ଲୋକସଭା ବାଚସ୍ପତିଙ୍କୁ ମହିଳା ସାଂସଦଙ୍କ ପତ୍ର, ଜାଣନ୍ତୁ ଲେଖିଛନ୍ତି କ’ଣ?

ନୂଆଦିଲ୍ଲୀ ୯।୨: ଲୋକସଭାରେ ନିକଟରେ ଘଟିଥିବା ଘଟଣାକୁ ନେଇ କଂଗ୍ରେସର ମହିଳା ସାଂସଦମାନେ ସୋମବାର ଲୋକସଭା ବାଚସ୍ପତି ଓମ ବିରଳାଙ୍କୁ ଏକ ପତ୍ର ଲେଖି ଅସନ୍ତୋଷ ଜଣାଇବା ସହ ଉଦବେଗ ପ୍ରକାଶ କରିଛନ୍ତି।ଏହି ପତ୍ର ମାଧ୍ୟମରେ ବିରୋଧୀ ମହିଳା ସାଂସଦଙ୍କ ଉପରେ ନିରାଧାର ଓ ମାନହାନୀକାରକ ଆରୋପ ସହିତ ବିରୋଧୀଙ୍କ ସାଂସଦୀୟ ଅଧିକାର ଉଲ୍ଲଂଘନର ପ୍ରସଙ୍ଗ ଉଠାଯାଇଛି। ଏହି ପତ୍ର ତାମିଲନାଡୁ ଲୋକସଭା ସାଂସଦ ଏସ.ଜୋତିମଣୀଙ୍କ ଲେଟର ହେଡରେ ଲେଖା ଯାଇଥିବା ବେଳେ ଏଥିରେ ପ୍ରିୟଙ୍କା ଗାନ୍ଧି, ଆର.ସୁଧା, ଜ୍ୟୋତ୍ସ୍ନା ଚରଣଦାସ ମହନ୍ତ ଓ ବର୍ଷା ଏକନାଥ ଗାୟକୱାଡଙ୍କ ସମେତ ଅନ୍ୟ ମହିଳା ସାଂସଦମାନେ ସ୍ୱାକ୍ଷର କରିଛନ୍ତି।

ପତ୍ରରେ ମହିଳା ସାଂସଦମାନେ ଲେଖିଛନ୍ତି ଯେ ‘ଆମେ ଏହି ପତ୍ର ଗଭୀର ଦୁଃଖ ଓ ସାମ୍ବିଧାନିକ ଦାୟିତ୍ୱର ମଜଭୁତ ଭାବନା ସହିତ ଲେଖୁଛୁ। ଏହା ବହୁତ ଦୁର୍ଭାଗ୍ୟପୂର୍ଣ୍ଣ ଯେ ଆପଣ ଲୋକସଭାର ମାନନୀୟ ବାଚସ୍ପତି ଓ ଏହି ଗାରିମାମୟ ସଦନର ସାମ୍ବିଧାନିକ ସଂରକ୍ଷକ ହୋଇଥିବା ସ୍ଥଳେ ଶାସକ ଦଳ ଦ୍ୱାରା ମହିଳା ସାଂସଦ ବିଶେଷ କରି ଭାରତୀୟ ନ୍ୟାସନାଲ କଂଗ୍ରେସ ସାଂସଦଙ୍କ ବିରୋଧରେ ନିରାଧାର ଓ ମାନହାନୀକାରକ ଆରୋପ ଲଗାଇବା ପାଇଁ ବାଧ୍ୟ ହୋଇଛନ୍ତି। ବାଚସ୍ପତିଙ୍କ ପଦ ଏକ ସାମ୍ବିଧାନିକ ପଦ, ଯାହାର ଉଦ୍ଦେଶ୍ୟ ସଂସଦର ଗାରିମାକୁ ରକ୍ଷା କରିବା, ନିରପେକ୍ଷତା ସୁନିଶ୍ଚିତ କରିବା ଓ ପାର୍ଟି ସମ୍ପର୍କକୁ ପରୱା ନ କରି ସବୁ ସଦସ୍ୟଙ୍କ ଅଧିକାର ରକ୍ଷା କରିବା’।

ପତ୍ରରେ କୁହାଯାଇଛି ଯେ ‘ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଚର୍ଚ୍ଚା କାଳରେ ସ୍ଥାପିତ ସଂସଦୀୟ ପରମ୍ପରା ଅନୁସାରେ ଶାସକ ଓ ବିରୋଧୀ ଦଳଙ୍କୁ କହିବାକୁ ଅଧିକାର ଦିଆଯାଏ ଓ ଏହା ପରେ ପ୍ରଧାନମନ୍ତ୍ରୀ ଜବାବ ଦିଅନ୍ତି। ଏହା ସତ୍ତ୍ୱେ ଲଗାତାର ୪ ଦିନ ହେଲା ବିରୋଧୀ ଦଳ ନେତା ରାହୁଲ ଗାନ୍ଧିଙ୍କୁ ସଂସଦରେ ଜାଣି ଶୁଣି କହିବାକୁ ଅବସର ଦିଆଯାଉନି। ଏହା ଅଭୂତ ପୂର୍ବ ଓ ଅକ୍ଷମ୍ୟ। ଅନ୍ୟପଟେ ଇଣ୍ଡି ମେଣ୍ଟର ୮ ଜଣ ସାଂସଦଙ୍କୁ ଶାସକ ଦଳଙ୍କ ଇସାରାରେ ନିଲମ୍ବିତ କରିଦିଆଯାଇଥିବା ବେଳେ ଜଣେ ବିଜେପି ସାଂସଦଙ୍କୁ ପୂର୍ବବର୍ତ୍ତି ପ୍ରଧାନମନ୍ତ୍ରୀମାନଙ୍କ ସମ୍ପର୍କରେ ଅଶ୍ଲୀଳ ଓ ଅଭଦ୍ର ଭାବେ କହିବାକୁ ଅନୁମତି ଦିଆଯାଇଛି’।

