ଉସ୍ମାନ ତାରିକଙ୍କ ପାଇଁ ଭାରତ କରିଛି ଖାସ୍ ପ୍ରସ୍ତୁତି, ଅଧିନାୟକ ସୂର୍ଯ୍ୟ କହିଲେ- ଆମେ ସରେଣ୍ଡର କରି ପାରିବୁ ନାହିଁ

ନୂଆଦିଲ୍ଲୀ: ଭାରତ ବନାମ ପାକିସ୍ତାନ ମହାମୁକାବିଲାକୁ ଆଉ କେଇ ଘଣ୍ଟା ବାକି ରହିଲା। ଏହା ପୂର୍ବରୁ ଶନିବାର ସାମ୍ବାଦିକ ସମ୍ମିଳନୀରେ ଅନେକ ପ୍ରଶ୍ନର ଉତ୍ତର ରଖିଛନ୍ତି ଅଧିନାୟକ ସୂର୍ଯ୍ୟକୁମାର ଯାଦବ। ପ୍ରଥମ ଦୁଇଟି ମ୍ୟାଚରେ ଦଳର ବ୍ୟାଟିଂ କ୍ରମ ଆଶାନୁରୂପ ପ୍ରଦର୍ଶନ କରି ପାରି ନ ଥିବା ସ୍ଵୀକାର କରିଛନ୍ତି ସୂର୍ଯ୍ୟକୁମାର ଯାଦବ। ସେ ଆଶା ପ୍ରକାଶ କରିଛନ୍ତି ଯେ, ତାଙ୍କର ବ୍ୟାଟର ପାକିସ୍ତାନର ରହସ୍ୟମୟୀ ସ୍ପିନର ଉସ୍ମାନ ତାରିକଙ୍କ ମୁକାବିଲା କରି ପାରିବେ। ସେ ତାରିକଙ୍କ ବୋଲିଂକୁ ପରୀକ୍ଷାର ପାଠ୍ୟକ୍ରମ ବାହାରର ପ୍ରଶ୍ନ ବୋଲି କହିଛନ୍ତି। ଭାରତକୁ ଆମେରିକା ବିପକ୍ଷରେ ୭୭ ରନରେ ୬ ଓ୍ଵିକେଟ୍ ଏବଂ ନାମିବ୍ୟା ବିପକ୍ଷରେ ଶେଷ ଓଭର ଗୁଡ଼ିକରେ ୪ ରନ ଭିତରେ ୫ ଓ୍ଵିକେଟ୍ ହରାଇବା ଭାରତର ଦୁର୍ବଳତାକୁ ଉଜାଗର କରିଥିଲା।

.ସୂର୍ଯ୍ୟକୁମାର ଯାଦବ ରବିବାର ପାକିସ୍ତାନ ବିପକ୍ଷ ବିଶ୍ଵକପର ଗୁରୁତ୍ଵପୂର୍ଣ୍ଣ ମୁକାବିଲାର ପୂର୍ବ ସନ୍ଧ୍ୟାରେ କହିଛନ୍ତି, ଦେଖନ୍ତୁ ବେଳେ ବେଳେ ପରୀକ୍ଷାରେ ମଧ୍ୟ ସିଲାବସ ବାହାରୁ ପ୍ରଶ୍ନ ଆସିଯାଏ। ମାତ୍ର ଆମେ ତ ପ୍ରଶ୍ନକୁ ଛାଡ଼ି ପାରିବା ନାହିଁ। ଏହାର ମୁକାବିଲା ପାଇଁ ନିଜସ୍ଵ ତରିକା ଆପଣେଇବାକୁ ପଡ଼ିଥାଏ। ହଁ ଏହା ସତ ତାରିକ ଭିନ୍ନ ଶୈଳୀର ବୋଲର। ତା ମାନେ ନୁହେଁ ଆମେ ଆତ୍ମ ସମର୍ପଣ କରିବୁ। ଆମେ ନେଟ୍ସରେ ଏମିତି ହିଁ ଆକ୍ସନର ବୋଲରଙ୍କ ବିପକ୍ଷରେ ଅଭ୍ୟାସ କରୁଛୁ। ଯାହା ଅଭ୍ୟାସ କରିଛୁ ତାକୁ ମ୍ୟାଚରେ ଲାଗୁ କରିବାକୁ ଉଦ୍ୟମ କରିବୁ।

ଭାରତୀୟ ବ୍ୟାଟରଙ୍କ ସାମ୍ନାରେ ରବିବାର ପ୍ରେମଦାସା ଷ୍ଟାଡିୟମର ମନ୍ଥର ପିଚରେ ପାକିସ୍ତାନ ସ୍ପିନର ଆକ୍ରମଣର ପରୀକ୍ଷା ରହିବ। ଆଉ ପାକିସ୍ତାନ ସ୍ପିନ ବୋଲିଂର ନେତୃତ୍ଵ ନେବେ ଉସ୍ମାନ ତାରିକ। ତାଙ୍କର ବୋଲିଂ ଶେଳୀ ପୋଜ ଆଣ୍ଡ ଡେଲିଭରୀ ଆକ୍ସନକୁ ନେଇ କ୍ରିକେଟ୍ ଜଗତରେ ବଡ଼ ବିତର୍କର ବିଷୟ ପାଲଟିଛି।

ସୂର୍ଯ୍ୟକୁମାର କହିଛନ୍ତି, ଆମର ଆରମ୍ଭ କିଛିଟା ଅସ୍ଥିର ରହିଛି। ଏହା ସତ ଯେ, ପ୍ରଥମ ଦୁଇଟି ମ୍ୟାଚ୍ ଟି-୨୦ ପାଇଁ ଆଦର୍ଶ ପିଚ୍ ନ ଥିଲା। ମାତ୍ର କୌଣସି ବାହାନା ଚଳିବ ନାହିଁ। ଆମେ ମଜବୁତିର ସହ ମ୍ୟାଚରେ ପ୍ରତ୍ୟାର୍ତ୍ତନ କରିବାରେ ସଫଳ ହୋଇଛୁ। ଏହା ଟି-୨୦ କ୍ରିକେଟର ସୁନ୍ଦରତା। ଜଣେ ଦୁଇ ଜଣ ବ୍ୟାଟର ସଫଳ ହେଲେ ମ୍ୟାଚର ଗତି ବଦଳିପାରେ। ସୂର୍ଯ୍ୟ ସ୍ଵୀକାର କରିଛନ୍ତି ଯେ, ପାକିସ୍ତାନର ସ୍ପିନର ଭାରତୀୟ ବ୍ୟାଟରଙ୍କୁ ଚ୍ୟାଲେଞ୍ଜ ଦେବେ।