ବିସିସିଆଇର U-19 ପୋଷ୍ଟମର୍ଟମ୍: ଆୟୁଷ ମାତ୍ରେଙ୍କୁ ଘନ ଘନ କଲ୍, ରିପୋର୍ଟ ଦେବାକୁ ନିର୍ଦ୍ଦେଶ

ନୂଆଦିଲ୍ଲୀ, ୨୩/୧୨: ଅଣ୍ଡର-19 ବିଶ୍ୱକପ୍ ଫାଇନାଲରେ ଅତି ଶୋଚନୀୟ ଭାବେ ପରାସ୍ତ ହୋଇଛି ଟିମ୍ ଇଣ୍ଡିଆ । ମୁକାବିଲାରେ କୌଣସି ଖେଳାଳି ଭଲ ପ୍ରଦର୍ଶନ କରିପାରିନଥିଲେ । ପାକିସ୍ତାନ କରିଥିବା ରନର ପାହାଡ ଆଗରେ ଭାରତୀୟ ବ୍ୟାଟର ଆଣ୍ଠେଇଥିଲେ । ବୈଭବ ସୂର୍ଯ୍ୟବଂଶୀ ଏବଂ ଆୟୁଷ ମାତ୍ରେଙ୍କ ଭଳି ଆଇପିଏଲ ଷ୍ଟାର୍ ଥାଇ ମଧ୍ୟ ଦଳ ବିପର୍ଯ୍ୟର ସାମ୍ନା କରିଥିଲା । ୩୪୮ ରନର ବିଜୟ ଲକ୍ଷ୍ୟକୁ ପିଛା କରୁଥିବା ଚିମ୍ ୧୯୧ ରନରେ ହାରିଯାଇଥିଲା ।ତେବେ ଭାରତର ଏପରି ପ୍ରଦର୍ଶନରେ ଖପ୍ପା ହୋଇଛି ବିସିସିଆଇ ।

ରିପୋର୍ଟ ଅନୁସାରେ, ବିସିସିଆଇ ଭାରତୀୟ ଚିମର ପ୍ରଦର୍ଶନ ଉପରେ କଡା ନଜର ରଖିଛି । ପାକିସ୍ତାନଠୁ ହାରିବାର କାରଣ ଖୋଜିବା ପାଇଁ ଅଧିନାୟକ ମାତ୍ରେଙ୍କୁ ବୋର୍ଡ ଅଧିକାରୀ କଲ୍ କରିଛନ୍ତି । ଏପରିକି କିଛି ବରିଷ୍ଠ ଅଧିକାରୀ ଦଳର ପ୍ରଦର୍ଶନ ନେଇ ଆଲୋଚନା କରିଛନ୍ତି ।

ପୂର୍ବରୁ ଦଳର ମ୍ୟାନେଜର ବିଜୟ କିମ୍ବା ପରାଜୟର ରିପୋର୍ଟ ପ୍ରଦାନ କରିଥାନ୍ତି । କିନ୍ତୁ ଚଳିଚ ଥର ବିସିସିଆଇ କୋଚ୍ ହୃଷିକେଶ କନିତକାର ଏବଂ ଅଧିନାୟକ ଆୟୁଷ ମାତ୍ରେଙ୍କୁ ତଲବ କରିଛି । ସେମାନଙ୍କୁ ରିପୋର୍ଟ ଦେବା ପାଇଁ ନିର୍ଦ୍ଦେଶ ଦିଆଯାଇଛି ।

ସେପଟେ ମୁକାବିଲାରେ ମାତ୍ରେ ଏବଂ ସୂର୍ଯ୍ୟବଂଶୀ ଅଧିକ ଆକ୍ରମଣାତ୍ମକ ବ୍ୟବହାର ଦେଖାଇଥିଲେ । ପାକ୍ ଖେଳାଳିଙ୍କୁ ସେମାନେ ଗାଳି ଗୁଲଜ କରିଥିବା ଦେଖିବାକୁ ମିଳିଥିଲା । ତେବେ ମାତ୍ରେଙ୍କୁ ମଗା ଯାଇଥିବା ରିପୋର୍ଟରେ ଖେଳାଳିଙ୍କ ଆଚାର ବ୍ୟବହାର ବାବଦରେ ଉଲ୍ଲେଖ ରହିଛି ନା ନାହିଁ ତାହା ସ୍ପଷ୍ଟ ହୋଇନାହିଁ । ସେପଟେ ଆଶନ୍ତା ଫେବ୍ରୁଆରୀରେ ଅଣ୍ଡର ୧୯ ବିଶ୍ୱକପ୍ ଖେଳାଯିବ । ସେଥିପାଇଁ ଦଳକୁ ପ୍ରସ୍ତୁତ ହେବାକୁ ପଡିବ ।

ସୂଚନାଯୋଗ୍ୟ, ପରାଜୟ ପରେ ମାତ୍ରେ କହିଥିଲେ ଯେ, ସେମାନେ ପ୍ରଥମେ ବୋଲିଂ କରିବା କଥା ଆଗରୁ ଭାବିଥିଲେ । କିନ୍ତୁ ବୋଲିଂରେ ସେତେଟା ସନ୍ତୁଳନ ରହିନଥିଲା । ତେଣୁ ପାକିସ୍ତାନ ଏବେ ବଡ ସ୍କୋର କରିପାରିଥିବା ସେ ପ୍ରକାଶ କରିଥିଲେ ।