ITR ଜମା କରିବାର ସମୟ ସୀମାରୁ ଆରମ୍ଭ କରି ଜରିମନା ପର୍ଯ୍ୟନ୍ତ, ଭାରତୀୟ କର ଦାତାଙ୍କ ଲାଗି ବଜେଟରେ ବଦଳିବ କ’ଣ?

ନୂଆଦିଲ୍ଲୀ ୧।୨: ଅର୍ଥମନ୍ତ୍ରୀ ନିର୍ମଳା ସୀତାରମଣ ୨୦୨୬-୨୭ କେନ୍ଦ୍ରୀୟ ବଜେଟରେ ଭାରତୀୟ କର ପ୍ରଣାଳୀକୁ ଡିଜିଟାଲ ଓ ସାଧାରଣ କରଦାତାଙ୍କ ଲାଗି କମ ଜଟିଳ କରିବା ପାଇଁ ଅନେକ ପରିବର୍ତ୍ତନ ଘୋଷଣା କରିଛନ୍ତି। ଏଥିରେ ସବୁଠୁ ତତ୍କାଳୀକ ପରିବର୍ତ୍ତନ ସେହି କ୍ଷୁଦ୍ର କରଦାତାଙ୍କ ନିମନ୍ତେ ଯେଉଁମାନେ କମ୍ ଅଥବା ଶୁନ୍ୟ ଟ୍ୟାକ୍ସ ଡିଡକ୍ସନ ପ୍ରମାଣପତ୍ର ଚାହୁଁଛନ୍ତି। ସୀତାରମଣ ଘୋଷଣା କରିଛନ୍ତି ଯେ ଏବେ ଏହା ସମ୍ପୂର୍ଣ୍ଣ ସ୍ୱଚାଳିତ ଓ ନିୟମ ଆଧାରିତ ପ୍ରଣାଳୀ ମାଧ୍ୟମରେ କରାଯିବ। ଏଣୁ ଏବେ କର ଅଧିକାରୀଙ୍କୁ ସମ୍ପର୍କ କରିବାର ଆବଶ୍ୟକତା ସମ୍ପୂର୍ଣ୍ଣ ସମାପ୍ତ ହୋଇଯିବ।

ଏଥିରେ ନିବେଶକଙ୍କ ଲାଗି ମଧ୍ୟ ଆଶ୍ୱସ୍ତିକର ଖବର ରହିଛି। ଡିପଜିଟରୀ ଏବେ ସିଧା ଫର୍ମ 15G ଓ 15H କୁ ଏକତ୍ର କରି କମ୍ପାନୀଙ୍କୁ ପଠାଇ ପାରିବେ। ଏହା ଦ୍ୱାରା ଫର୍ମରେ ସିକ୍ୟୁରିଟିଜ ରଖୁଥିବା ଲୋକଙ୍କ ନିମନ୍ତେ ଅନୁପାଳନ ସହଜ ହୋଇ ପାରିବ। ଏହା ଛଡା କରଦାତାଙ୍କୁ ରିଟର୍ଣ୍ଣରେ ସଂଶୋଧନ କରିବାକୁ ଅଧିକ ସମୟ ମିଳିବ। ଆୟକର ରିଟର୍ଣ୍ଣରେ ସଂଶୋଧନ ସମୟସୀମା ୩୧ ଡିସେମ୍ବରରୁ ବଢାଇ ୩୧ ମାର୍ଚ୍ଚ କରିଦିଆଯାଇଛି। ତେବେ ଏଥି ଲାଗି ମାମୁଲି ଶୁଳ୍କ ଦେବାକୁ ପଡିବ। ଏବେ ଦାଖଲ ପ୍ରକ୍ରିୟା ଅଲଗା ଅଲଗା ପର୍ଯ୍ୟାୟରେ ହେବ।

ଆଇଟିଆର-୧ ଓ ଆଇଟିଆର-୨ ଦାଖଲକାରୀଙ୍କୁ ୩୧ ଜୁଲାଇ ସମୟସୀମା ପାଳନ କରିବାକୁ ହେବ। ତେବେ ଅଣ ଅଡିଟ ବ୍ୟବସାୟୀ ଓ ଟ୍ରଷ୍ଟଙ୍କୁ ଅଗଷ୍ଟ ୩୧ ପର୍ଯ୍ୟନ୍ତ ଦାଖଲ ଅନୁମତି ମିଳିବ। ଏହି ବଜେଟର ଏକ ମୁଖ୍ୟ ଉଦ୍ଦେଶ୍ୟ ହେଉଛି ମାଲିମକଦ୍ଦମା ହ୍ରାସ କରିବା। ଆଇନଗତ କାର୍ଯ୍ୟାନୁଷ୍ଠାନରୁ ଲୋକଙ୍କୁ ରକ୍ଷା କରିବା ପାଇଁ ନିର୍ମଳା ସୀତାରମଣ ମୂଲ୍ୟାୟନ ଓ ଜରିମନା ଆଦେଶଗୁଡିକୁ ଗୋଟିଏ ନିଷ୍ପତ୍ତିରେ ବିଲୟ କରିବାକୁ ପ୍ରସ୍ତାବ ଦେଇଛନ୍ତି। ସେହିପରି ଅପିଲ କାଳରେ ବାଧ୍ୟତାମୂଳକ ପୈଠ ୨୦%ରୁ ହ୍ରାସ କରି ୧୦% କରିଛନ୍ତି।

ସେହିପରି ଆବେଦନ ବିଚାରାଧୀନ ରହିବା ସମୟରେ କରଦାତାଙ୍କୁ ଜରିମନା ରାଶି ଉପରେ ସୁଧ ଦେବାକୁ ପଡିବନି। ସୀତାରମଣ କହିଛନ୍ତି ଯେ ପ୍ରଥମ ଆପିଲେଟ୍ କୋର୍ଟରେ ଅପିଲ ଅବଧି କାଳରେ ଅପିଲ ପ୍ରକ୍ରିୟାର ପରିଣାମ ଯାହା ବି ହେଉନା କାହିଁକି ଜରିମନା ରାଶି ଉପରେ କୌଣସି ସୁଧ କଷା ହେବନି। ଅନ୍ୟ ଏକ ବଡ଼ ପରିବର୍ତ୍ତନରେ ଏବେ କରଦାତା ପୁନର୍ମୂଲ୍ୟାଙ୍କନ ଆରମ୍ଭ ହେବା ପରେ ମଧ୍ୟ ୧୦%ର ଅତିରିକ୍ତ କର ପୈଠ କରି ନିଜ ରିଟର୍ଣ୍ଣ ଅପଡେଟ୍ କରିପାରିବେ। ଅପଡେଟ୍ କରାଯାଇଥିବା ରିଟର୍ଣ୍ଣ କାର୍ଯ୍ୟାନୁଷ୍ଠାନର ଚୂଡାନ୍ତ ଆଧାର ହେବ।