ବାଂଲାଦେଶରେ ପୁଣି ହିନ୍ଦୁ ହତ୍ୟା : ମିଠା ଦୋକାନୀଙ୍କୁ ପିଟିପିଟି ମାରିଦେଲେ, କୋଦାଳରେ ଫଟାଇଦେଲେ ମୁଣ୍ଡ

ଢାକା,୧୮|୦୧: ବାଂଲାଦେଶରେ ଆଉ ଜଣେ ହିନ୍ଦୁଙ୍କୁ ହତ୍ୟା । ସାମାନ୍ୟ କଥାରୁ ଜଣେ ହିନ୍ଦୁ ବ୍ୟବାସାୟୀଙ୍କୁ ପିଟିପିଟି ହତ୍ୟା କରାଯାଇଛି । ଦେଶର କାଲିଗଞ୍ଜ ଅଞ୍ଚଳରେ ଶନିବାର ସକାଳେ ଏହି ଅଭାବନୀୟ ଘଟଣା ଘଟିଛି । ଯାହା ପରେ ସ୍ଥାନୀୟ ଅଞ୍ଚଳରେ ସଂଖ୍ୟାଲଘୁ ଆତଙ୍କିତ ଅବସ୍ଥାରେ ରହିଛନ୍ତି ।

ରିପୋର୍ଟ ଅନୁସାରେ, ମୃତ ଯୁବକ ହେଲେ ଲିଟନ କୁମାର ଦାସ । ତାଙ୍କର କାଲିଗଞ୍ଜ ଅଞ୍ଚଳରେ ଏକ ମିଠା ଦୋକାନ ରହିଛି । ଶନିବାର ସକାଳେ ଜଣେ ଗ୍ରାହକ ତାଙ୍କ ପାଖକୁ କିଛି କିଣିବାକୁ ଆସିଥିଲେ । କିନ୍ତୁ ଏହି ସମୟରେ କୌଣସି କଥାକୁ ନେଇ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ଯାହା ହାତାହାତି ଯାଏଁ ଯାଇଥିଲା । ପରେ ଗ୍ରାହକଜଣଙ୍କ ଲିଟନଙ୍କୁ ଅନ୍ୟ କିଛି ସହଯୋଗୀଙ୍କ ସହ ମିଶି ପ୍ରବଳ ମାଡ ମାରିଥିଲେ । ରାସ୍ତାରେ ଘୋଷାରି ତାଙ୍କୁ ଆକ୍ରମଣ ହୋଇଥିଲା । ଯାହାଦ୍ୱାରା ସେ ଗୁରୁତର ହୋଇ ଆଖି ବୁଜିଛନ୍ତି । ଦୋକାନରେ ଅନ୍ୟ କର୍ମଚାରୀ ଥିଲେ ମଧ୍ୟ ଲିଟନଙ୍କୁ ରକ୍ଷା କରିବା ପାଇଁ କାହାରି ସାହସ ହୋଇନଥିଲା ।

ସ୍ଥାନୀୟ ଲୋକଙ୍କ କହିବାନୁସାରେ, କିଛି ନିର୍ଦ୍ଦିଷ୍ଟ ଧର୍ମର ଲୋକେ ପ୍ରଥମେ ଲିଟନଙ୍କୁ ଗୋଇଠା ମାରିଥିଲେ । ଏହାପରେ ଏକ କୋଦାଳ ଧରି ତାଙ୍କ ପିଠି ଏବଂ ମୁଣ୍ଡକୁ ଆକ୍ରମଣ କରିଥିଲେ ସେମାନେ । ଫଳରେ ଗୁରୁତର ହୋଇ ଘଟଣାସ୍ଥଳରେ ହିଁ ଲିଟନଙ୍କ ମୃତ୍ୟୁ ହୋଇଯାଇଥିଲା ।

ଘଟଣା ବାବଦରେ ଜଣାପଡିବା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ଲାଗି ରହିଛି । ପୋଲିସ ମାମଲାକୁ ଗୁରୁତର ସହ ନେଇ ତଦନ୍ତ ଆରମ୍ଭ କରିଛି । ଅନ୍ୟ ଦିଗରେ ସଂଖ୍ୟାଲଘୁମାନେ ଘରୁ ବାହାରିବାକୁ ଭୟ କରୁଛନ୍ତି । ନିଜର ସୁରକ୍ଷା ପାଇଁ ସେମାନେ ସରକାରଙ୍କ ନିକଟରେ ଦାବି ରଖିଛନ୍ତି ।

ସୂଚନାଯୋଗ୍ୟ, ଅନ୍ୟ ଏକ ଘଟଣାରେ ଜଣେ ହିନ୍ଦୁ ପେଟ୍ରୋଲ ପମ୍ପ କର୍ମଚାରୀ ରିପନ ଶାହଙ୍କୁ ହତ୍ୟା କରାଯାଇଛି । ସେ କରିମ୍ ଫୁଏଲ୍ ଷ୍ଟେସନରେ କାର୍ଯ୍ୟ କରୁଥିଲେ । ଏକ କଳା ରଙ୍ଗର ଗାଡିରେ କିଛି ବ୍ୟକ୍ତି ଆସି ତେଲ ପକାଇଥିଲେ । କିନ୍ତୁ ଟଙ୍କା ନଦେଇ ଫେରାର ହୋଇଯାଉଥିଲେ । ଏହାକୁ ଅଟକାଇବା ବେଳେ ରିପନଙ୍କ ଉପରେ ସେମାନେ ଗାଡି ଚଢାଇ ଦେଇଥିଲେ । ଫଳରେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଯାଇଥିଲା ।