ଥିରୁଅନନ୍ତପୁରମରେ ବିଜେପିର ବିଜୟ, ଅଭିନନ୍ଦନ ଜଣାଇଲେ ଶଶି ଥରୁର

ଥିରୁଅନନ୍ତପୁରମ: କେରଳର ସ୍ଥାନୀୟ ପୌର ନିର୍ବାଚନର ପରିସ୍ଥିତି ଏବେ ସ୍ପଷ୍ଟ ହୋଇଯାଇଛି। ଏହି ନିର୍ବାଚନରେ UDF କ୍ଲିନ ସୁଇପ କରିଛି । ଚାରି ଦଶନ୍ଧୀ ଧରି କ୍ଷମତାରେ ଥିବା LDF ଠାରୁ କ୍ଷମତା ଛଡ଼ାଇ ନେଇ ବିଜେପି ତିରୁଅନନ୍ତପୁରମ ନଗର ନିଗମ ଦଖଲ କରିଛି। କଂଗ୍ରେସ ନେତା ଏବଂ ତିରୁଅନନ୍ତପୁରମ ସାଂସଦ ଶଶି ଥରୁର କେରଳରେ ୟୁଡିଏଫକୁ ଅଭିନନ୍ଦନ ଜଣାଇ ଖୁସି ପ୍ରକାଶ କରିଛନ୍ତି।

ସେ ଏକ୍ସରେ ପୋଷ୍ଟ କରି ଲେଖିଛନ୍ତି, ‘କେରଳ ସ୍ଥାନୀୟ ନିର୍ବାଚନରେ କି ଚମତ୍କାର ଫଳାଫଳ ! ଜନାଦେଶ ସ୍ପଷ୍ଟ। ଏହା ରାଜ୍ୟର ଗଣତାନ୍ତ୍ରିକ ଭାବନାକୁ ସ୍ପଷ୍ଟ ଭାବରେ ପ୍ରତିଫଳିତ କରେ। ଏହି ପ୍ରଭାବଶାଳୀ ବିଜୟ ପାଇଁ ୟୁଡିଏଫକୁ ଅଭିନନ୍ଦନ। ଦଳକୁ ଗୁରୁତ୍ୱପୂର୍ଣ୍ଣ ସମର୍ଥନ ମିଳିଛି। ରାଜ୍ୟର ବିଧାନସଭା ନିର୍ବାଚନ ପୂର୍ବରୁ ଏକ ଶକ୍ତିଶାଳୀ ସଙ୍କେତ। କଠିନ ପରିଶ୍ରମ, ଏକ ଦୃଢ଼ ବାର୍ତ୍ତା ଏବଂ ଏକ ଶାସନ ବିରୋଧୀ ଲହର ମିଳିତ ଭାବରେ ୨୦୨୦ ତୁଳନାରେ ବହୁତ ଭଲ ଫଳାଫଳ ପ୍ରଦାନ କରିଛି।’

ସେ ଆହୁରି ଲେଖିଛନ୍ତି, ‘ତିରୁଅନନ୍ତପୁରମରେ ବିଜେପିର ଐତିହାସିକ ପ୍ରଦର୍ଶନକୁ ମୁଁ ମଧ୍ୟ ସ୍ୱୀକାର କରିବାକୁ ଚାହୁଁଛି। ନଗର ନିଗମରେ ସେମାନଙ୍କ ଗୁରୁତ୍ୱପୂର୍ଣ୍ଣ ବିଜୟ ପାଇଁ ମୁଁ ମୋର ବିନମ୍ର ଅଭିନନ୍ଦନ ଜଣାଉଛି। ଏହା ଏକ ଦୃଢ଼ ପ୍ରଦର୍ଶନ, ଯାହା ରାଜଧାନୀର ରାଜନୈତିକ ଦୃଶ୍ୟପଟରେ ଏକ ଉଲ୍ଲେଖନୀୟ ପରିବର୍ତ୍ତନକୁ ପ୍ରତିଫଳିତ କରେ। ମୁଁ ୪୫ ବର୍ଷର LDF କୁଶାସନ ପରିବର୍ତ୍ତନ ପାଇଁ ପ୍ରଚାର କରିଥିଲି । କିନ୍ତୁ ଭୋଟରମାନେ ଅନ୍ୟ ଏକ ଦଳକୁ ପୁରସ୍କୃତ କରିଛନ୍ତି।’

What a day of amazing results in the Kerala local self-government elections! The mandate is clear, and the democratic spirit of the state shines through.

A huge congratulations to @UDFKerala for a truly impressive win across various local bodies! This is a massive endorsement…

— Shashi Tharoor (@ShashiTharoor) December 13, 2025

ସେ ଲେଖିଛନ୍ତି, ‘ଏହା ହିଁ ଗଣତନ୍ତ୍ରର ସୌନ୍ଦର୍ଯ୍ୟ। ଲୋକଙ୍କ ନିଷ୍ପତ୍ତିକୁ ସମ୍ମାନ ଦିଆଯିବା ଉଚିତ । ତାହା UDF ପାଇଁ ହେଉ କିମ୍ବା ମୋ ନିର୍ବାଚନମଣ୍ଡଳୀରେ ବିଜେପି ପାଇଁ ହେଉ। ଆମେ କେରଳର ଉନ୍ନତି ପାଇଁ କାମ କରିବୁ। ଆମେ ଲୋକଙ୍କ ଆବଶ୍ୟକତା ପାଇଁ ଲଢ଼ିବୁ। ଆମେ ସୁଶାସନର ନୀତିକୁ ବଜାୟ ରଖିବୁ। ଆମେ ଆଗକୁ ବଢ଼ିବା ଜାରି ରଖିବୁ ।’ ସୂଚନାଯୋଗ୍ୟ, କେରଳର ପାଞ୍ଚଟି ନଗର ନିଗମ ମଧ୍ୟରୁ କଂଗ୍ରେସ ନେତୃତ୍ୱାଧୀନ UDF ୪ଟିରେ ବିଜୟୀ ହୋଇଛି । ଏଲଡିଏଫ ଏବଂ ଏନଡିଏ ପ୍ରତ୍ୟେକ ଗୋଟିଏ ଲେଖାଏଁ ନଗର ନିଗମ ଜିତିଛନ୍ତି ।