ବାଲେଶ୍ବର ଆକାଶ ମହନ୍ତ ହତ୍ୟା ମାମଲାର ଦୁଇ ଅଭିଯୁକ୍ତ ଗିରଫ, କେମିତି ଘଟିଥିଲା ହତ୍ୟାକାଣ୍ଡ ? ଖୁଲାସା କଲା ପୋଲିସ

ବାଲେଶ୍ବର: ବାଲେଶ୍ବର ଆକାଶ ମହନ୍ତ ହତ୍ୟା ମାମଲାର ପର୍ଦ୍ଦାଫାଶ। ସହଦେବଖୁଣ୍ଟା ପୋଲିସ ହତ୍ୟାକାଣ୍ଡର ଦୁଇ ଅଭିଯୁକ୍ତଙ୍କୁ ଗିରଫ କରିବା ସହ, ସୋମବାର ମାମଲାର ଖୁଲାସା କରିଛି। ଗିରଫ ଦୁଇ ଅଭିଯୁକ୍ତ ରାମ ସିଂ ଓ ତାଙ୍କ ବାନ୍ଧବୀ ମୀନା ଓରଫ ଜେମାମଣୀ ସିଂ ହିଁ ଆକାଶଙ୍କୁ ହତ୍ୟା କରିଥିବା ସ୍ପଷ୍ଟ କରିଛି ପୋଲିସ।

ବାଲେଶ୍ବର ସିଟି ଡିଏସପି ନିର୍ମଳା ଗୋଛାୟତ କହିଛନ୍ତି, ମୃତ ଆକାଶ ଏବଂ ଦୁଇ ଅଭିଯୁକ୍ତ ସମସ୍ତେ ପରସ୍ପରକୁ ଜାଣିଛନ୍ତି। ଜେମାମଣିଙ୍କର ଦୁଇଟି ପୁଅ ଅଛି ହେଲେ ସେ ସେମାନଙ୍କୁ ବଡ଼ଜାମ୍ବଣୀରେ ଛାଡ଼ି ଯାଜପୁରରେ କାମ କରୁଥିଲେ। ତେବେ ତାଙ୍କର ଅଭିଯୁକ୍ତ ରାମ ଚନ୍ଦ୍ର ସିଂହଙ୍କ ସହିତ ପରକୀୟା ସମ୍ପର୍କ ଥିଲା। ରାମ ଚନ୍ଦ୍ର ସେମାନଙ୍କ ଦୁଇ ପୁଅର ଯତ୍ନ ମଧ୍ୟ ନେଉଥିଲେ। ତେଣୁ ଜେମାମଣି ଅଭିଯୁକ୍ତ ରାମ ଚନ୍ଦ୍ର ସହ ସବୁବେଳେ ଫୋନରେ କଥାବାର୍ତ୍ତା କରୁଥିଲେ।

ତେବେ ଗତ ୨୫ ତାରିଖ ଅପରାହ୍ନରେ ଆକାଶ ମହନ୍ତ ଏବଂ ରାମ ଚନ୍ଦ୍ର ସିଂହ ହୋମଗାର୍ଡ ପରୀକ୍ଷାର ଆଡମିଟ୍ କାର୍ଡ ପାଇଁ ବେତନଟୀ ପିଏସକୁ ଘରୁ ବାହାରିଥିଲେ। ହେଲେ ସେଠାରେ ପହଞ୍ଚିବା ପରେ ଜଣାପଡ଼ିଥିଲା ରାମଙ୍କ ଆଡମିଟ୍ କାର୍ଡ ରିଜେକ୍ଟ ହୋଇଛି।

ସେହି ଦିନ ଅଭିଯୁକ୍ତ ଜେମାମଣି ସିଂହ ମଧ୍ୟ ବେତନଟୀ ଆସିଥିଲେ। ଆଉ ଆକାଶ ଓ ରାମ ଆଡମିଟ୍ କାର୍ଡ ଆଣିବାକୁ ଯାଇଥିବା ସମୟରେ ଜେମାମଣି ରାମଙ୍କୁ ଯୋଗାଯୋଗ କରିଥିଲେ। ଏହା ପରେ ଆକାଶ ଓ ରାମ ଜେମାମଣିଙ୍କୁ ଆଣିବାକୁ ଯାଇଥିଲେ । ଜେମାମଣିଙ୍କୁ ବେତନଟୀରୁ ମୋଟର ସାଇକେଲ ଆଣିବା ପରେ ସମସ୍ତେ ସୁରଜ ହୋଟେଲକୁ ଯାଇଥିଲେ। ହୋଟେଲରେ ରୁମ୍ ବୁକ୍ ପାଇଁ ଆକାଶ ନିଜର ଏବଂ ତାଙ୍କ ପତ୍ନୀଙ୍କ ଆଧାର କାର୍ଡ ଦେଇଥିଲେ।

ରୁମ୍ରେ ସେମାନେ ମଦ୍ୟପାନ କରିଥିଲେ। ଏହି ସମୟରେ ଆକାଶ ରାମ ଚନ୍ଦ୍ର ସିଂଙ୍କୁ ଜେମାମଣିଙ୍କ ସମ୍ପର୍କ ବିଷୟରେ ପଚାରିଥିଲେ। କିନ୍ତୁ ରାମ ସିଂ ଜେମାମଣି ସିଂଙ୍କ ସହିତ ଏପରି କରିବାକୁ ମନା କରିଥିଲେ। ତେବେ କିଛି ସମୟ ପରେ ଆକାଶ, ବଜାରରୁ ଖାଦ୍ୟ ଏବଂ ମଦ୍ୟପାନ କରିବା ପାଇଁ ହୋଟେଲ ରୁମ୍ ଛାଡ଼ି ଚାଲିଯାଇଥିଲେ। ହେଲେ ଫେରିବା ପରେ ସେମାନେ ପୁଣି ମଦ୍ୟପାନ କରିଥିଲେ। ଏହା ପରେ ଆକାଶ ଜେମାମଣି ସିଂଙ୍କ ସହିତ ଶାରୀରିକ ସମ୍ପର୍କ ରଖିବାକୁ ଚାହୁଁଥିଲେ। ହେଲେ ଏଥିପାଇଁ ଅଭିଯୁକ୍ତ ରାମ ସିଂ ଆକାଶଙ୍କୁ ମନା କରିଥିଲେ। ଯେଉଁଥିରୁ ଉଭୟଙ୍କ ମଧ୍ୟରେ ବଚସା ହୋଇଥିଲା।

ଆଉ ଏଥିରେ ରାଗିଯାଇ ରାମ ସିଂ ଆକାଶଙ୍କ ଛାତିକୁ ଆକ୍ରମଣ କରିଥିଲେ। ଏହା ପରେ ତାଙ୍କ ହାତକୁ ଟି-ସାର୍ଟ ଦ୍ବାରା ବାନ୍ଧି ଦେଇଥିଲେ। ଏହି ସମୟରେ ଜେମାମଣି ମଧ୍ୟ ରାମ ସିଂଙ୍କୁ ସହାୟତା କରିଥିଲେ। ଏହା ପରେ ରାମ ସିଂ ଆକାଶଙ୍କ ବେକକୁ ଚିପି ଧରିଥିଲେ। ଏଥିରେ ତାଙ୍କର ପ୍ରାଣବାୟୁ ଉଡ଼ିଯାଇଥିଲା। ହତ୍ୟା ରାମସିଂ ଏବଂ ଜେମାମଣି ସେଠାରେ ଫେରାର ହୋଇଯାଇଥିଲା।