ନୂଆପଡ଼ାରେ ବିଜେଡି ପ୍ରଚାରର ମଙ୍ଗ ଧରିବେ ନବୀନ, ବିଜେପି କହିଲା…

ନୂଆପଡ଼ା: ନୂଆପଡ଼ା ଉପ ନିର୍ବାଚନ ପାଇଁ ଜମିଲାଣି ପ୍ରଚାର । ଆଗକୁ ପ୍ରଚାର ମଇଦାନକୁ ଓହ୍ଲାଇବେ ସବୁ ଦଳର ହେଭିଓ୍ବେଟ୍‌ । ଏମିତିରେ ଆସନ୍ତା ୩ ତାରିଖ ଓ ୭ ତାରିଖରେ ବିଜେଡି ପ୍ରାର୍ଥୀଙ୍କ ଲାଗି ପ୍ରଚାର ପାଇଁ ନୂଆପଡ଼ା ଯିବେ ବିରୋଧୀ ଦଳ ନେତା ନବୀନ ପଟ୍ଟନାୟକ । ଯାହାକୁ ନେଇ ବିଜେଡି ଶିବିର ଉତ୍ସାହିତ ଥିବା ବେଳେ ବିଜେପି କହିଛି ଏହାର କୌଣସି ପ୍ରଭାବ ପଡ଼ିବ ନାହିଁ। ନବୀନଙ୍କ ଉପରେ ଭାରି ପଡ଼ିବେ ମୁଖ୍ୟମନ୍ତ୍ରୀ ମୋହନ ମାଝୀ । ସେପଟେ ଦଳୀୟ ପ୍ରାର୍ଥୀଙ୍କ ସୁନିଶ୍ଚିତ ବିଜୟ ନେଇ ଆଶା ବାନ୍ଧିଛି କଂଗ୍ରେସ । 

ନୂଆପଡ଼ାରେ ବିଜେଡି ପ୍ରଚାରର ମଙ୍ଗ ଧରିବେ ନବୀନ । ସାଧାରଣ ସଭା ସହ କରିବେ ରୋଡ୍‌ ଶୋ’ । ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆଙ୍କ ପାଇଁ  ମାଗିବେ ଭୋଟ୍‌ । ନୂଆପଡ଼ା ଉପ ନିର୍ବାଚନ ପାଇଁ ଜମିଲାଣି ପ୍ରଚାର । ଆଗକୁ ମଇଦାନକୁ ଓହ୍ଲାଇବେ ସବୁ ଦଳର ହେଭିଓ୍ବେଟ୍‌ । ଏହାରି ଭିତରେ ବିଜେଡି ସୁପ୍ରିମୋ ନବୀନ ପଟ୍ଟନାୟକ ମଧ୍ୟ ନୂଆପଡ଼ାରେ ବିଜେଡି ପ୍ରାର୍ଥୀଙ୍କ ଲାଗି ପ୍ରଚାର ମଇଦାନକୁ ଓହ୍ଲାଇବେ ବୋଲି ଜଣାପଡ଼ିଛି । ନଭେମ୍ବର ୩ ତାରିଖରେ କୋମନା ଠାରେ ଏକ ସାଧାରଣ ସଭାରେ ଯୋଗ ଦେବେ ନବୀନ । କୋମନା ବିଜେଡିର ଏକ ବଡ଼ ଭୋଟ୍‌ ବ୍ୟାଙ୍କ ହୋଇଥିବାରୁ ଏଠାରେ ଭୋଟ୍‌ ଯେମିତି ଭାଗ ନହୁଏ ସେଥିପାଇଁ  ବଡ଼ ପ୍ଲାନ୍‌ କରିଛି ବିଜେଡି । ଆଉ ନବୀନଙ୍କ କୋମନା ଗସ୍ତ ବଡ଼ ପ୍ରଭାବ ପକାଇବ ବୋଲି ଆଶା ରଖିଛି ଦଳ ।

