‘ଇସଲାମିକ୍‌ ବୋମାକୁ ରୋକିପାରିଥାନ୍ତା ଭାରତ…’: ପାକିସ୍ତାନ ନ୍ୟୁକ୍ଲିୟର ପ୍ଲାଣ୍ଟ ଉପରେ ଏୟାରଷ୍ଟ୍ରାଇକ୍‌ ପ୍ରସ୍ତାବକୁ ପ୍ରତ୍ୟାଖାନ କରିଥିଲେ ଇନ୍ଦିରା ସରକାର

ନୂଆଦିଲ୍ଲୀ: ୧୯୮୦ ଦଶକରେ ଇସଲାମିକ୍‌ ବମ୍‌ ଉଦ୍ଦେଶ୍ୟକୁ ରୋକିପାରିଥାନ୍ତା ଭାରତ କିନ୍ତୁ ଇସ୍ରାଏଲର ପ୍ରସ୍ତାବକୁ ପ୍ରତ୍ୟାଖାନ କରିଥିଲେ ତତ୍କାଳୀନ ଇନ୍ଦିରାଙ୍କ ସରକାର। ଏଭଳି ଚାଞ୍ଚଲ୍ୟକର ଦାବି କରିଛନ୍ତି ପୂର୍ବତନ CIA ଅଧିକାରୀ ରିଚାର୍ଡ ବାର୍ଲୋ। ଇସ୍ରାଏଲ ଦ୍ୱାରା ପାକିସ୍ତାନର କାହୁଟା ପରମାଣୁ ପ୍ଲାଣ୍ଟ ଉପରେ ପ୍ରସ୍ତାବିତ ଏୟାରଷ୍ଟ୍ରାଇକରେ ଅନେକ ସମସ୍ୟାର ସମାଧାନ କରାଯାଇପାରିଥାନ୍ତା। କିନ୍ତୁ ଇନ୍ଦିରା ଗାନ୍ଧୀ ଏହାକୁ ଅନୁମୋଦନ କରି ନଥିଲେ। ଯାହା ଦୁଃଖର ବିଷୟ ଏବଂ ଲଜ୍ଜାଜନକ ବୋଲି କହିଛନ୍ତି ବାର୍ଲୋ।

ପୂର୍ବତନ CIA ସଦସ୍ୟ ବାର୍ଲୋ 1980 ଦଶକରେ ପାକିସ୍ତାନର ଗୁପ୍ତ ପରମାଣୁ କାର୍ଯ୍ୟକଳାପ ସମୟରେ ଆମେରିକୀୟ ଗୁଇନ୍ଦା ସଂସ୍ଥା ବରିଷ୍ଠ ଅଧିକାରୀ ଭାବରେ କାର୍ଯ୍ୟ କରିଥିଲେ। ସେ ସ୍ପଷ୍ଟ କରିଥିଲେ ଯେ ସେ ଗୁଇନ୍ଦା ମହଲରେ ଏହି କଥିତ ଯୋଜନା ବିଷୟରେ ଶୁଣିଥିଲେ, କିନ୍ତୁ ସେ ସମୟରେ ସରକାରୀ ଚାକିରି ବାହାରେ ଥିବାରୁ ସେ ସିଧାସଳଖ ସମ୍ପୃକ୍ତ ନଥିଲେ।

ବାର୍ଲୋ କହିଛନ୍ତି, "ମୁଁ ୧୯୮୨ ରୁ ୧୯୮୫ ପର୍ଯ୍ୟନ୍ତ ସରକାର ବାହାରେ ଥିଲି। ମୁଁ ସରକାର ବାହାରେ ଥିବା ସମୟରେ ଏହା ଘଟିଥାଇପାରେ। ମୁଁ ବେଳେବେଳେ ଏହା ବିଷୟରେ ଶୁଣିଥିଲି, କିନ୍ତୁ ମୁଁ ସମ୍ପୂର୍ଣ୍ଣ ଭାବରେ ସାମିଲ ହୋଇନଥିଲି କାରଣ ଏହା କେବେ ଘଟିନଥିଲା। ଏହା ଦୁଃଖର ବିଷୟ ଯେ ଇନ୍ଦିରା ଗାନ୍ଧୀ ଏହାକୁ ଅନୁମୋଦନ କରିନଥିଲେ; ଏହା ଅନେକ ସମସ୍ୟାର ସମାଧାନ କରିଥାନ୍ତା।"

ରିପୋର୍ଟ ଏବଂ ଗୋପନୀୟ ବିବରଣୀ ଅନୁଯାୟୀ, ପାକିସ୍ତାନର କାହୁଟା ୟୁରାନିୟମ ସମୃଦ୍ଧି ପ୍ଲାଣ୍ଟ। ଇସଲାମବାଦର ପରମାଣୁ କାର୍ଯ୍ୟକ୍ରମର ଛାତି କୁହାଯାଏ। ଏହା ଉପରେ ଏକ ପ୍ରାକ୍-ଆକ୍ରମଣାତ୍ମକ ବିମାନ ଆକ୍ରମଣ ଯୋଜନା କରିଥିବା ରିପୋର୍ଟ ହୋଇଛି। ଯାହା ଇସଲାମାବାଦକୁ ପରମାଣୁ ଅସ୍ତ୍ର ବିକାଶ ଏବଂ ପ୍ରସାର କରିବାରୁ ରୋକିବା ପାଇଁ ଥିଲା। ବାର୍ଲୋ ପରାମର୍ଶ ଦେଇଥିଲେ ଯେ ତତ୍କାଳୀନ ରାଷ୍ଟ୍ରପତି ରୋନାଲ୍ଡ ରେଗାନଙ୍କ ନେତୃତ୍ୱରେ ଆମେରିକା ପ୍ରଶାସନ ଏପରି ଯେକୌଣସି ଆକ୍ରମଣକୁ ଦୃଢ଼ ବିରୋଧ କରିଥାନ୍ତେ। କାରଣ ଏହା ଆଫଗାନିସ୍ତାନରେ ସୋଭିଏତ୍ ୟୁନିଅନ୍ ବିରୁଦ୍ଧରେ ଆମେରିକାର ଗୁପ୍ତ ଯୁଦ୍ଧ ପ୍ରୟାସକୁ ବାଧା ଦେଇଥାନ୍ତା।