ମହଙ୍ଗା ପଡିଲା ନିଶା ଖାଇ ସ୍କୁଲ ଆସିବା, କଡା କାର୍ଯ୍ୟାନୁଷ୍ଠାନ ନେଲେ ଗୋଷ୍ଠୀ ଶିକ୍ଷା ଅଧିକାରୀ

ବୌଦ୍ଧ ୦୨/୧୨: କୁହାଯାଏ ବିଦ୍ୟାଳୟ ଶିକ୍ଷାର ମନ୍ଦିର । ଆଉ ଶିକ୍ଷକ ହେଉଛନ୍ତି ସେହି ବିଦ୍ୟାଳୟର ଦେବତା । କିନ୍ତୁ ଯଦି ଗୁରୁ ଯଦି ଅବାଟକୁ ଯାନ୍ତି ବା ନିୟମ ବାହାରକୁ ଯାଆନ୍ତି ତେବେ କଥା ସରିଲା । ଆଉ ସେମିତି ବଡ ଭୁଲ କରି ଦଣ୍ଡ ଭୋଗିଛନ୍ତି ଜଣେ ଶିକ୍ଷକ । ହରଭଙ୍ଗା ବ୍ଲକରେ ଅମାନିଆ ଶିକ୍ଷକଙ୍କ ଉପରେ ପଡିଛି ଶନିଦଶା । ତାଙ୍କର ଏପରି ଆଚରଣ ପାଇଁ ଦଣ୍ଡ ଦେଇଛି ଶିକ୍ଷା ବିଭାଗ ।

ମଦ୍ୟପାନ କରି ସ୍କୁଲକୁ ଆସିବା ଜଣେ ଶିକ୍ଷକଙ୍କୁ ପଡିଛି ମହଙ୍ଗା । ଶିକ୍ଷକଙ୍କ ଉପରେ କଡା କାର୍ଯ୍ୟାନୁଷ୍ଠାନ ଗ୍ରହଣ କଲେ ହରଭଙ୍ଗା ଗୋଷ୍ଠୀ ଶିକ୍ଷା ଅଧିକାରୀ ହାଡ଼ିବନ୍ଧୁ ବେହେରା । ଗୋଟିଏ ଦିନର ଦରମା ବନ୍ଦ ସହ ଆରମ୍ଭ ହେଲା ବିଭାଗୀୟ ତଦନ୍ତ ପ୍ରକ୍ରିୟା । ଶିକ୍ଷକ ଜଣକ ହେଲେ ହରଭଙ୍ଗା ବ୍ଲକ ଝାରଖମଣ ପ୍ରାଥମିକ ବିଦ୍ୟାଳୟର ଶିକ୍ଷକ ସୁରମଣି ମଲ୍ଲିକ ।

ସୂଚନାଥାଉକି, ଗତ ୨୭ ତାରିଖରେ କର୍ତ୍ତବ୍ୟରେ ଅବହେଳା କାରଣରୁ ୧୦ ଜଣ ଶିକ୍ଷକଙ୍କୁ କାରଣ ଦର୍ଶାଅ ନୋଟିସ ସହ ଦିନକର ଦରମା ବନ୍ଦ କରିଥିଲେ ହରଭଙ୍ଗା ଗୋଷ୍ଠି ଶିକ୍ଷା ଅଧିକାରୀ । ଏଥିରେ ସୁରମଣି ମଲ୍ଲିକଙ୍କ ଉପରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା । ହେଲେ ପରବର୍ତ୍ତୀ ସମୟରେ ଏହି ୧୦ ଜଣ ଶିକ୍ଷକଙ୍କ କାର୍ଯ୍ୟକଳାପକୁ ନେଇ ତଦନ୍ତ କରିବାରୁ ଜଣେ ଶିକ୍ଷକଙ୍କ କାର୍ଯ୍ୟକଳାପକୁ ନେଇ ଖପା ହୋଇଥିଲେ BEO ।

ଶିକ୍ଷକ ଜଣକ ପ୍ରତିଦିନ ସ୍କୁଲକୁ ମଦ୍ୟପାନ କରି ଆସୁଥିଲେ । ଛାତ୍ରଛାତ୍ରୀ ଙ୍କୁ ପାଠ ପଢେଇବା ପରିବର୍ତ୍ତେ ମୋବାଇଲରେ ମଜ୍ଜି ରହୁଥିଲେ ବୋଲି ଜାଣିବାକୁ ପାଇଥିଲେ । ଏଥିସହିତ ସ୍କୁଲକୁ ମନ ଇଛା ସମୟରେ ଆସିବା ସହ ଉଚ୍ଚ ପଦସ୍ଥ ଅଧିକାରୀ ଙ୍କୁ ନଜଣାଇ ସ୍କୁଲରେ ଅନୁପସ୍ଥିତ ରହୁଥିଲେ । ଏନେଇ ବିଭାଗ ପକ୍ଷରୁ ତଦନ୍ତ ପରେ ସତ ସାମ୍ନାକୁ ଆସିଥିଲା । ଆଉ ଏବେ ବ୍ଲକ ଶିକ୍ଷାଅଧିକାରୀ ନେଇଛନ୍ତି ଦୃଢ଼ କାର୍ଯ୍ୟାନୁଷ୍ଠାନ ।

ପୂର୍ବରୁ କାରଣ ଦର୍ଶାଓ ନୋଟିସ ର ଉତ୍ତର ନ ଦେଇ ଥିବାରୁ ଏବେ ଗୋଟିଏ ଦିନର ଦରମା ବନ୍ଦ ସହ ବିଭାଗୀୟ ତଦନ୍ତ ଆରମ୍ଭ ହୋଇଛି । ୩୦ ଦିନ ମଧ୍ୟରେ ଏହାର ଜବାବ ରଖିବାକୁ ପତ୍ର ସଂଖ୍ୟା ୩୧୧୪ ରେ ଉଲ୍ଲେଖ କରାଯାଇଛି । ଅନ୍ୟପଟେ ଶିକ୍ଷକମାନେ ଠିକ ସମୟରେ ସ୍କୁଲ ଯିବା ସହ ଛାତ୍ରଛାତ୍ରୀ ଙ୍କୁ ଶିକ୍ଷାଦାନ କରନ୍ତୁ ଓ ବିଭାଗ କୁ ଆଗକୁ ନେବା ପାଇଁ ବ୍ଲକ ଶିକ୍ଷାଅଧିକାରୀ ହାଡ଼ିବନ୍ଧୁ ବେହେରା କହିଛନ୍ତି ।