ୟୁକ୍ରେନ-ଆମେରିକା କଥାବାର୍ତ୍ତା ପରେ ଆଉ ଟେରିଟରୀକୁ ନେଇ ହେବନି ବୁଝାମଣା: ଋଷୀୟ ଅଧିକାରୀ

ମସ୍କୋ ୩।୧୨: ବରିଷ୍ଠ ଆମେରିକୀୟ ଅଧିକାରୀ ଓ ଋଷିଆ ରାଷ୍ଟ୍ରପତି ଭ୍ଲାଦିମୀର ପୁଟିନଙ୍କ ମଧ୍ୟରେ ମସ୍କୋରେ ମଙ୍ଗଳବାର ହୋଇଥିବା ବାର୍ତ୍ତାକୁ ନେଇ ଋଷୀୟ ଅଧିକାରୀଙ୍କ ବୟାନ ଆସିଛି। ଅଧିକାରୀ କହିଛନ୍ତି ଯେ ମସ୍କୋର ଯୁଦ୍ଧ ସମାପ୍ତ ପାଇଁ ୟୁକ୍ରେନୀୟ ଟେରିଟରି ଉପରେ ନିୟନ୍ତ୍ରଣ ଭଳି ଗୁରୁତ୍ୱପୂର୍ଣ୍ଣ ପ୍ରସଙ୍ଗକୁ ନେଇ କୌଣସି ‘ବୁଝାମଣା’ ହୋଇନି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବିଶେଷ ଦୂତ ଷ୍ଟିଭ ଭିଟକଫ ଓ ଜ୍ୱାଇଁ ଜେରେଡ କୁସନର ଋଷିଆ ରାଜଧାନୀ ମସ୍କୋରେ ପୁଟିନଙ୍କୁ ଭେଟିଥିଲେ। ଏହି ସାକ୍ଷାତ ଆଲୋଚନା ଏପରି ସମୟରେ ହୋଇଛି ଯେତେବେଳେ ଦ୍ୱିତୂୀୟ ବିଶ୍ୱଯୁଦ୍ଧ ପରେ ୟୁରୋପରେ ଜାରି ସବୁଠୁ ଘାତକ ଯୁଦ୍ଧକୁ ସମାପ୍ତ କରିବା ପାଇଁ ଆମେରିକା ମଧ୍ୟସ୍ଥତା କରିବାକୁ ଚାହୁଁଛି।

ପୁଟିନ ଓ ଟ୍ରମ୍ପଙ୍କ ପ୍ରତିନିଧି ମଣ୍ଡଳ ମଧ୍ୟରେ ଆଲୋଚନା ପାଖାପାଖି ୫ ଘଣ୍ଟା ଚାଲିଥିଲା ଓ ମଧ୍ୟରାତ୍ର ପରେ ସମାପ୍ତ ହୋଇଛି। ବୈଠକରେ ସାମିଲ କ୍ରେମଲିନର ଶୀର୍ଷ ସହଯୋଗୀ ୟୁରି ଉଶାକୋଭ କହିଛନ୍ତି ଯେ ‘ଏ ପର୍ଯ୍ୟନ୍ତ ଆମେ କୌଣସି ବୁଝାମଣାରେ ଉପନୀତ ହୋଇ ନାହୁଁ, ହେଲେ ଆମେରିକା ପକ୍ଷରୁ ପ୍ରସ୍ତାବିତ କିଛି ସମାଧାନ ଉପରେ ଚର୍ଚ୍ଚା କରାଯାଇ ପାରେ’। ଯଦିଓ ଉଶାକୋଭ ଏହି ଆଲୋଚନାକୁ ରଚନାତ୍ମକ ବୋଲି କହିଛନ୍ତି, ସେ ଏକଥା ଉପରେ ମଧ୍ୟ ଜୋର ଦେଇଛନ୍ତି ଯେ ‘ୱାସିଂଟନ ଓ ମସ୍କୋ ମଧ୍ୟରେ ଏବେବି ଅନେକ କାମ ବାକି ଅଛି’।

ଆମେରିକୀୟ ପ୍ରତିନିଧିମଣ୍ଡଳ ଶାନ୍ତି ଯୋଜନା ଉପରେ ଆଲୋଚନା କରିବା ପାଇଁ ଋଷିଆ ରାଜଧାନୀ ଆସିଥିଲେ, ଯାହାକୁ ୱାସିଂଟନ ଅପଡେଟ୍ କରିଛି। କାରଣ ଏହା ପୂର୍ବରୁ ଲିକ୍ ହୋଇଥିବା ୨୮ ସୂତ୍ରୀ ପ୍ରସ୍ତାବକୁ ୟୁକ୍ରେନ ଓ ତାର ସହଯୋଗୀ ଆମେରିକା ଋଷିଆର ପକ୍ଷ ନେଉଥିବାରୁ କଡ଼ା ସମାଲୋଚନା କରିଥିଲେ। କ୍ରେମଲିନ କିଭ୍ ଓ ୟୁରୋପ ପରେ ସବୁ ପ୍ରସ୍ତାବକୁ ନିନ୍ଦା କରିଛି। ପୁଟିନ ବାରମ୍ବାର କହୁଛନ୍ତି ଏହା ତାଙ୍କ ଦେଶ ଲାଗି ଅସ୍ୱୀକାର୍ଯ୍ୟ। ତେବେ ଆମେରିକୀୟ ଅଧିକାରୀଙ୍କ ସହ ବୈଠକ ପୂର୍ବରୁ ଋଷୀୟ ନେତା ଏକ ନିବେଶମଞ୍ଚ ଉପରେ ଆକ୍ରମକ ଟିପ୍ପଣୀ କରିଥିଲେ। ଯେଉଁଥିରେ ତାଙ୍କ ଦେଶ ୟୁରୋପ ସହ ମଧ୍ୟ ଲଢିବାକୁ ପ୍ରସ୍ତୁତ ବୋଲିକହିଥିଲେ।

