ଗାଁ ଦାଣ୍ଡରେ ଆତଙ୍କ ଖେଳାଇଲେ ଦୁର୍ବୃତ୍ତ, ବନ୍ଧୁକ-ଖଣ୍ଡା ଧରି ମହିଳା ଓ ପୁରୁଷଙ୍କୁ ଅସଭ୍ୟ ଭାଷାରେ ଗାଳିଗୁଲଜ

ବଲାଙ୍ଗିର ୧୪।୧୦: ଗାଁ ଦାଣ୍ଡରେ ଦୁର୍ବୃତ୍ତଙ୍କ ଦାଦାଗିରି । ବନ୍ଧୁକ ଦେଖାଇ, ଖଣ୍ଡା ବୁଲାଇ ଜାହିର କଲେ ପତିଆରା । ଖେଳାଇଲେ ଆତଙ୍କ । ଛାନିଆରେ ଗାଁ ଲୋକ । ବଲାଙ୍ଗିର ଜିଲ୍ଲା ଦେଓଗାଁ ଥାନା ଅଞ୍ଚଳରେ ଦିନକୁ ଦିନ ଅରାଜକତା ସୃଷ୍ଟି ହେଉଥିବା ଅଭିଯୋଗ ହେବା ସହ ତାର ଚିତ୍ର ଏବେ ଦେଖିବାକୁ ମିଳିଛି ।

ସୂଚନାଯୋଗ୍ୟ ଯେ, ସୋମବାର କିଛି ଯୁବକ ଖଣ୍ଡା ଧରି ଦେଓଗାଁ କଛାରପାଲିରେ ଆତଙ୍କ ସୃଷ୍ଟି କରିଥିଲେ । ଏପରିକି ସାହୁପଡ଼ା ଭିତରେ ମହିଳା ଓ ପୁରୁଷଙ୍କୁ ଅସଭ୍ୟ ଭାଷାରେ ଗାଳିଗୁଲଜ କରିଥିଲେ । ଏମିତିକି ଜଣେ ବ୍ୟକ୍ତିଙ୍କୁ ମାରିଦେବା ପାଇଁ ଖୋଜାଖୋଜି କରିଥିଲେ । ୪ଟି ବାଇକ୍‌ରେ ୧୨ ଜଣ ଯୁବକ ବିଭିନ୍ନ ମାରଣାସ୍ତ୍ର ଧରି ଘୁରି ବୁଲୁଥିବାରୁ ଗାଁ ଲୋକେ ଭୟଭୀତ ହୋଇ ପଡ଼ିଥିଲେ ।

ଅରାଜକତା ସୃଷ୍ଟି କରୁଥିବା ଯୁବକ ମାନଙ୍କୁ ଚିହ୍ନଟ କରି କାର୍ଯ୍ୟାନୁଷ୍ଠାନ ନେବାକୁ ପ୍ରଗତି ଯୁବକ ସଂଘ ପକ୍ଷରୁ ପୋଲିସକୁ ଏକ ଦାବିପତ୍ର ଦିଆଯାଇଛି । ବାହାର ରାଜ୍ୟରୁ ଆସି ଦେଓଗାଁରେ ବସବାସ କରୁଥିବା ଜଣେ ବ୍ୟକ୍ତି କିଛି ଯୁବକଙ୍କୁ ଡାକି ଏଭଳି କାର୍ଯ୍ୟ କରାଇଥିବା ଚର୍ଚ୍ଚା ହେଉଛି । ଏ ଦିଗରେ ଜିଲ୍ଲା ଏସ୍‌ପି ସ୍ବତନ୍ତ୍ର ଦୃଷ୍ଟିଦେବାକୁ ସାଧାରଣରେ ଦାବି ହେଉଛି । ଏନେଇ ବଲାଙ୍ଗିର ଏସ୍‌ପିଙ୍କ ସହ ଯୋଗାଯୋଗ କରିବାରୁ ସେ ଏହି ଘଟଣାକୁ ନେଇ ତଦନ୍ତ ଚାଲିଥିବା କହିବା ସହ ତୁରନ୍ତ ଗିରଫ କରି ଗଣମାଧ୍ୟମ ଆଗରେ ସୂଚନା ଦିଆଯିବ ବୋଲି କହିଛନ୍ତି ।