ଇସଲାମାବାଦ ବ୍ଲାଷ୍ଟ ପରେ ଭୟରେ ଶ୍ରୀଲଙ୍କା କ୍ରିକେଟର, ସୁରକ୍ଷା ଗ୍ୟାରେଣ୍ଟି ଦେଲେ ମୁନିର

ନୂଆଦିଲ୍ଲୀ: ଇସଲାମାବାଦରେ ହୋଇଥିବା ଭୟଙ୍କର ଆତ୍ମଘାତୀ ଆକ୍ରମଣ ପରେ ସୁରକ୍ଷା ଚିନ୍ତା ବୃଦ୍ଧି ପାଇଛି। ପାକିସ୍ତାନ ଶ୍ରୀଲଙ୍କା କ୍ରିକେଟ୍ ଦଳକୁ ସୁରକ୍ଷା ଦେବା ପାଇଁ ସାମରିକ ଏବଂ ଅର୍ଦ୍ଧସାମରିକ ବାହିନୀ ନିୟୋଜିତ କରିଛି ପାକିସ୍ତାନ। ଗୁରୁବାର ସଂସଦରେ ବିବୃତ୍ତିରେ ପାକିସ୍ତାନର ଗୃହମନ୍ତ୍ରୀ ମୋହସିନ୍ ନକଭି ଏହି ସୂଚନା ପ୍ରଦାନ କରିଛନ୍ତି।

ପାକିସ୍ତାନୀ ଗୃହମନ୍ତ୍ରୀ କହିଛନ୍ତି ଯେ ପାକିସ୍ତାନ ସେନା ମୁଖ୍ୟ ଅସୀମ ମୁନିର ଶ୍ରୀଲଙ୍କା ପ୍ରତିରକ୍ଷା ମନ୍ତ୍ରୀ ପ୍ରମିତା ବନ୍ଦରା ଟେନାକୁନଙ୍କୁ ଦଳର ସମ୍ପୂର୍ଣ୍ଣ ସୁରକ୍ଷାର ଗ୍ୟାରେଣ୍ଟି ଦେଇଛନ୍ତି। ସେ କହିଛନ୍ତି, ଆମର ସାମରିକ ଏବଂ ଅର୍ଦ୍ଧସାମରିକ ବାହିନୀ ଶ୍ରୀଲଙ୍କା ଦଳର ସୁରକ୍ଷାରେ ନିୟୋଜିତ ଅଛନ୍ତି।

ନକଭିଙ୍କ ଅନୁଯାୟୀ, ଇସଲାମାବାଦରେ ବିସ୍ଫୋରଣ ପରେ, ଶ୍ରୀଲଙ୍କା ଖେଳାଳିମାନେ ପାକିସ୍ତାନରେ ରହିବା ବିଷୟରେ ଗମ୍ଭୀର ଚିନ୍ତା ପ୍ରକାଶ କରିଥିଲେ। କିନ୍ତୁ ବର୍ତ୍ତମାନ ସେମାନଙ୍କର ସମସ୍ତ ଚିନ୍ତା ଦୂର କରାଯାଇଛି। ସେ କହିଛନ୍ତି, "ଶ୍ରୀଲଙ୍କା ରାଷ୍ଟ୍ରପତି ନିଜେ ଦଳ ସହିତ କଥା ହୋଇଥିଲେ ଏବଂ ସେମାନଙ୍କୁ ଖେଳ ଜାରି ରଖିବାକୁ ଉତ୍ସାହିତ କରିଥିଲେ।"

କ୍ରିକେଟ୍ ଷ୍ଟାଡିୟମ୍ ଏବଂ ଟିମ୍ ହୋଟେଲ୍ ଉଭୟ ବିସ୍ଫୋରଣ ସ୍ଥାନରୁ ୧୦ କିଲୋମିଟରରୁ କମ୍ ଦୂରରେ ଅଛି। ଶ୍ରୀଲଙ୍କା କ୍ରିକେଟ୍ ବୋର୍ଡ ବୁଧବାର କହିଛି ଯେ ବିସ୍ଫୋରଣ ପରେ ଅନେକ ଖେଳାଳି ଘରକୁ ଫେରିବାକୁ ଇଚ୍ଛା ପ୍ରକାଶ କରିଛନ୍ତି। ଦଶ ବର୍ଷ ମଧ୍ୟରେ ପାକିସ୍ତାନର ରାଜଧାନୀରେ ଏହା ପ୍ରଥମ ବଡ଼ ଆକ୍ରମଣ ଥିଲା ଯେଉଁଥିରେ ସାଧାରଣ ନାଗରିକଙ୍କୁ ଟାର୍ଗେଟ କରାଯାଇଥିଲା।

କ୍ରିକେଟ ବୋର୍ଡ ଦଳକୁ ପାକିସ୍ତାନରେ ରହିବାକୁ ନିର୍ଦ୍ଦେଶ ଦେଇଛି। ପାକିସ୍ତାନ ସେମାନଙ୍କୁ "ଫୁଲପ୍ରୁଫ୍" ସୁରକ୍ଷାର ପ୍ରତିଶ୍ରୁତି ଦେଇଛି। ବୋର୍ଡ ଏହା ମଧ୍ୟ କହିଛି ଯେ ଯଦି କୌଣସି ଖେଳାଳି ଶୀଘ୍ର ଫେରିଯାଆନ୍ତି, ତେବେ ସେମାନଙ୍କ ନିଷ୍ପତ୍ତିର ସମୀକ୍ଷା କରାଯିବ।