ଭାରତ ସହ ଲଢିବାକୁ ମୁନୀର ପାଗଳ, ଜିହାଦ ପାଇଁ ତିଆରି କରୁଛନ୍ତି ରଣନୀତି

ଇସଲାମାବାଦ, ୦୩ /୧୨: ଭାରତ ସହ ଯୁଦ୍ଧ କରିବାକୁ ଚାହୁଁଛନ୍ତି ଅସିମ୍ ମୁନୀର । ତାଙ୍କୁ କେବଳ ହିଂସା ପସନ୍ଦ । ଯେଉଁ ଯୁଦ୍ଧ ଇମ୍ରାନ ଖାନଙ୍କ ସମୟରେ ହୋଇପାରିନଥିଲା ତାହା ଶେହଓ୍ୱାଜ ସରିଫଙ୍କ ସରକାରରେ କରିବା ପାଇଁ ମୁନୀର ଚାହୁଁଥିବା କହିଛନ୍ତି ଇମ୍ରାନଙ୍କ ଭଉଣୀ ଅଲିମା ଖାନ୍ ।

ଅଲିମା କହିଛନ୍ତି ଯେ, ଅସୀମ ହେଉଛନ୍ତି ଜଣେ କଠୋରପନ୍ଥୀ । ସେ ଇସଲାମକୁ ରକ୍ଷା କରିବା ପାଇଁ କହୁଛନ୍ତି । ଧର୍ମ ନାଁରେ ହିଂସାକୁ ଉସକାଉଛନ୍ତି । ତେଣୁ ଭାରତ ସହ ଯୁଦ୍ଧ କରିବା ହେଉଛି ତାଙ୍କର ବଡ ଲକ୍ଷ୍ୟ । ଯେଉଁମାନେ ଇସଲାମକୁ ବିରୋଧ କରୁଛନ୍ତି ସେମାନଙ୍କୁ ଦଣ୍ଡ ଦେବାକୁ ମୁନୀର ସଦାବେଳେ ଆଗଭର ରହିଥାନ୍ତି ।

ସେ ଆହୁରି କହିଛନ୍ତି ଯେ, ତାଙ୍କ ଭାଇ ଇମ୍ରାନ ହେଉଛନ୍ତି ଜଣେ ଭଲ ବ୍ୟକ୍ତି । ସେ ସମସ୍ତ ଧର୍ମକୁ ସମ୍ମାନ ଦିଅନ୍ତି । ଭାରତ ସହ ସମ୍ପର୍କ ରକ୍ଷା କରିବାକୁ ଇମ୍ରାନ୍ ନିରନ୍ତର ପ୍ରୟାସ କରୁଥିଲେ । କିନ୍ତୁ ଭାଇଙ୍କ ପରେ ମୁନୀର ଶକ୍ତିଶାଳୀ ହୋଇଯାଇଛନ୍ତି । ଭାରତ ତଥା ଭାରତର ସହଯୋଗୀ ଦେଶକୁ ସେ ଲଗାତାର ଭାବେ ଟାର୍ଗେଟ୍ କରୁଛନ୍ତି । ଧର୍ମ ଯୁଦ୍ଧ ନାଁରେ ମୁନୀର ପାକିସ୍ତାନର ଛବିକୁ ମଳୀନ କରୁଛନ୍ତି ।

କେବଳ ଅଲିମା ନୁହେଁ ମଙ୍ଗଳବାର ଇମ୍ରାନଙ୍କ ଅନ୍ୟ ଜଣେ ଭଉଣୀ ଉଜମା ଖାନମ୍ ମଧ୍ୟ ମୁନୀରଙ୍କୁ ଟାର୍ଗେଟ୍ କରିଥିଲେ । ଇମ୍ରାନଙ୍କୁ ଜେଲରେ ଭେଟି ସେ କହିଥିଲେ ଯେ, ଇମ୍ରାନଙ୍କୁ ମାନସିକ ଭାବେ ନିର୍ଯାତନା ଦିଆଯାଉଛି । ଦିନ ସାରା ଗୋଟିଏ କୋଠରୀରେ ତାଙ୍କୁ ରଖାଯାଇଛି । ମାତ୍ର କିଛି ମିନିଟ୍ ପାଇଁ ତାଙ୍କୁ ଜେଲ ପରିସରରେ ବୁଲିବାକୁ ଦିଆଯାଉଛି । ଇମ୍ରାନଙ୍କୁ କାହା ସହ କଥାହେବାକୁ ଜେଲ କର୍ତ୍ତ-ପକ୍ଷ ଅନୁମତି ଦେଉ ନାହାଁନ୍ତି । ଏହାପଛରେ ଅସିମ ମୁନୀରଙ୍କ ହାତ ଥିବା ଉଜମା ଅଭିଯୋଗ କରିଥିଲେ ।