ଏଥି ମଧ୍ୟରେ ଆୟରଲ୍ୟାଣ୍ଡ ଗସ୍ତରେ ଥିବା ୟୁକ୍ରେନ ରାଷ୍ଟ୍ରପତି ଭୋଲଦେମୀର ଜେଲେନସ୍କି କହିଛନ୍ତି ଯେ ‘ସମ୍ମାନଜନକ ଶାନ୍ତିର ଆବଶ୍ୟକତା ରହିଛି’। ଡବଲିନରେ ଏକ କାର୍ଯ୍ୟକ୍ରମରେ ଶାନ୍ତି ପ୍ରକ୍ରିୟାରୁ ଆମେରିକାର ଋଚି ହଟିଯିବ ବୋଲି ଆପଣ ଡରୁଛନ୍ତି କି ବୋଲି ପଚରା ଯିବାରେ ଜେଲେନସ୍କି କହିଛନ୍ତି ଯେ ମୁଁ ଡରୁଛି ଆମ ସହଯୋଗୀ ‘ଥକି’ଯିବେ ବୋଲି। ସେ କହିଛନ୍ତି ଯେ ଋଷିଆର ଲକ୍ଷ୍ୟ ଏହି ସ୍ଥିତିରେ ଆମେରିକାର ଋଚିକୁ ହଟାଇବା। ତେବେ ଟ୍ରମ୍ପ ସ୍ୱୀକାର କରିଛନ୍ତି ଯେ ବାର୍ତ୍ତା ବହୁତ କଠିନ ଥିଲା।

ୱାସିଂଟନ ଡିସିରେ ଅନୁଷ୍ଠିତ କ୍ୟାବିନେଟ୍ ବୈଠକରେ ଟ୍ରମ୍ପ କହିଛନ୍ତି ଯେ ଆମେ ଏହି ସମସ୍ୟାର ସମାଧାନ କରିପାରିବୁକି ନା ଏହା ଦେଖିବା ପାଇଁ ଆମର ଲୋକେ ଏବେ ଋଷିଆରେ ଅଛନ୍ତି। ତେବେ ଯେତେ ସହଜ ଅନୁମାନ କରାଯାଉଥିଲା ଏହା ଏତେ ସହଜ ନୁହେଁ, ତେବେ ଏହି ଯୁଦ୍ଧ କାରଣରୁ ସବୁ ମାସରେ ହଜାର ହଜାର ଲୋକେ ମୃତ୍ୟୁ ମୁଖରେ ପଡୁଥିବା ସେ କହିଛନ୍ତି। ସେପଟେ କିଭରେ ଜନୈକ ବରିଷ୍ଠ ବ୍ୟକ୍ତି ଏଏଫପିକୁ କହିଛନ୍ତି ଯେ ଭିଟକଫ୍ ଓ କୁସନର ସମ୍ଭବତଃ ବୁଧବାର ବ୍ରସେଲସ୍ ରେ ୟୁକ୍ରେନୀୟ ପ୍ରତିନିଧି ମଣ୍ଡଳକୁ ଭେଟି ପାରନ୍ତି। ତେବେ କୁଟନୈତିକ ଗତିବିଦ୍ଧି ସେତେବେଳେ ବଢି ଯାଇଛି ଯେତେବେଳେ ଋଷିଆ ୟୁକ୍ରେନର ଡୋନବାସରେ ପୋକ୍ରୋଭସ୍କ କୁ ନିୟନ୍ତ୍ରଣକୁ ନେଇଥିବା ଦାବି କରୁଛି।

ପୁଟିନ ମଙ୍ଗଳବାର କହିଛନ୍ତି ଯେ ଏହି ବେସ୍ ରୁ ଆମର ସୈନିକ ବେଶ୍ ସହଜରେ କୌଣସି ଦିଗକୁ ଆଗକୁ ବଢି ପାରିବେ। ମସ୍କୋ ସେନା ଏ ପର୍ଯ୍ୟନ୍ତ ୟୁକ୍ରେନର ୧୯%ରୁ ଅଧିକ ଅଞ୍ଚଳକୁ ନିଜ ନିୟନ୍ତ୍ରଣକୁ ନେଇ ସାରିଲେଣି, ଯାହା ଗତବର୍ଷ ତୁଳନାରେ ୧% ଅଧିକ।ଏହା ପୂର୍ବରୁ ଲିକ୍ ହୋଇଥିବା ଆମେରିକା ଶାନ୍ତି ପ୍ରସ୍ତାବରେ ଋଷିଆର ଦାବି ଯେପରି ୟୁକ୍ରେନୀୟ ସେନାର ଆକାର ଉପରେ ସୀମା ଧାର୍ଯ୍ୟ କରିବା, ସମ୍ପୂର୍ଣ୍ଣ ଡୋନାବାସ ଉପରେ ନିୟନ୍ତ୍ରଣ ଓ ୟୁକ୍ରେନୀୟ କ୍ଷେତ୍ର ଜାପୋରିଜିୟା ଓ ଖେରସନରେ ମସ୍କୋର ଉପସ୍ଥିତିକୁ ମାନ୍ୟତା ଦେବା ଆଦି ସାମିଲ ଥିଲା। ତେବେ କିଭ କହିଛି ଯେ ଏପରି ସର୍ତ୍ତ ମାନିନେବା ଆତ୍ମସମର୍ପଣ କରିବା ସହ ସମାନ।