ସେହିଭଳି ନଭେମ୍ବର ୭ ତାରିଖରେ  ଖରିଆର୍‌ ରୋଡ ଠାରୁ ନୂଆପଡ଼ା ପର୍ଯ୍ୟନ୍ତ ପ୍ରାୟ ୧୨ କିଲୋମିଟର ରୋଡ୍‌ ଶୋ କରିବେ ନବୀନ । ନୂଆପଡ଼ା ଉପ ନିର୍ବାଚନରେ  ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆଙ୍କୁ ଭୋଟ୍‌ ଦେବାକୁ ନୂଆପଡ଼ା ବାସୀଙ୍କୁ ଅପିଲ କରିବେ ବିରୋଧୀ ଦଳ ନେତା । ତେବେ ନୂଆପଡ଼ା ପ୍ରଚାରରେ ନବୀନଙ୍କ ଏଣ୍ଟ୍ରିକୁ ନେଇ ଉତ୍ସାହିତ ଅଛି ବିଜେଡି କ୍ୟାମ୍ପ୍‌ । ନୂଆପଡ଼ାରେ ବିଜେଡିର ନିଶ୍ଚିତ ବିଜୟକୁ ନେଇ ଦମ୍ଭୋକ୍ତି କରିଛନ୍ତି ଦଳୀୟ ନେତା ।

ସେପଟେ ଆଗାମୀ ଦିନରେ ନୂଆପଡ଼ାରେ ବିଜେପି ପ୍ରାର୍ଥୀ ଜୟ ଢୋଲକିଆଙ୍କ ପାଇଁ ପ୍ରଚାର ମଇଦାନକୁ ଓହ୍ଲାଇବେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ସମେତ ବିଜେପିର ଅନେକ ତୁଙ୍ଗ ନେତା । ତେଣୁ ନବୀନଙ୍କ ଉପରେ ମୁଖ୍ୟମନ୍ତ୍ରୀ ମୋହନ ମାଝୀ ଭାରି ପଡ଼ିବେ ବୋଲି କହିଛନ୍ତି ସ୍ବାସ୍ଥ୍ୟ ମନ୍ତ୍ରୀ ମୁକେଶ ମହାଲିଙ୍ଗ । ସେ ଆହୁରି ବି କହିଛନ୍ତି ଯେ, ନୂଆପଡ଼ାରେ ବିରୋଧୀ ଦଳ ନେତାଙ୍କ ପ୍ରଚାରର କୌଣସି ପ୍ରଭାବ ପଡ଼ିବ ନାହିଁ । ଗତ ସାଧାରଣ ନିର୍ବାଚନରେ ଲୋକେ ବିଜେଡିକୁ କ୍ଷମତାରୁ ଦୂରେଇ ସାରିଛନ୍ତି ।

ବିଜେଡି ଓ ବିଜେପିର ଷ୍ଟାର ଓ୍ବାର ଭିତରେ ପଛରେ ପଡ଼ିବାକୁ ଚାହୁଁନି କଂଗ୍ରେସ । ନିଜେ ପିସିସି ସଭାପତି ଭକ୍ତ ଦାସ ନୂଆପଡ଼ାରେ ଡେରା ପକାଇଥିବା ବେଳେ ଆଗକୁ ଦଳର ତୁଙ୍ଗ ନେତା ମଧ୍ୟ ପ୍ରଚାରକୁ ଓହ୍ଲାଇବେ । ଏମିତିରେ କଂଗ୍ରେସ କହିଛି ନୂଆପଡ଼ାରେ ନବୀନଙ୍କ ପ୍ରଚାରର କୌଣସି ପ୍ରଭାବ ପଡ଼ିବ ନାହିଁ । ୨୦୨୪ରେ ସେ ଏହି ଅଂଚଳରେ କଣ୍ଟାବାଞ୍ଜିରୁ ନିର୍ବାଚନ ଲଢ଼ି ହାରିଥିଲେ । ବିଜେଡିର ଅସଲ ଚିତ୍ର କ’ଣ ତାହା ନୂଆପଡ଼ାବାସୀ ଜାଣିଛନ୍ତି । ତେଣୁ ଏଥର ବିଜେଡି ଓ ବିଜେପିକୁ ନୁହେଁ ବରଂ କଂଗ୍ରେସର ବିଜୟ ସୁନିଶ୍ଚିତ । ନଭେମ୍ବର ୨ ଦାରିଖ ପରେ ଆହୁରି ସରଗରମ ହେବ ନୂଆପଡ଼ା ପ୍ରଚାର । ମଇଦାନକୁ ଓହ୍ଲାଇବେ ତିନି ଦଳର ଷ୍ଟାର କ୍ୟାମ୍ପେନର ।