ସାଂସଦମାନେ କହିଛନ୍ତି ଯେ ଆମେ ଯେତେବେଳେ ଆପଣଙ୍କୁ ଭେଟିଲୁ ଆମେ ନ୍ୟାୟ ଓ ବିଜେପି ସାଂସଦଙ୍କ ନିଲମ୍ବନ ଦାବି କରିଥିଲୁ। ପତ୍ରରେ କୁହାଯାଇଛି ଯେ ଆପଣ ଏହା ସ୍ୱୀକାର କରିଛନ୍ତି ଯେ ଗୁରୁତର ତ୍ରୁଟି ହୋଇଛି। ତେବେ ସଦନର ବାଚସ୍ପତି ରୂପେ ଆପଣଙ୍କ ଅଧିକାର ଉପରେ ଗୁରୁତର ପ୍ରଶ୍ନ ଉଠୁଛି। ଏହା ପରେ ଲୋକସଭାରେ ପ୍ରଧାନମନ୍ତ୍ରୀଙ୍କ ସମ୍ବୋଧନ କାର୍ଯ୍ୟକ୍ରମ ଥିଲା, ହେଲେ ପ୍ରଧାନମନ୍ତ୍ରୀ ଆସିଲେନି। ଏହା ପରଦିନ ଶାସକ ଦଳଙ୍କ ଚାପରେ ଆସି ଆପଣ ଏକ ବୟାନ ଜାରି କଲେ ଯେଉଁଥିରେ କଂଗ୍ରେସ ପାର୍ଟିର ମହିଳା ସାଂସଦଙ୍କ ବିରୋଧରେ ଗୁରୁତ୍ତର ଆରୋପ ଲଗାଇଲେ।

ପତ୍ର ଲେଖାଯାଇଛି ଯେ ଆମକୁ କେବଳ ଏଥି ପାଇଁ ଲକ୍ଷ୍ୟ କରାଯାଉଛି ଯେ ଆମେ ଲଗାତାର ପ୍ରଧାନମନ୍ତ୍ରୀଙ୍କ ଜନ ବିରୋଧୀ ସରକାରଙ୍କ ବିରୋଧରେ ଲଢେଇ ଲଢୁଛୁ ଓ ତାଙ୍କର ଉତ୍ତର ଦାବି କରୁଛୁ। ସଦନକୁ ସମ୍ବୋଧିତ କରିବାକୁ ପ୍ରଧାନମନ୍ତ୍ରୀ ନ ଆସିବା ଆମର କୌଣସି ଧମକ ଯୋଗୁ ନୁହେଁ ବରଂ ଡର ଯୋଗୁ ବୋଲି ସାଂସଦମାନେ କହିଛନ୍ତି। କାରଣ ବିରୋଧୀଙ୍କୁ ସାମ୍ନା କରିବାର ସାହସ ପ୍ରଧାନମନ୍ତ୍ରୀଙ୍କର ନାହିଁ। ତେବେ ଆମେ ଭାବୁଛୁ ପାରଦର୍ଶିତା ବାଚସ୍ପତିଙ୍କ ପଦର ଗାରିମା ଓ ଏହି ସଦନର ବିଶ୍ୱସନୀୟତା କାୟମ କରିବାର ଏକମାତ୍ର ଉପାୟ।

ପତ୍ରରେ ଲେଖା ଯାଇଛି ଯେ ଆମେ ଆପଣଙ୍କ ପଦ ଓ ଆପଣଙ୍କୁ ବେଶ୍ ସମ୍ମାନ କରୁ। ତେବେ ଏହା ସମ୍ପୂର୍ଣ୍ଣ ସ୍ପଷ୍ଟ ଯେ ଆପଣ ଲଗାତାର ଶାସକ ଦଳଙ୍କ ଚାପରେ ଅଛନ୍ତି। ଆମେ ପୁଣି ଥରେ ଆପଣଙ୍କ ନିକଟରେ ଆଗ୍ରହ କରୁଛୁ ଆପଣ ଲୋକସଭାର ନିରପେକ୍ଷ ସଂରକ୍ଷକ ଭାବେ କାମ କରନ୍ତୁ। ଆପଣଙ୍କ ଏହି ଉଦ୍ୟମରେ ଆମେ ଆପଣଙ୍କ ସହିତ ଛିଡା ହୋଇ ରହିବୁ ଓ ସମ୍ପୂର୍ଣ୍ଣ ସମର୍ଥନ କରିବୁ। ଇତିହାସ ଆପଣଙ୍କୁ ଜଣେ ଏପରି ବ୍ୟକ୍ତି ଭାବେ ମନେ ରଖିବ ଯିଏ ସବୁଠୁ କଠିନ କ୍ଷଣରେ ମଧ୍ୟ ସତ୍ୟର ସାଥ ଦେଇଛନ୍ତି ଓ ଦେଶର ସାମ୍ବିଧାନିକ ମର୍ଯ୍ୟଦା କାୟମ ରଖିଛନ୍ତି।

ଏହା ବି ପଢନ୍ତୁ :-ଲୋକସଭା ବାଚସ୍ପତି ଓମ୍ ବିର୍ଲାଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆଣିବେ ବିରୋଧୀ, ଜାଣନ୍ତୁ କଣ ରହିଛି କାରଣ