ଫିଲିପାଇନ୍ସରେ ଜରୁରିକାଳୀନ ସ୍ଥିତି : କାଲମେଗୀ ପରେ ଆସୁଛି ଆଉ ଏକ ବାତ୍ୟା

ମାନିଲା, ୦୬ |୧୧  :   ଫିଲିପାଇନ୍ସରେ କମୁନି ଦୁର୍ଦ୍ଦଶା । ବାତ୍ୟା କାଲମେଗୀ ଛାଡିଯାଇଥିଲେ ବି ବଢୁଛି ସଙ୍କଟ । ଯାହାକୁ ନଜରରେ ରଖି ସେଠାକାର ସରକାର ଲଗାଇଛନ୍ତି ଜରୁରିକାଳୀନ ସ୍ଥିତି । କ୍ଷୟକ୍ଷତିକୁ ଭରଣା କରିବାକୁ ପ୍ରୟାସ ଆରମ୍ଭ କରିଛନ୍ତି ସରକାର । ଏସବୁ ଭିତରେ ଚିନ୍ତା ବଢାଇଛି ମୃତ୍ୟୁ ସଂଖ୍ୟା । ପୂର୍ବରୁ ବାତ୍ୟା ପ୍ରଭାବରେ ୪୦ ଜଣ ପ୍ରାଣ ହରାଇଥିବା ଖବର ଆସିବା ପରେ ଏବେ ଏହି ସଂଖ୍ୟା ୧୧୪ରେ ପହଁଚିଲାଣି । ସେପଟେ ଆଉ ଏକ ସମ୍ଭାବ୍ୟ ବାତ୍ୟା ପାଇଁ ଚିନ୍ତାରେ ପଡିଛନ୍ତି ଫିଲିପାଇନ୍ସବାସୀ ।

ରିପୋର୍ଟ ଅନୁସାରେ, ଦେଶର ପୂର୍ବ ପ୍ରାନ୍ତରେ ଥିବା ଲେଟେ ଓ କେବୁରେ ବାତ୍ୟା ଲ୍ୟାଣ୍ଡଫଲ୍ କରିଥିଲା । ଏହି ଅଞ୍ଚଳରେ ଗତ ମାସରେ  ବଡ ଭୂମିକମ୍ପ ମଧ୍ୟ ହୋଇଥିଲା । ଗୋଟିଏ ବିପଦରୁ ଲୋକେ ସମ୍ପୂର୍ଣ୍ଣ  ଭାବେ ମୁକୁଳି ନଥିବା ବେଳେ କାଳ ସାଜିଥିଲା ବାତ୍ୟା କାଲମେଗୀ ବା ଟିନୋ । ଲ୍ୟାଣ୍ଡଫଲ୍ ସମୟରେ ପବନର ବେଗ ଘଣ୍ଟା ପ୍ରତି ୧୪୦ କିଲୋମିଟରରୁ ଅଧିକ ରହିଥିଲା । ପରେ ଏହା ୧୯୫ କିଲୋମିଟରକୁ ବୃଦ୍ଧି ପାଇଥିଲା । ଯେଉଁଥିରେ ଘର ଭାଙ୍ଗିବା ସହ ଅନେକ ଲୋକ ବନ୍ୟାରେ ଭାସି ଯାଇଥିଲେ । ଏପରି ଭାବେ ୧୧୪ ଜଣ ପ୍ରାଣ ହରାଇଛନ୍ତି । ଏହାସହ ଉଦ୍ଧାର କାର୍ଯ୍ୟରେ ନିୟୋଜିତ ଥିବା ୬ ଜଣ ସୁରକ୍ଷାକର୍ମୀ ମଧ୍ୟ ପ୍ରାଣ ହରାଇଥିବା ଜଣାପଡିଛି।

