ଗତବର୍ଷ ନନ୍ଦନକାନନକୁ ଆସିଥିଲେ ୪୦.୨୦ ଲକ୍ଷ ପରିଦର୍ଶକ, ମିଳିଥିଲା ୨୩.୨୩ କୋଟି ଟଙ୍କା ରାଜସ୍ୱ

ଭୁବନେଶ୍ବର ୧।୧: ୨୦୨୫ ମସିହାରେ ନନ୍ଦନକାନନକୁ ଆସିଥିଲେ ରେକର୍ଡ ସଂଖ୍ୟକ ପରିଦର୍ଶକ । ୨୦୨୫ କ୍ୟାଲେଣ୍ଡର ବର୍ଷରେ ନନ୍ଦନକାନନ ପରିଦର୍ଶକଙ୍କ ଆଗମନରେ ଏକ ଐତିହାସିକ ସଫଳତା ରେକର୍ଡ କରିଛି । ବର୍ଷକ ମଧ୍ୟରେ ମୋଟ୍ ୪୦,୨୦,୫୩୯ ପରିଦର୍ଶକ ନନ୍ଦନକାନନ ପରିଦର୍ଶନ କରିଥିଲେ । ଏହା ଏକ କ୍ୟାଲେଣ୍ଡର ବର୍ଷରେ ରେକର୍ଡ ହୋଇଥିବା ସର୍ବାଧିକ । ୨୦୨୪ କ୍ୟାଲେଣ୍ଡର ବର୍ଷରେ ମୋଟ୍ ପରିଦର୍ଶକଙ୍କ ସଂଖ୍ୟା ୩୭,୯୯,୬୩୨ ଥିଲା ।

ଏହି ପରିଦର୍ଶକଙ୍କ ମଧ୍ୟରୁ ୩୮,୪୩,୦୨୮ ଜଣ ନନ୍ଦନକାନନ ପ୍ରାଣୀ ଉଦ୍ୟାନ ପରିଦର୍ଶନ କରିଥିଲେ ଏବଂ ୧,୭୭,୫୧୧ ଜଣ ରାଜ୍ୟ ଉଦ୍ଭିଦ ଉଦ୍ୟାନ ପରିଦର୍ଶନ କରିଥିଲେ । ୨୦୨୪ ତୁଳନାରେ ଏହା ଯଥେଷ୍ଟ ବୃଦ୍ଧି ବୋଲି କୁହାଯାଉଛି ।

୨୦୨୫ କ୍ୟାଲେଣ୍ଡର ବର୍ଷରେ ସବୁ ଉତ୍ସରୁ ୨୩.୨୩ କୋଟି ଟଙ୍କା ରାଜସ୍ୱ ଆଦାୟ ହୋଇଥିଲା, ଯାହା ୨୦୨୪ ମସିହାରେ ଆଦାୟ ରାଜସ୍ୱ ତୁଳନାରେ ୧.୦୬ କୋଟି ଟଙ୍କା ଅଧିକ । ପରିଦର୍ଶକଙ୍କ ସଂଖ୍ୟା ଏବଂ ରାଜସ୍ୱ ଆଦାୟ ବୃଦ୍ଧି ଉନ୍ନତ ପରିଦର୍ଶକ ସୁବିଧା, ପ୍ରଭାବଶାଳୀ ପରିଚାଳନା ଏବଂ ନନ୍ଦନକାନନର ସଂରକ୍ଷଣ ପାଇଁ ଜନସାଧାରଣଙ୍କ ସମର୍ଥନ, ଶିକ୍ଷା ଏବଂ ପରିବେଶ ପର୍ଯ୍ୟଟନକୁ ପ୍ରତିଫଳିତ କରୁଛି ।