ଭୁଶୁଡୁଛି ଲାଲ୍‌ଗଡ, ୩୭ ହାର୍ଡକୋର ମାଓବାଦୀଙ୍କ ଆତ୍ମସମର୍ପଣ

ମାଲକାନଗିରି ୦୧।୧୨ : ଭୁଶୁଡୁଛି ଲାଲଗଡ । ମାଲକାନଗିରି ସୀମାନ୍ତ ଛତିଶଗଡ଼ ଦାନ୍ତେଓ୍ୱାଡ଼ା ଜିଲ୍ଲାରେ ପୁଣି ୩୭ ହାର୍ଡକୋର ମାଓବାଦୀଙ୍କ ଆତ୍ମସମର୍ପଣ । ଏମାନଙ୍କ ମଧ୍ୟରୁ ୨୭ ଜଣଙ୍କ ମୁଣ୍ଡ ଉପରେ ଛତିଶଗଡ଼ ସରକାର ୬୫ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରିଥିଲେ । ହିଂସାର ରାସ୍ତା ଛାଡ଼ି ସମାଜର ମୁଖ୍ୟସ୍ରୋତରେ ସାମିଲ ହେବା ଲାଗି ନିଜର ଅସ୍ତ୍ରଶସ୍ତ୍ର ସହ ପୋଲିସ ପାଖରେ ଆତ୍ମସମର୍ପଣ କରିଛନ୍ତି ।

ଛତିଶଗଡ଼ ସରକାର ଏବଂ ସୁରକ୍ଷା ବାହିନୀଙ୍କ ନିରନ୍ତର ପ୍ରୟାସ ଯୋଗୁଁ ‘ପୁନର୍ବାସ’ ମାଧ୍ୟମରେ ପୁନର୍ଜୀବନ’ ପାଇବା ଲାଗି ବସ୍ତରରେ ଏକ ବଡ଼ ପରିବର୍ତ୍ତନ ଦେଖିବାକୁ ମିଳିଛି । ଆତ୍ମସମର୍ପଣ କରିଥିବା ସବୁ ମାଓବାଦୀମାନଙ୍କୁ ପୁନର୍ବାସ ନୀତି ଅନୁଯାୟୀ ତୁରନ୍ତ ୫୦ ହଜାର ଟଙ୍କା ଲେଖାଏଁ ଆର୍ଥିକ ସହାୟତା ପ୍ରଦାନ କରାଯାଇଛି । ଆତ୍ମସମର୍ପଣ କରିଥିବା ମାଓବାଦୀମାନେ ପୂର୍ବରୁ ଅନେକ ହିଂସାକାଣ୍ଡରେ ଜଡିତ ରହିଥିଲେ। ସମସ୍ତଙ୍କୁ ସରକାରଙ୍କ ନିୟମ ଅନୁସାରେ ଥଇଥାନ କରାଯିବ ବୋଲି ଦାନ୍ତେଓ୍ୱାଡା ଏସ୍ପି କହିଛନ୍ତି। ତେବେ ଗତ ବର୍ଷକ ମଧ୍ୟରେ ଦାନ୍ତେଓ୍ୱାଡ଼ା ଜିଲ୍ଲାରେ କେବଳ ୫୦୮ ମାଓବାଦୀ ଆତ୍ମସମର୍ପଣ କରିଛନ୍ତି ।