ଚନ୍ଦକା ଡମପଡାରେ ଗୁଳିବିଦ୍ଧ ଦନ୍ତା, ଡାହାଣ ଗୋଡରେ ବାଜିଛି ଗୁଳି

ଭୁବନେଶ୍ୱର,୧୮/୧୨: ଚନ୍ଦକା ଜଙ୍ଗଲରେ ଦନ୍ତା ଅସୁସ୍ଥ। ଡାହାଣ ପଟ ଗୋଡ଼ରେ ହୋଇଛି ଗଭୀର କ୍ଷତ। ଦାନ୍ତ ପାଇଁ ଶିକାରୀ ଗୁଳି ମାଡ କରିଥିବା ସନ୍ଦେହ । ଗତକାଲି ସକାଳୁ ବନ ବିଭାଗ କରିଥିଲେ ପିଛା। ରାତିରେ କ୍ୟାମ୍ପ ପକାଇ ଡାକ୍ତରଙ୍କ ସହ ଗୋଟିଏ ସ୍ଵତନ୍ତ୍ର ଦଳ କରୁଛି ଯାଞ୍ଚ୍। ଚନ୍ଦକା-ଡମପଡ଼ା ଅଭୟାରଣ୍ୟରେ ଘୂରି ବୁଲୁଛି ଗୁଳିବିଦ୍ଧ ଦନ୍ତାହାତୀ । ବିରାଟକାୟ ଦନ୍ତା ହାତୀର ବାମ ଗୋଡ଼ରେ ଗୁଳିବାଜି ପ୍ରଚୁର ରକ୍ତସ୍ରାବ ହେଉଛି । ଛୋଟେଇ ଛୋଟେଇ ସେ ଚନ୍ଦକା ରେଞ୍ଜ ଅଞ୍ଚଳରେ ବୁଲୁଛି ।

ଏହି ଖବର ପାଇବା ପରେ ଚନ୍ଦକା ବନବିଭାଗ ତତ୍ପର ହୋଇ ପଡ଼ିଛି । ଦନ୍ତାକୁ ଶୀଘ୍ର ଠାବ କରି ତା’ର ଚିକିତ୍ସା କରିବା ପାଇଁ ଡିଏଫ୍ଓ ବିନୋଦ ଆଚାର୍ଯ୍ୟ ନିର୍ଦ୍ଦେଶ ଦେଇଛନ୍ତି । ତେଣୁ ବନ କର୍ମଚାରୀମାନେ ଦନ୍ତାକୁ ଠାବ କରିବା ପାଇଁ ଆଜି ରାତିରେ ଜଙ୍ଗଲ ମଧ୍ୟରେ ଖୋଜାଖୋଜି ଚଳାଇଛନ୍ତି। ଦନ୍ତା ଠାବ ହେବାପରେ ତାକୁ ଟ୍ରାଙ୍କୁଲାଇଜର ମାଡ଼କରି ଚିକିତ୍ସା କରାଯିବ ବୋଲି ଡିଏଫ୍ଓ ଶ୍ରୀ ଆଚାର୍ଯ୍ୟ କହିଛନ୍ତି । ପ୍ରତ୍ୟେକ୍ଷଦର୍ଶୀଙ୍କ କହିବା ଅନୁଯାୟୀ, ବୁଧବାର ଅପରାହ୍ଣରେ ଦୁଇଟି ବଡ଼ଦାନ୍ତ ଥିବା ବିରାଟକାୟ ଦନ୍ତା ଚନ୍ଦକା ଏସ୍ଓଜି କ୍ୟାମ୍ପସ ପଛପଟେ ବହୁ ଦୂରରେ ଛୋଟେଇ ଛୋଟେଇ ଚାଲୁଥିଲା । 

ଜାଳେଣି କାଠ ସଂଗ୍ରହ ପାଇଁ ଯାଇଥିବା କିଛି ଲୋକଙ୍କୁ ଦନ୍ତା ଆକ୍ରମଣ କରିବାକୁ ଚିହିଁକି ଉଠିଥିଲା । ଦନ୍ତାକୁ ଦେଖି ଭୟରେ ସେମାନେ ଦୌଡ଼ି ପଳାଇ ଆସିଥିଲେ । ତେବେ ଦନ୍ତାର ବାମ ଗୋଡ଼ରେ ଗଭୀର କ୍ଷତ ହୋଇ ସେଥିରୁ ରକ୍ତସ୍ରାବ ହେଉଥିବା ସେମାନେ ଦେଖିବାକୁ ପାଇଥିଲେ । ତେଣୁ କେହି ଶିକାରୀ ଦାନ୍ତ ପାଇଁ ଦନ୍ତାକୁ ଗୁଳିମାଡ଼ କରିଥିବା ସେମାନେ କହିଛନ୍ତି ।