ଏତେ ପରିମାଣରେ ଦୁର୍ଦ୍ଦଶା ଏବଂ କ୍ଷୟକ୍ଷତି କାରଣରୁ ଫିଲିପାଇନ୍ସ ରାଷ୍ଟ୍ରପତି ଫେରଡିନାଣ୍ଡ ମାର୍କୋସ ଜୁରୁରିକାଳୀନ ପରିସ୍ଥିତି ଘୋଷଣା କରିଛନ୍ତି । ବାତ୍ୟା ପାଇଁ ଆଗକୁ ମୃତ୍ୟୁ ସଂଖ୍ୟା ଆହୁରି ବଢିପାରେ । କାରଣ ଏବେବି ହଜାର ହଜାର ଲୋକ ନିଖୋଜ ଅଛନ୍ତି । ଅନେକ ବନ୍ୟାରେ ଭାସି ଯାଇଛନ୍ତି । ପ୍ରାୟ ୨୦ ଲକ୍ଷ ଲୋକ ବାସହରା ହୋଇଥିବା ବେଳେ ୫ ଲକ୍ଷ ଲୋକଙ୍କୁ ଆଶ୍ରୟସ୍ଥଳୀରେ ରଖାଯାଇଛି ।

ପାଣିପାଗ ବିଭାଗ କହିଛି ଯେ, ପ୍ରଶାନ୍ତ ମହାସାଗରରେ ଆଉ ଏକ ବାତ୍ୟା ଦାନା ବାନ୍ଧୁଛି । ତାହା ଫିଲିପାଇନ୍ସ ଆଡକୁ ଗତି କରିପାରେ । ଆସନ୍ତା ସପ୍ତାହରେ ଏନେଇ ଚିତ୍ର ସ୍ପଷ୍ଟ ହେବ । ଯଦି ଆଉ ଥରେ ବାତ୍ୟା ହୁଏ ତାହାଲେ ଫିଲିପାଇନ୍ସର ସଙ୍କଟ ଦୁଇଗୁଣା ବଢିଯିବ । ଏସବୁକୁ ନଜରରେ ରଖି ବାତ୍ୟାକୁ ଜାତୀୟ ବିପର୍ଯ୍ୟୟ ଘୋଷଣା କରାଯାଇଛି ।

ଫିଲିପାଇନ୍ସ ରେଡ୍ କ୍ରସ ସେକ୍ରେଟାରୀ କହିଛନ୍ତି ଯେ, ଅନେକ ବ୍ୟକ୍ତି ଘର ଭାଙ୍ଗିବା କାରଣରୁ ଫସି ରହିଥିଲେ । କିଛି ଲୋକଙ୍କୁ ବାତ୍ୟା ପୂର୍ବରୁ ସୁରକ୍ଷିତ ସ୍ଥାନକୁ ପଠାଯାଇଥିଲା  । ଯେଉଁମାନେ ଫସି ରହିଥିଲେ ସେମାନଙ୍କୁ ଉଦ୍ଧାର କରାଯାଇଛି । କେବଳ ଏତିକି ନୁହେଁ ବାତ୍ୟା ବେଳେ ଦେଶରେ ୧୬୦ଟି ବିମାନକୁ ବାତିଲ କରାଯାଇଥିଲା । ପାଣି ଭିତରେ ଥିବା ମତ୍ସ୍ୟଜୀବୀଙ୍କୁ ତୁରନ୍ତ କୂଳକୁ ଆସିବାକୁ ନିର୍ଦ୍ଦେଶ ଦିଆଯାଇଥିଲା । ଏହା ସତ୍ତ୍ନେ ଅନେକ ବ୍ୟକ୍ତି ନିଖୋଜ ଅଛନ୍ତି । ସେମାନଙ୍କୁ ଖୋଜିବା ପାଇଁ ପ୍ରୟାସ ଜାରି ରହିଛି । ଏସବୁକୁ ନଜରରେ ରଖିଲେ ଆଗକୁ ମୃତ୍ୟୁ ସଂଖ୍ୟା ୨୦୦ ଟପିପାରେ ବୋଲି ସେ ପ୍ରକାଶ କରିଛନ୍ତି ।