୋଲି ସେ କହିଛନ୍ତି । ସେ ଆହୁରି ଅଭିଯୋଗ କରିଛନ୍ତି ଯେ, ଶାସ୍ତ୍ରୀ ସାମାଜିକ ବିଭେଦକୁ ପ୍ରୋତ୍ସାହନ କରନ୍ତି । ଯାହା ସନାତନ ଧର୍ମ ବିରୋଧୀ ଚିନ୍ତାଧାରା । ଭଗବାନ ହନୁମାନ ପ୍ରେମ, ଧୈର୍ଯ୍ୟ ଏବଂ କ୍ଷମାର ପ୍ରତୀକ । ଯିଏ ତାଙ୍କ ନାମ ନେଉଛନ୍ତି, ତାଙ୍କର ମୂଲ୍ୟବୋଧକୁ ବି ମନ୍ତ୍ର କରିବା ଆବଶ୍ୟକ । ଅନ୍ଧବିଶ୍ବାସ ଏବଂ ମିଥ୍ୟା ପ୍ରଚାର ବେଶୀ ଦିନ ତିଷ୍ଠି ରହିପାରିବନି ବୋଲି କହିଛନ୍ତି ସୁଶୀଲ ଆନନ୍ଦ ।

This video is so problematic at so many levels.

Religious preacher Dhirendra Shastri is using Chhattisgarh Govt’s Aircraft on tax payer money.

Senior Police officer is removing his shoe, saluting him and touching his feet ( blatant mockery of uniform ethics)

Speak up India… pic.twitter.com/l2AjYVo6Hm

— Roshan Rai (@RoshanKrRaii) December 26, 2025

କରଦାତାଙ୍କ ଟାଙ୍କାରେ ଶାସ୍ତ୍ରୀଙ୍କ ସରକାରୀ ବିମାନ ଯାତ୍ରାକୁ ନେଇ ସୋସିଆଲ ମିଡିଆରେ ମଧ୍ୟ ବିତର୍କ ଜାରି ରହିଛି। ସେପଟେ ପୋଲିସ ଅଧିକାରୀଙ୍କ ଉପରେ ଅନେକ ପ୍ରଶ୍ନ ଉଠାଇଛନ୍ତି । କିନ୍ତୁ କେହି କେହି ତାଙ୍କୁ ସମର୍ଥନ କରିଛନ୍ତି । ସେମାନେ କହିଛନ୍ତି, ପୋଲିସ ଅଧିକାରୀ ପ୍ରଥମେ ମନ୍ତ୍ରୀଙ୍କୁ ସାଲ୍ୟୁଟ କରି ନିଜର କର୍ତ୍ତବ୍ୟ କରିଛନ୍ତି । ପରେ ବ୍ୟକ୍ତିଗତ ଆସ୍ଥା ପ୍ରକଟ କରି, ଶାସ୍ତ୍ରୀଙ୍କୁ ପ୍ରଣାମ କରିଛନ୍ତି । ସମାନ କଥା ବିଜେପି ମଧ୍ୟ କହିଛି । କଂଗ୍ରେସକୁ ଜବାବ ଦେଇ ବିଜେପି କହିଛି, ଜଣେ ପୋଲିସ ଅଧିକାରୀଙ୍କ ବ୍ୟକ୍ତିଗତ ଆସ୍ଥା ଉପରେ ପ୍ରଶ୍ନ ଉଠାଇବା ଅନାବଶ୍ୟକ । ରାଜ୍ୟ ବିଜେପି ମୁଖପାତ୍ର ସନ୍ତୋଷ ପାଣ୍ଡେ କହିଛନ୍ତି, ରେଲଓ୍ବେ ଅଧିକାରୀ ଏବଂ ଏୟାରପୋର୍ଟ କର୍ମଚାରୀ ସାର୍ବଜନୀନ ସ୍ଥାନରେ ନମାଜ ପାଠ କରୁନାହାନ୍ତି କି ? ତେବେ ଜଣେ ପୋଲିସ ଅଧିକାରୀ ଜଣେ ଗୁରୁଙ୍କୁ ପ୍ରଣାମ କରିବାକୁ ନେଇ କଂଗ୍ରେସର ଆପତ୍ତି କାହିଁକି ? ଏପରିକି କଂଗ୍ରେସ ସରକାର ସମୟରେ ସରକାରୀ ବିମାନରେ ବୁଲିଥିବା ଧର୍ମ ପ୍ରଚାରକଙ୍କ ତାଲିକା ଦେଇଛନ୍ତି ପାଣ୍ଡେ । କଂଗ୍ରେସ ସନତନ ଧର୍ମ ବିରୋଧୀ ବୋଲି ମଧ୍ୟ ସେ ଅଭିଯୋଗ କରିଛନ୍ତି ।