ନୂଆ ରେକର୍ଡ ସୃଷ୍ଟି କଲା ହାଇଦ୍ରାବଦର ଜମି ମୂଲ୍ୟ, ୧ ଏକର ୧୩୭ କୋଟି ଟଙ୍କା

ହାଇଦ୍ରାବାଦ: ବର୍ତ୍ତମାନ ସମୟରେ ଜମିର ଦାମ୍ ଅତି ମହଙ୍ଗା ହୋଇଯାଇଛି। ଏଭଳି ସମୟରେ ତେଲେଙ୍ଗାନାର ରାଜଧାନୀ ହାଇଦ୍ରାବାଦରେ ଜମି ମୂଲ୍ୟ ସବୁ ରେକର୍ଡ ଟପିଛି । ସେଠାରେ ଜମି ମୂଲ୍ୟ ଏକ ନୂଆ ରେକର୍ଡ ସୃଷ୍ଟି କରିଛି। ନଭେମ୍ବର ୨୨ ତାରିଖରେ, ହାଇଦ୍ରାବାଦର ନଲେଜ୍ ସିଟିର ଅଂଶ ରାଇଦୁର୍ଗମରେ ଦୁଇଟି ଜମି ନିଲାମ ହୋଇଥିଲା। ଏହି ଦୁଇଟି ପ୍ଲଟ ସରକାରଙ୍କୁ ୧,୩୫୫.୩୩ କୋଟି ଟଙ୍କାର ରାଜସ୍ୱ ଦେଇଛି । ଏହା ହାଇଦ୍ରାବାଦ ଇତିହାସରେ ସବୁଠାରୁ ବଡ଼ ନିଲାମୀ ମଧ୍ୟରୁ ଗୋଟିଏ।ତେଲେଙ୍ଗାନାର ରାଜଧାନୀ ହାଇଦ୍ରାବାଦରେ ରିଅଲ୍ ଇଷ୍ଟେଟ୍ କାୟା ବିସ୍ତାର କରୁଛି । ଏବେ ରାଇଦୁର୍ଗମ୍ ନଲେଜ୍ ସିଟିର ଏକ ଏକର ଜମି ୧୩୭.୨୫ କୋଟି ଟଙ୍କାରେ ବିକ୍ରି ହୋଇଛି। ଏହି ଜମି ରାଇଦୁର୍ଗମ୍ ଉପକଣ୍ଠରେ ଥିବା କୋକାପେଟରେ ଅବସ୍ଥିତ। ୨୨ ନଭେମ୍ବରରେ ହାଇଦ୍ରାବାଦ ମେଟ୍ରୋପଲିଟାନ୍ ଡେଭଲପମେଣ୍ଟ ଅଥରିଟି ବା HMDA ଦ୍ୱାରା ନିଲାମୀ ହୋଇଥିଲା । ଏଚଏମଡିଏ କୋକାପେଟର ନିଓପୋଲିସ୍ ଅଞ୍ଚଳରେ ସର୍ଭେ ନମ୍ବର ୧୭ ଏବଂ ୧୮ ରେ ଜମି ନିଲାମ କରିଥିଲା। ଏହି ନିଲାମରେ, ସର୍ଭେ ନମ୍ବର ୧୭ରେ ଥିବା ଜମି ପ୍ରତି ଏକର ୧୩୭.୨୫ କୋଟି ଟଙ୍କାରେ ବିକ୍ରି ହୋଇଛି ।

ଏଠାରେ ଅନୁଷ୍ଠିତ ପୂର୍ବ ନିଲାମରେ, ଏକ ଏକର ଜମି ୧୦୦ କୋଟି (ପ୍ରାୟ $1.00 ବିଲିୟନ) ରେ ବିକ୍ରି ହୋଇଥିଲା । ସର୍ଭେ ନମ୍ବର ୧୭ ଏବଂ ୧୮ରେ ଜମି ନିଲାମ କରୁଥିବା ଅଧିକାରୀମାନେ ଏକର ପିଛା ସର୍ବନିମ୍ନ ମୂଲ୍ୟ ୯୯ କୋଟି ଟଙ୍କା ଧାର୍ଯ୍ୟ କରିଥିଲେ । କିନ୍ତୁ ସର୍ବାଧିକ ମୂଲ୍ୟ ୧୩୭.୨୫ କୋଟି ଟଙ୍କା ଯାଏଁ ପହଞ୍ଚିଥିଲା । ପ୍ଲଟ୍ ନମ୍ବର ୧୭ ୪.୫୯ ଏକର ଏବଂ ପ୍ଲଟ୍ ନମ୍ବର ୧୮ ୫.୩୧ ଏକର। ଏଥିମଧ୍ୟରୁ, ୫.୩୧ ଏକର ହ୍ରଦ ପାର୍ଶ୍ୱ ପ୍ଲଟ୍ ୧୮କୁ ଏକର ପିଛା ₹୧୩୭.୨୫ କୋଟି ମୂଲ୍ୟରେ କିଣିଛି ଏମଏସଏନ ଅର୍ବାନ ଭେଞ୍ଚର । ୪.୫୯ ଏକର ଥିବା ପ୍ଲଟ୍ ୧୭କୁ ଏକର ପିଛା ୧୩୬.୫୦ କୋଟି ମୂଲ୍ୟରେ କିଣିଛି ବଜ୍ର ହାଉସିଂ ପ୍ରୋଜେକ୍ଟ ।

ମୋଟ ୯.୯୦ ଏକର ଜମିର ନିଲାମ କରି ଏଚଏମଡିଏ ୧,୩୫୫.୩୩ କୋଟି ଟଙ୍କାର ରାଜସ୍ୱ ପାଇଛି । ଏହି ନିଲାମକୁ ହାଇଦ୍ରାବାଦ ରିଅଲ୍ ଇଷ୍ଟେଟ୍ ବଜାରରେ ଏପର୍ଯ୍ୟନ୍ତ ସର୍ବୋଚ୍ଚ ନିଲାମ ବୋଲି ବିବେଚନା କରାଯାଉଛି। ବର୍ଦ୍ଧିତ ଚାହିଦା ଏବଂ ଭିତ୍ତିଭୂମି ବିକାଶ ସହିତ, ଆଗାମୀ ମାସରେ ହାଇଦ୍ରାବାଦର ରିୟଲ ଇଷ୍ଟେଟ୍ ବଜାର ଆହୁରି ଉପରକୁ ଉଠିବ ବୋଲି ଆଶା କରାଯାଉଛି। ହାଇଦ୍ରାବାଦ ଦ୍ରୁତ ଗତିରେ ବ୍ୟବସାୟ ଏବଂ ପ୍ରଯୁକ୍ତିବିଦ୍ୟାର ଏକ କେନ୍ଦ୍ର ପାଲଟିଛି । ରାଇଦୁର୍ଗମର ଏହି ପ୍ଲଟଗୁଡ଼ିକ ହାଇଦ୍ରାବାଦ ନଲେଜ୍ ସିଟି ପ୍ରକଳ୍ପର ଏକ ଅଂଶ। ଆଶା କରାଯାଉଛି ଯେ, ଏଠାରେ ପ୍ରମୁଖ ବାଣିଜ୍ୟିକ ବିକାଶ ଘଟିବ । ଏହି ଅଞ୍ଚଳରେ ଭିତ୍ତିଭୂମିର ବିକାଶ ଆହୁରି ନିଯୁକ୍ତି ସୁଯୋଗ ସୃଷ୍ଟି କରିବ ।