ଏନେଇ ସେମାନେ ଚନ୍ଦକା ବନବିଭାଗ କର୍ମଚାରୀଙ୍କୁ ଖବର ଦେଇଥିଲେ । ଖବରପାଇ ଡିଏଫ୍ଓ ଶ୍ରୀ ଆଚାର୍ଯ୍ୟଙ୍କ ନିର୍ଦ୍ଦେଶରେ ଅଭୟାରଣ୍ୟରେ ଚନ୍ଦକା ଓ ଡମପଡ଼ା ରେଞ୍ଜ ବନ କର୍ମଚାରୀମାନେ କ୍ଷତାକ୍ତ ଦନ୍ତାକୁ ଖୋଜିବାରେ ଲାଗି ପଡ଼ିଛନ୍ତି । ତେବେ ଦନ୍ତାକୁ ଗୁଳିମାଡ଼ ହୋଇଛି କି କିପରି ତା’ ଗୋଡ଼ରେ କ୍ଷତ ହୋଇଛି, ଦନ୍ତା ଠାବ ହେବାପରେ ସ୍ପଷ୍ଟ ହେବ ବୋଲି ଡିଏଫ୍ଓ ଶ୍ରୀ ଆଚାର୍ଯ୍ୟ କହିଛନ୍ତି ।ସୂଚନା ଥାଉକି, ଗତମାସ ୨୧ ତାରିଖରେ ଦାରୁଠେଙ୍ଗ ଭୁଆସୁଣି ମୌଜା ବରବାରୀ ଜଙ୍ଗଲରେ ଏକ ୨୦/୨୨ ବର୍ଷୀୟ ଅସୁସ୍ଥ ମାକେନା ହାତୀ ଠାବ ହୋଇଥିଲା ।

​​​​​​​ଚିକିତ୍ସା ଚାଲିଥିବା ବେଳେ ସେହିଦିନ ରାତିରେ ହାତୀର ମୃତ୍ୟୁ ଘଟିଥିଲା । କୌଣସି ସ୍ଥାନରେ ବାର୍ହା ଶିକାର ପାଇଁ ଖାଦ୍ୟରେ ଖଞ୍ଜା ଯାଇଥିବା ବୋମାକୁ ଖାଇ ହାତୀ ପାଟିରେ ବିସ୍ଫୋରଣ ଘଟି ଘା’ ହେବା ପରେ ସେପ୍ଟିସେମିଆରେ ଆକ୍ରାନ୍ତ ହୋଇଥିଲା । ପରେ ଏହା ସମଗ୍ର ଶରୀରକୁ ସଂକ୍ରମଣ ହେବା ସହ ଖାଇପିଇ ନ ପାରି ହାତୀଟି ଦୁର୍ବଳ ହୋଇ ମୃତ୍ୟୁମୁଖରେ ପଡ଼ିଥିବା ବନବିଭାଗ ସ୍ପଷ୍ଟ ହୋଇଥିଲା । ସେହିପରି ଭରତପୁର ଜଙ୍ଗଲରେ ମଧ୍ୟ ଗତବର୍ଷ ଫେବ୍ରୁଆରୀ ୧୩ରେ ଏକ ଦନ୍ତାହାତୀର ମୃତ୍ୟୁ ଘଟିଥିଲା । ପାଟିରେ ବୋମା ବିସ୍ଫୋରଣ ଯୋଗୁଁ ଘା’ ହୋଇ ସେପ୍ଟିସେମିଆରେ ଆକ୍ରାନ୍ତ ହେବା ଦ୍ୱାରା ଦନ୍ତାର ମୃତ୍ୟୁ ଘଟିଥିବା ଜଣା ପଡ଼ିଥିଲା ।

ମୂଲ୍ୟବାନ ଦାନ୍ତ ପାଇଁ ରାଜ୍ୟରେ ହାତୀ ଶିକାର ବଢ଼ି ଚାଲିଛି । ରାଜ୍ୟର ବିଭିନ୍ନ ଜଙ୍ଗଲରେ ଶିକାରୀମାନେ ଟାର୍ଗେଟ କରି ଦନ୍ତା ଶିକାର କରୁଛନ୍ତି । ମାଫିଆମାନେ ଶିକାରୀଙ୍କ ଠାରୁ ହାତୀ ଦାନ୍ତ କମ୍ ମୂଲ୍ୟରେ କିଣି ରାଜ୍ୟ ବାହାରକୁ ଚାଲାଣ କରୁଛନ୍ତି । ବିଶେଷକରି ପଶ୍ଚିମବଙ୍ଗ ଓ ଆସାମ ଦେଇ ଚୀନ୍କୁ ହାତୀଦାନ୍ତ ଚାଲାଣ ହେଉଥିବା ଜଣାପଡ଼ିଛି । କାଁ ଭାଁ ବନବିଭାଗ ଓ ଏସ୍ଟିଫ୍ ହାତରେ ଶିକାରୀ ଧରାପଡ଼ୁଛନ୍ତି । ହେଲେ ମାଫିଆଙ୍କ ନିକଟରେ ପହଞ୍ଚିପାରୁ ନାହାନ୍ତି ।